Jeremiah 4 (TOMA)

1 «Izilayɛle, ni ɗa ɠalena ma ʋolu,»Ɠɔoɠɔ GALAGI wooi ɠana,«ni ɗa ʋa ʋolu pɔ̀,ni ɗa ɠɛlɛ ɗa-ɠɔzɔba ɠɔɔɠɔ ganigiti ba,è mina ɗa ga leʋeteʋe, 2 ni ɗa konai wo ga:‹Gè ɠonaa Ɠɔoɠɔ GALAGI ma, nii é vulua,›ni ɗa kɛɛna, è ziɛ ga gaamai, sɔledai zu, ta telebodai,zii ɠiligiti ti ɠilagilagiti ta tuyai loo ɓɔɠɔ ʋɛ, Ɠɔoɠɔ GALAGI lɔɠɔi zu,ti naa ɠɛ ga ta-ɓɔɠɔ maamusɛi.» 3 Mazɔlɔɔ Ɠɔoɠɔ GALAGI wooi ɠaaZuda nuiti ma ta Zeluzalɛme ma:«À kpala niinɛi ma wozai wo,à ɓe ani zuwui vazasu kpolo ɠaingiti saama. 4 À ɓɔɠɔ ɲade Ɠɔoɠɔ GALAGI ʋɛ,à valibo wo-yiimaʋɛ,Zuda nuiti ta Zeluzalɛme zei wo nuiti.Mazɔlɔɔ ni naa laade,nà-ziiɠaawanai ɠa yeizu eɠɛ abui, è galai wo,nu nɔpɛ ge la zooga é ʋa paa,tɔɔzei wo-ziɛ ʋele ɲɔiti ba.» 5 «À zeze ga nii Zuda yooi pɛ su,wo bo, é mɛni Zeluzalɛme ná pɛ:‹À bo! Wo puʋugi vɛ zooi zu ná pɛ!À kpeei loo, wo wooɠula la gola, wo ɠɛ ma:À ɠaalɛ ba, ade li taa wolaiti su, siɠigi ti ma!› 6 À poogi ɠaalɔ Siyɔn letema ʋelei,à ʋela, à mina lo pa!Mazɔlɔɔ nà ʋaazu ga maanɔɠɔi,é zeɠe lɛkpɛmaʋɛ nu ɠɔʋɛzu ʋelei,ta kidaaʋili faa zuɠoloɠolo golai.» 7 Zalai vologa ná-ada maalɔɔɠuai,zɔi é ziiti suɠoloɠolo su, é ʋilɛni pelei ma,é ɠulaa seizuʋɛ ga é wa-yooi ɠoloɠolo,ga é wa-laa wolaiti koloɠolo, é ti zuɲakai yɛ. 8 Naa ɠa é ba, à saa wɔlɔ wo seɠei loo ɠɔba,à gɔlɔi wo, wo ɓɔɠɔ maawɔin!Mazɔlɔɔ, Ɠɔoɠɔ GALAGI ná-ziiɠaawanai la zeɠezu ade maala. 9 «Naama volo ná, masagi iɲɔ ka leʋe,kundiɠiiti ɓalaa, zalaɠa ɠula nuiti ta ɓala,GALA goo wo nuiti daa ɠa vɔ,»Ɠɔoɠɔ GALAGI wooi ɠana. 10 Gè ɠɛni ma: «Ee, Maliɠii Ɠɔoɠɔ GALAGI,è niima nuɓusɛiti yaavaa, ta Zeluzalɛme!È ɠɛ ma: ‹Wa ziilɛigi zɔlɔɔ!›Tama boɠa zɔkpɔi ɠa é laani gi-ɠɔdaʋɛ.» 11 Názu Maliɠii ɠa ɠɛ nuɓusɛiti ta Zeluzalɛme ma:«Fiilɛ ɓadii ɠa zeɠezu teʋebai zu ada ɠaaɠoozagiti,é ʋa, é ʋu nà-nuɓusɛiti ma.Fiilɛ go la de, nii nu a zoo nɔ é molo ɠaavɛɛ la. 12 Toɠa ga fiilɛi nii sɛbɛi wɔɔlɔai gola,é ʋaazu, é zeɠe miná nà-devei zu.Niizu nà ɠa gè tukpɔi laalɛɛzu ti wu.» 13 Sili nui ʋɛtɛ, é lɛɛzu eɠɛ tonaɓiingiti!Ná-kɔɔɠɔ wotoloiti kɛɛʋɛ eɠɛ tɔngɔlɔ fiilɛi,ná-sooiti feɠagɛ ɓɔɠɔ ma, é leʋe koɠɛiti ba!Gi maanɔɠɔa, gi ɠoloɠologa! 14 Zeluzalɛme, yii maagba, è ná-faa ɲɔiti kpeteʋe ba, ɗa ɠizo.Siɛgi ɓɛgele ɠa è kɛɛzu zeini kisiɛ ɲɔi zu? 15 Woilo wooi naa ma, é zeɠezu Dan yooi zu,toɠa maanɔɠɔi ma vai wosu.Toɠa wosu, é zeɠe Efelayime ɠizeiti ma: 16 «À bo nuɓusɛiti kpein ma, wo Zeluzalɛme loo ɠisu:‹Nu ɲɔiti ta ga maaɓuɠa, ta ʋaazu,ti zeɠe zooi ná zu, ʋɛ ná maaɠoozaai.Ta kpeei loozu Zuda laa wolaiti daalɔɠɔma. 17 Ti latigɛ Zeluzalɛme ma, eɠɛ kpalagi makɛ nuiti,mazɔlɔɔ nà ɠa ti wuzeɠeai dàalɔɠɔma,› »Ɠɔoɠɔ GALAGI wooi ɠana. 18 «Naa kpein ka ɠɛɛzu ga ɗe, Zeluzalɛme,tɔɔzei è-ziɛ ʋeleiti ba, ta ɗa-ɠɛɛwotiiti.Ɗa-nu ɲɔulai ma ɠulanumai ɠana,anɛɛ ni gaawanaʋɛ, toɠa yeizueyɛsu é lo è-yii ʋa.» 19 Ee, kòozuʋɛ ɠa tàɓazu!Nà laaʋoesu ga taɓai.Zìi ɠa doɠazu gola.Gè la zooga gè ʋa maaɠɛ kpɔ.Gè puʋugi wooi mɛnini, ta kɔɔɠɔ ɓeei. 20 Toɠa wosu ga: «Faa zuɠoloɠologi! Faa zuɠoloɠologi!»Mazɔlɔɔ zooi ɠoloɠologa ɲɛgɛlɛin.Gaamago nɔ, nà-pɛlɛiti ti ɠoloɠologa,sèizuʋɛti gaaʋala ba. 21 Nà yɛsu kɔɔɠɔ ʋoogiti kaazu,gè ɗa puʋu gooi mɛni eyɛsu yeelɛ? 22 Ɠɔoɠɔ GALAGI ɠɛ ma: «Ungo, ɠi ge la nà-nuɓusɛiti ma, ti la kwɛ̀ɛ.Ta ga ɠimalala lointi.Ti ʋalagɛ ɠigi ma.Ɠigi ɠa ti ma nɔ ga ta ɠɛna faa ɲɔi ɠɛa.Kɛlɛ ti la faa ʋagɔi ɠɛɛ ʋelei ɠwɛɛ.» 23 Gè wɛlɛa eteai ʋa,wɛlɛ, kɛʋele ɠila ge la ba, suɲakai ʋe.Gè wɛlɛa geeɠɔlɔgi ʋa,ná-wozakalagiti ti loa ya. 24 Gè wɛlɛa gizeiti ba,wɛlɛ, ti ɲiikpiga,gize goiti kpein ta balizu. 25 Gè wɛlɛ, gè pɛtɛ ga nuɓusɛi ɲɛɛlɛa,ta wɔniiti kpein ti ʋelaa. 26 Gè wɛlɛ, gè pɛtɛ ga zooi é ɠɛni ga gulu ɓelei,é ɠɛa ga teʋebai suvɔai.Taa wolaiti ti pɛ ti woloa Ɠɔoɠɔ GALAGI luɠɔ,tɔɔzei ná-ziiɠaawana wolai ʋa. 27 Mazɔlɔɔ Ɠɔoɠɔ GALAGI wooi ɠaa:«Eteai pɛ ge ɠoloɠologa,kɛlɛ gè la koloɠolosu mɛtu. 28 Naa maaʋele ma, eteai ɠa ɠɛ gaazuɗɛʋui zu,geeɠɔlɔgi é maazuʋɛ, su ɠa ɓidi,mazɔlɔɔ gè boga.Gè deveʋɛ fɔɔn, gè la ɠalega ma ʋo su.» 29 Soo ɓulugiti ta mɛɛn ʋili nuiti maalugi mɛnigai ma,taai pɛ ge ʋelani, ti ɗa lɔ dɔɓɔi zu,ti ɗa lɛ fasa wolaiti ma.Taai pɛ suwoga, nu nɔpɛ ge la mɔ ná. 30 Zeluzalɛme, taa wolai è ɠoloɠologa, leeni ɠa è kɛɛzu?Ɗa ɓɔɠɔ maaɠilizu ga seɠe ɓɔigi,è zanu balaiti dɔ yeeiti ba,è ani lɛigi ziɛ è ɠaazu ɠɔpoluʋɛ.Ɗa ɓɔɠɔ ʋasu wafuun nɔ.Ɗa-wɛɛinti ti è wɔinzeɠea,ti wɔinʋɛ ga ti è ʋaa. 31 Mazɔlɔɔ nà kpala gooiti mɛnisu,eɠɛ anzanui doun zɔlɔɔ koozuwanai ba,eɠɛ koozuʋili kpeeiti, doun zɔlɔɔda mɔungi zu.Kpee wooiti be Siyɔn anzanu loin toozu.Toɠa zikɔzu, é ɗa yeeiti tɛ geezu, é ɠɛ ma:«Màanɔɠɔa, nà ga za nu ʋaa nuiti zea!»

Jeremiah 4 (TOMA)

In Other Versions