Jeremiah 4 (YAPE)
1 Be ga’ar SOMOL, “Girdi’ nu Israel, fa’anra gimed ba’adag ni ngam sulod, ma ere mu sulod ngog. Ma fa’anra mu yul’yul’gad ngog nga mu chuweged e pi liyos ni gub fananikay, 2 ma aram e rayag ni ngam mowgad u fithingag. Ma aram e gubin e nam e bay roged ngog ni nggu tow’ath nagrad, ma bay ra pininged e sorok ngog.” 3 Be ga’ar SOMOL ko girdi’ nu Judah ngu Jerusalem, “Mu gi’ed e yungi flang romed ni dawor ni gi’ e but’ riy; dab mu yunged e awoch romed nga fithik’ e rachangal. 4 Mu ted u tagil’ e m’ag u thildad, I Gag SOMOL romed, mi gimed og nagmed ngog, gimed e girdi’ nu Judah ngu Jerusalem. Fa’anra dab mu rin’ed, ma damumuw rog e ra yik ni bod e nifiy ni bochan ngongolmed nib kireb. Ra daramram ma dariy be’ nra thang.” 5 Mu thoyed e rappa u ga’ngin yang u lan e nam!Mu tolulgad nib ga’ lungmed ma bmatabogol!Moged ngak e girdi’ nu Judah ngu Jerusalemni ngar milgad ko fapi binaw ni kan yororiy ni fan ko mael. 6 Mu daged e wo’ nga Zion!Mmilgad ni fan e nge dabi buch ban’en romed! Dab mu sowathgad!I SOMOL e ke fek e riya’nge ba gafgow nib ga’ ko lel’och i yib. 7 Bod ba gamanman ni layon nike yib ko gin ma mith riy,ba tagathay e pi nam e ke yib nga wean.Ke yib ni nge gathay yu Judah.Pi binaw nu Judah e bayi par ni dakriy woton u but’,ma dakriy be’ nra par u lan fapi binaw. 8 Ere mon’ed e mad ni tutuw, mi gimed yor mi gimed dololoy’ni bochan e damumuw rok SOMOL nib tinowaye dawri chuw u daken yu Judah. 9 I SOMOL e ga’ar, “Re rran nem e ra mulan’ e pilung nge pi tayugang’; prist e ra rus mra gin e pi profet.” 10 Ma aram mug ga’ar, “SOMOL, ni Th’abi Tolang, karim bannag e girdi’ nu Jerusalem! Ya mog ni gapas e nge yib, ma saydon e kan tay nga k’anganrad.” 11 Bay i taw nga bangiyal’ nap’an yira yog ko girdi’ nu Jerusalem ni bay bang i nifeng nib mo’oruf gowalngin ni be yib u lan e ted ni desert i yib ngorad. Gathi bang i nifeng nib waer ni kemus ni chabung e nge changagnag 12 nifeng nma yib ni SOMOL e ke tirigiliy e kabgel gelngin ko ginem! I SOMOL e ir e keyog ni nge aw e gechig nga daken e girdi’ rok. 13 Amsap, pi to’ogor e karbad ni bod yungi manileng. Chariot rorad e bod e nanyor, ma pi os rorad e ba machrag ko arche’ ni eagle. Kad mu’gad! Riya’ gadad! 14 Jerusalem, mu luknag e kireb u gumircha’em, ya nge yag ni mu thap. Bu uw n’umngin nap’an ni ngu’um par ni ga be leamnag e tin kireb ban’en? 15 Pi tamal’og nrabad ko nam nu Dan ngu daken e pi burey nu Efraim e yad be weregthin e n’en ke buch. 16 Karbad ni ngar kurfed e thin ko pi nam nge ngak yu Jerusalem ni pi to’ogor e yad be yib i yib u bang nib orel. Pi to’ogor nem e bay rabad ra tolulgad nib togopluw ko pi binaw nu Judah 17 ma bay rabad ra longbiyed yu Jerusalem ni bod e pi pumo’on ni yad ma matanagiy bang i flang, ni bochan e girdi’ riy e kar togopluwgad ngak SOMOL. I SOMOL e be non. 18 Judah, kam girengiy e biney nga dakenam u rargom ni um par nge rogon e pin’en ni um rin’. Denen rom e ke k’aring e biney e gafgow; ya ke rag nga gumircha’em. 19 Amith! Dabkiyag ni ngu athmagliy e amith!Gumircha’eg! Be mithmith gumircha’eg nib almarin!Dabkiyag ni gu th’ab gulngag;kug rung’ag lingan e rappahnge lungun e tolul ko mael. 20 Ke malay reb e riya’ nga daken reb;ke mogothgoth fare nam ni polo’.Yugun dada’ ma kan buthug e pi tent romad;kateng riy e kan gochothuy ke yochyang. 21 Uw n’umngin nap’an ni ngguy e mael nike achngiyma gu be rung’ag lingan e rappah? 22 I SOMOL e ga’ar, “Girdi’ rog e yad ba ppinat;dar nanged gag.Yad bod e bitir nib balyang;ni de tamilang lanyan’rad.Yad ba salap i ngongliy e n’en nib kireb,machane dar nanged i ngongliy e n’en nib manigil.” 23 Gu sap ko fayleng ma dakriy woton u but’;lanelang e dakriy ban’en ni be mat’ riy. 24 Gu sap ko pi burey ma be rur,ma yochi burey e be thigthig. 25 Gguy ni dariy e girdi’;mus ko arche’ ni kar changaggad karanod. 26 But’ nib yungol e ke mang bang i daken e ted;binaw riy e darkiy woton u but’ni bochan e damumuw rok SOMOL nib tinowey.( 27 Keyog SOMOL ni ga’ngin e fayleng ni bayi par ndakriy e wulgo’ riy, machane dabi kirebnag e fayleng ni ga’ngin.) 28 Bayi yor e fayleng;ma lanelang e bayi lumor.I SOMOL e be nonni dabi thilyeg lanyan’.Ke turguy e tin nge rin’ni dabi sulsul riy nga tomur. 29 Ka lingan e girdi’ ni mayan u os nge pi’in nma mun gat’ingma gubin e girdi’ ni bay ra milgad.Bochiyad e ra mil nga loway;ma boch e bayi goraraw ngalang nga fithik’ e war.Gubin e yochi binaw nra par ni dakriy e girdi’ u langgin,ma dakriy be’ nra yib i par ngalan e pi binaw nem bayay. 30 Jerusalem, gafgow gur!Mang ni ngamon’ e mad ni row nga dakenam?Mang ni ka mu nunuw ko churwo’ ma ka mu achay owchem?Ka mu ngongliy rogom ka mu pidorang ni dariy fan!Pi ilingem e ka ra furuyed gurma yad be finey ni gomang e ni thang e fan rom. 31 Ku gu rung’ag laman e yor, ni bod be’ ni bpin ni nge gargel,nge ba tolul ni bod be’ ni bpin ni nge gargaleg e bin som’on e bitir rok.Re lam nem e lungun Jerusalem ni be rere’nag e pogofan rok,be ki’yag pa’ ni be ga’ar,“Gafgow gag!Karbad ni ngar thanged e pogofan rog!”