Matthew 10 (TOMA)
1 Yesu ná-keela puugɔ maazu felegɔiti (12) tolini, é zobogi ve ti ya ga ti ɗa kɔzɔba yɛnvuiti kpɛ, ti ɗa seeɓɛ nuiti ta maalɛɠɛfɛ nuiti kɛdɛ. 2 Keela puugɔ maazu felegɔiti (12) daaseigiti kaa: ma mɔungi Simon, nii é lolisu ga Piyɛlɛ, ta kɛɛɠɛloin Andelé, Zeɓedé ná-doun zunuiti Zake, ta kɛɛɠɛloin Zan, 3 Filipe ta Ɓaatelemi, Tomase ta Matiyo mulu zo nui, Alefé ná-doun zunui Zake, ta Tadé, 4 Simon nii é ɠɛni ga Zou Maalobo Nui ta, naa ʋɛɛ Zudase Isekaliyɔte ʋa, nii é Yesu yaavani. 5 Nu puugɔ maazu felegɔi (12) naati ka Yesu ti leʋeni, siɛgi zu é ɓeni la ga falii niiti bo ti ma ga: «À mina li zii ɠiligiti pɔ pelei. À mina lɛ Samali laai tanɔpɛ su. 6 Kɛlɛ tɔun à li Izilayɛle nuiti pɔ pelei ti ɠɛai eɠɛ baalagiti ti loai ya. 7 Ʋɛ nɔpɛ wa leʋe ná, à Woo Niinɛ Ʋagɔi nii laazeeli, ga geeɠɔlɔgi ma masadai maaɓuɠaa. 8 À seeɓɛ nuiti kɛdɛ, wo gɔvɛiti buzeɠe, wo gee nuiti ɲade, wo inɛgiti kpɛ. Wo sɔlɔɔgɛ ga vebɛi, wa ɓalaagi à teʋe ga vebɛi. 9 À mina zanu seɠe ɓaa wali, ɓaa wali ɠae ʋɛlɛʋɛlɛgi. 10 À mina ɓɔlɔ zeɠe siɛi wo fai zu, ɓaa seɠewuzeɠe felegɔ, ɓaa saʋala, ɓaa tukpɔ, mazɔlɔɔ botiɠɛ nui maanɛɛʋɛ é ɠɔnɔ sɔlɔɔ.» 11 «Siɛgi zu wo zeelizu la taa wolai ta zu ɓaa taa goi ta zu, à nu ɠaiziɛ, nii a yeezei wo wu. À yɛ naama nui ʋɔ bɛ, eyɛsu wo zeɠena yeeɠɛɠalai zeeli. 12 Wa ɠɛna kpofalagi ɓudɛa, à laali pɛlɛi wu nuiti ma. 13 Ni ta yeezeina wo wu, wa-yiilɛigi ɠa yei ti ma. Kɛlɛ ni ti la yeezeini wo wu, wa-yiilɛigi ɠa ɠaaɠale ma wo ʋɔ. 14 Taai nɔpɛ wa lɛ su, ɓaa pɛlɛi nɔpɛ wa lɛ bu, ni nuiti ti la pɔ ga ti ʋa yeezei wo wu, ɓaa ti ʋa woilo wo-wooi ma, à ɠula ná ʋa, wo fufiligi ɓukpunɛ, é ɠula wo-ɠɔɠɔiti ma. 15 Gè bo wo ma ga gaamai, tukpɔɠaaleʋe voloi, naama laai ná-tukpɔi ɠa ɓaa, é leʋe Sɔdɔme ta Gomɔɔl laaiti tɔnɔi ʋa.» 16 «Wɛlɛ, nà wo leʋesu eɠɛ baalagiti, zuluɓuiti saama. Naa ɠa é ba, à ɠeleɠele eɠɛ kaalii, wa-vai ɠaanɛ eɠɛ poopogiti. 17 À dama, tɔɔzei ta ʋaazu liizu ga woye tukpɔɠaaleʋezuʋɛti. Ta wo loɠa ta-ƓALA dɛbi ʋɛlɛiti bu. 18 Ta wo zo ga maaɓa, ti li ga woye kundiɠiiti ta masagiti kakala nɔ̀un maaʋele ma, nii a kɛ wo zeele wooi wo Zuifuiti ta zii ɠiligiti ma. 19 Kɛlɛ siɛgi zu ti liizu la ga woye tukpɔɠaaleʋezuʋɛ, à mina yiizoolɛ ga ʋelei wa ɓɔɛ la, ɓaa nii wa bo, tɔɔzei naa ɠa ve wo ya ma yeeɠɛɠalai nɔ zu. 20 Mazɔlɔɔ wa lɛi wo ʋa ɠɛ ɓɔɛzu, kɛlɛ wo-Ɠɛɛ ná-Zɛnvui ɠa é ʋaazu ɓɔɛzu ga wo-laaʋɛ.» 21 «Ɠɛɛɠɛloin ɠa kɛɛɠɛloin leʋe ga ti paa, doun kɛɛɠɛi ɠa ná-doin leʋe ga ti paa. Dointi ta wuzeɠe ti zɔlɔɔ nuiti daalɔɠɔma, ti ti lɔ saai zu. 22 Ɛsɛ pɛ ka wo wɔinzeɠe nɔ̀un maaʋele ma. Kɛlɛ zɔi a lo kpaan eyɛsu gaaɓelasuʋɛ zeeli, naa ɠa ɠizo. 23 Ni ta wo wɔinzeɠena taai ta zu, à ʋela, wo li taa ɠili su. Gè bo wo ma ga gaamai, wo la ɓega ga Izilayɛle laaiti pɛ suɓizɛ, eyɛsu Nu ná-Doun Zunui ʋa.» 24 «Kaladopoi la leʋeni ná-kalamɔin ʋa, ɓaa botiɠɛ nui ʋa leʋe maliɠii ʋa. 25 Nii soloogai kaladopoi ma, naa ɠa ga é ɠɛ ga ná-kalamɔin ɠɛʋele, botiɠɛ nui ɓalaa ɠɛ ga maliɠii ɠɛʋele. Ni ti pɛlɛ kɛɛɠɛi levea ga Ɓeelezeɓule, ti la pɛlɛ wu nuiti poomuga, é ʋa leʋe naa ʋa ɓaa? 26 «Naa ɠa é ba, à mina lua naama nuiti ba pa. Tɔɔzei maalɔɔɠu vaa nɔpɛ ge la ná, nii é la ɠulaa kɛlɛma. Dɔɔɠuzu vaa nɔpɛ ge la ná, nii é la ɠwɛɛga. 27 Nii gè bosu wo ma dɔɔɠuzu, à naa wo kɛlɛmaʋɛ. Nii ti laaʋɛɛzu wo-woiyeɠei la, ti bo, à wooɠula ga naa, é wo pɛlɛ ɠɔmaʋɛ. 28 À mina lua naati ba, niiti ta zoo nui ɓusɛi nɔ ʋaazu, kɛlɛ zobo ge la ti ʋɛ, ti ʋa zɛnvui ʋa. Kɛlɛ à lua GALA ba, nii zobogi bɛ é kpusɛi ta zɛnvui undaaʋili abui zu. 29 Nu la ɗa ga soolo felegɔi ʋɔdia ga wali ɠae ɠila ɓaa? Tama ti ɠila kpalaa ge la ɗa ga loa zooi ma, ni wo-Ɠɛɛ GALA ge la vaani bu. 30 Kɛlɛ wɔun vɔlɔ, wɔundeɠai pɛ gaalugɛ. 31 À mina lua mu, wo vizɔgɛ soolo kpulugiti ba.» 32 «Zɔi nɔpɛ a ɠeke suziɠa ga nà-faa nuiti gaazu, nà ɓalaa nà ɠeke suziɠa ga naama nui ná-faa Kɛ̀ɛ ɠaazu, nii é geeɠɔlɔgi zu. 33 Kɛlɛ zɔi nɔpɛ é ɠɛlɛzu bà nuiti gaazu, nà ɓalaa nà ɠɛlɛ naama nui ʋa Kɛ̀ɛ ɠaazu, nii é geeɠɔlɔgi zu.» 34 «À mina ɠisiɛ ga nɔ̀un paaʋɛ ga gè ziilɛi fe eteai ʋɛ. Gè la ʋaani ziilɛi feezu, kɛlɛ boɠa zɔkpɔi ɠa pàai feezu. 35 Pàaʋɛ gè kpɔɛi lɔ doun zunui ta kɛɛɠɛ yɔɠɔzu, anzanu loin ta dee yɔɠɔzu, loun anzai ta deemɔɔn yɔɠɔzu. 36 Nui zili nuiti ta ɠɛ ga ná-pɛlɛyeɠei wu nuiti nɔ.» 37 «Zɔi nɔpɛ é dee ɓaa kɛɛɠɛ nɛɛzu ʋɛ, é leʋe nɔ̀un ba, naama nui la vizɔni ga nà-kaladopo. Zɔi nɔpɛ é ná-doun zunu ɓaa ná-doun anzanui nɛɛzu ʋɛ, é leʋe bà, naama nui la vizɔni ga nà-kaladopo. 38 Zɔi ɓalaa é la zaa wului zeɠeni, é ʋa ʋilɛ pòlu, naama nui la vizɔni ga nà-kaladopo. 39 Zɔi é pɔ é zɛnvui ɠizo, naama nui ɠa ʋala ma. Kɛlɛ zɔi a ʋala zɛnvui ma nà-faa zu, naama nui ɠa sɔlɔɔ ʋolu.» 40 «Zɔi é yeezeizu wo wu, naama nui yeezeiɗa bù. Zɔi é yeezeizu bù, naama nui yeezeiɗa tèʋe nui wu. 41 Zɔi é yeezeizu GALA goo wo nui ta wu, tɔɔzei naa ɠa ga GALA goo wo nui, naama nui ɠa GALA goo wo nui ná-kulanumai ɠɛɠalai zɔlɔɔ. Zɔi é yeezeizu telebo nui ta wu, tɔɔzei naa ɠa ga telebo nui, naama nui ɠa telebo nui ná-kulanumai ɠɛɠalai zɔlɔɔ. 42 Zɔi nɔpɛ é ziɛ lɛi ɠɔɠɔ ɲɛ gila feezu doungoi niiti gila zea, tɔɔzei toɠa ga nà-kaladopoi, gè bo wo ma ga gaamai, naama nui la ʋalaga ná-kulanumai ma.»