Matthew 14 (TOMA)
1 Naama ziɛgi zu, Galilé masagi Elɔde Yesu maawooi mɛnini. 2 É ɠɛni ná-botiɠɛ nuiti ma: «Zan Ɓatisete ɠa buzeɠeai, é ɠula saai ya. Naa ɠa é kɛɛzu, é laavɔɔ vaiti kɛɛzu la.» 3 Tɔɔzei kaite Elɔde devei veeni ga ti Zan zo, ti gili, ti pili kasoi ɠa, kɛɛɠɛloin Filipe anzai Elɔdiade ná-fai zu. 4 Mazɔlɔɔ Zan ɓena ɠɛ ma: «Tɔgi la vaani bu ga è ʋa nii zeɠe ga è-anza.» 5 Elɔde ɠɛni keleɠele gaiziɛzu ga é Zan ʋaa. Kɛlɛ é ɠɛni luazu bɛbɛi ʋa, tɔɔzei bɛbɛi Zan zeɠeni ga toɠa ga GALA goo wo nu. 6 Kɛlɛ yeei ti ɠɛni Elɔde zɔlɔɔ foloi ma ɠona pilɛdai ma vɛtii ɠulazu la, Elɔdiade ná-doun anzanui kuai woni naati gaazu, niiti ti lolini fɛtii ɠulazuʋɛ. É Elɔde wola ɠoozunɛɛni. 7 É zɛba é minazeɠe anzalopoi ʋɛ, é ɠona vɔlɔ, é ɠɛ toɠa naa ve anzalopoi ya, nii nɔpɛ naa a falina ma. 8 Anzalopoi dee ná-diimai maaʋele ma, é ɠɛni Elɔde ma: «Nà pɔ Zan Ɓatisete nɔungi zeeli mà ʋɛ, aniɲakai zu.» 9 Naa masagi yiiɓɔlɔni. Kɛlɛ ná-konai maaʋele ma é boni, ta nui niiti é ti lolini fɛti ɠula vai ma, é devei veeni ga nii é faliai, ti fe zea. 10 É nui ta leʋeni ga ti Zan nɔungi leʋe ba kasoi ɠa. 11 Zan nɔungi yɛni aniɲakai zu, ti ʋaa la, ti fe anzalopoi ya, é lii la, é fe dee ya. 12 Zan ná-kaladopoiti ti ʋaani, ti ma ʋoomai zeɠe, ti maaɠulu. Naa ʋolu, ti liini, ti naama vai wo Yesu ma. 13 Yesu naama wooi mɛnigai ma, é lɛɛni keingi zu. É zeɠeni ná, é li teʋebai ta zu. Kɛlɛ bɛbɛi mɛnigai ma, ti ɠulani taaiti su, ti ʋilɛ polu ɠɔɠɔa. 14 Yesu ɠulaai ma keingi zu, é bɛbɛ wolai ɠaani. Naati maawɔin soni, é seeɓɛ nuiti kɛdɛ. 15 Kpɔkɔi zeeliai ma, kaladopoiti ti maaɓuɠani ba, ti ɠɛ ma: «Ʋɛ ɠa ga teʋebai zu, foloi lia. Bɛbɛi ɠaaɠale ma, ti li ʋɛ ɠoba laa goiti su, ti ɠɔnɔ geya ɓɔɠɔ ʋɛ.» 16 Yesu ɠɛni ti ma: «Ti ɓɛdɛ la ba ga ti li, wa ɓɔɠɔi à ɠɔnɔ fe ti ya.» 17 Kɛlɛ ti ɠɛni ma: «Ɓulu lɔɔlugɔ ta kale felegɔ nɔ ɠa é gi ya ʋɛ.» 18 Yesu ɠɛ ti ma: «À ʋa ga tiye pɔ̀.» 19 É devei veeni ga ti bɛbɛi zei tufai zu. É ɓulu lɔɔlugɔi ta kale felegɔiti seɠeni, é ɠaazulɛ geezu, é mama fee ƓALA falii wo. Naa ʋolu é ɓuluiti kpulukpuluni, é ma ɓuɠaiti fe kaladopoiti zea, naati ti gaaɠwɛ bɛbɛi ʋa. 20 Ɛsɛ pɛ ge daamii woni, ti yiɠo. Kaladopoiti ti ɓulu ɓulukpulugi mɔtai ɠaalɛɛni ba, é ɠɛ ga kpɔlɔ puugɔ maazu felegɔ (12). 21 Zɔiti ti daamii woni, naati ti ɠɛni ga zunu waadɔɔlugɔ (5.000) ɠɛɠala, anzanuiti ta doungoiti ti ɠaa la vɔlɔ luni. 22 Naama vai ɓeni nɔ feya, Yesu ɓɔini kaladopoiti da ga ti lɛ keingi zu, ti to da tuɠɔ, ti li ga ziɛ ʋoluʋelei, naama ziɛ su, é ɗa bɛbɛi ɠaaɠale ma. 23 É bɛbɛi ɠaaɠalegai ma ma, é lɛɛni gizei ma tɔ ɠila ga é GALA fali. Kpidii ʋɛai ma, tɔ ɠila nɔ ɠa niina é ɠɛni ná. 24 Naama ziɛgi zu keingi maaɠoozani niina kakei ʋa ga gola, ziɛ lakpatakpagiti ti ɠɛni kpɔlɔzu ga gola, tɔɔzei fiilɛi ɠɛni daaɠomisu. 25 Gosu yeeɠɛɠalai, Yesu ʋaani ga kaladopoiti pɔ pelei, é ɗa ziɛ ziɛi ɠa. 26 Ti kaai ma, é ɗa ziɛ ziɛi ɠa, ti luani ga gola, ti ɗa ɠɛ ɓɔɠɔ ma: «Gɔvɛ mɔtai ta ʋe-o!» Ti ɠɛni dua ɓeei loozu. 27 Kɛlɛ gaamago Yesu ɓɔɛni ti ʋɔ, é ɠɛ ti ma: «À zɛbɛzeɠe, nà ʋe de. À mina lua!» 28 Piyɛlɛ zɛba é ɠɛ ma: «Màliɠii, ni ɗa ʋe, devei ve zèa, gè ʋa è ʋɔ bɛ ziɛi ɠa.» 29 Yesu ɠɛ ma: «Ʋa!» Gaamago Piyɛlɛ ɠulani keingi zu, é ʋilɛ ziɛi ɠa, é ɗa li Yesu ʋɔ pelei. 30 Kɛlɛ é kaai ma ga fiilɛi zɛbɛi wɔɔlɔʋɛ, é luani. Tɛi é tɔɔzeini ga yeiɗa ziɛi wu, é ɓainni, é ɠɛ ma: «Màliɠii! Kìzo!» 31 Yesu yeemaaleni gaama, é so zeei ʋa, é ɠɛ ma: «Ee, ɗa-ɠidaaleʋei lɔiʋɛ! Lee vaa zu è inɛinɛgai?» 32 Naa ʋoluma ti felegɔ ti lɛɛni ʋɔɔma keingi zu, fiilɛi zuleʋe kpe. 33 Niiti ti ɠɛni keingi zu, naati ti ʋilɛni ɲiibiɠa, ti nɔkɔ bu, ti ɠɛ ma: «Gaamazu, ɗa ga GALA Doun Zunui.» 34 Ti ziɛi ɓudɛai ma, ti zeelini Zenezalɛte yooi ma. 35 Ná ʋele nuiti ti ɠwɛɛsu ɠaani Yesu ʋa, ti wooleʋeni naama yooi zu ná pɛ. Ti ʋaani pɔ ga seeɓɛ nuiti pɛ. 36 Ti maanɛɛnɛni ga ti vɔɔɠu nɔ ná-seɠei laamaʋɛ ʋa. Tama zɔiti pɛ ti ɠɛni vɔɔɠuzu ba, ti ɠɛni ʋalozu.