Matthew 14 (YAPE)
1 Ireram e ngiyal’ ni rung’ag Herod ni pilung nu Galile murung’agen Jesus. 2 Me ga’ar ngak e pi tolang ni yad bay nga tan, “Cha’nem e ri ir John ni i tawfe nike fos ko yam’. Aram fan ni bay gelngin ni nge ngongliy e maang’ang.” 3 I Herod e yog ni ngan kol John ngan m’ag nga nin’ nga kalbus. I rin’ ni aram rogon ni bochan Herodias ni i leengiy Filip ni walagen. 4 Ya yigi i yog John nma tawfe ngak Herod ni ga’ar, “De mat’aw ni kam leengiy e re pin nir!” 5 Me finey Herod ni nge li’ John ngem’, machane be tamdag ngak e girdi’ nu Israel, ya kar ted ni John e reb e profet. 6 Fa’ani taw ko chirofen nni gargeleg Herod riy me churu’ bochi pin ni fak Herodias u p’eowchen e girdi’ ni kar mu’ulunggad. Me felfelan’ Herod ngak, 7 ma aram me yog bbugithin ngak fachi pin ni ga’ar, “Kug micheg ndemturug e n’en ni ga ra yog ni nggu pi’ ngom mu gu pi’!” 8 Me yog e chitiningin ngak e n’en ni ba’adag ni nge yog, me wenig fachi pin ngak Herod ni ga’ar, “Mpi’ lolugen John nma tawfe ngog u roy ni kan tay ngalan e plet!” 9 Me kireban’ fare pilung, machane bochan fare bugithin ni yog u p’eowchen urngin e pi’in ni piningrad ni ngar uned ngak ko madnom, ma aram me yog ni ngan pi’ ngak fachi pin e tin ni be yog. 10 Ma aram me yog ni nga ni yan ni th’ab k’angan John u kalbus. 11 Mi ni fek fare llug i yib ni kan tay nga lan e plet ngan pi’ ngak fachi pin, me fek i yan ngak e chitiningin. 12 Me yib pi gachalpen John ngar feked downgin ngar k’eyged; miyad yan ngar weliyed ngak Jesus. 13 Ma fa’ani rung’ag Jesus e re thin nem, me af nga bowoch nge chuw u rom nge yan ngabang ni go ir ndariy be’ riy. Me rung’ag e girdi’ murung’agen, miyad digey e binaw rorad ngar leked u arow. 14 Me yib Jesus u bowoch nga arow, ma fa’ani guy fapi girdi’ ni pire’ ni pire’ me ri taganan’ ngorad, me golnag e pi’in yad mm’ar u fithik’rad. 15 Me chugur ni nge aw e yal’ me yib pi gachalpen ngak me lungurad, “Chiney e kari gonowrug, ma gin’ey e danir par riy. Mu non ko girdi’ ngranod ngalan e pi binaw ni be’er ngar chuw’iyed garad.” 16 Me fulweg Jesus ngorad ni ga’ar, “Dab ranod, gimed e mpi’ed ban’en ngorad ngar ked.” 17 Miyad fulweg ngak ni lungurad, “Kemus ni lal yal’ e flowa nge l’agruw i nig e ba’aray romad.” 18 Me ga’ar Jesus, “Mfeked i yib ngog ngaray.” 19 Me yog ko fapi girdi’ ni ngar pired nga but’ nga daken e pan; me fek fa lal yal’ i flowa nge fa gali nig, me sap ngalang, me pining e magaer riy ngak Got. Mi i t’et’ar fa yu yal’ i flowa ngi i pi’ ngak pi gachalpen, me pi’ pi gachalpen ngak fapi girdi’. 20 Ma urngin e girdi’ nra ked ngar fosgad ngay. Me kunukunuy pi gachalpen e tin ni aw ndaki m’ay i kay me yan i gaman ragag nge l’agruw e dug riy. 21 Ma urngin e girdi’ ni kay e re ggan nem e gonap’an e lal e biyu’ nda ni uneg e ppin nge bitir ngay. 22 Me yog Jesus ngak pi gachalpen ngar afgad nga bowoch ngar m’onod rok nga baraba’ fare lipath, me pag fapi girdi’ ngar sulod. 23 Ma fa’ani pag fapi girdi’ ngar sulod me yan nga daken bburey ni go ir ni nge meybil. Ma fa’ani aw e lumor ma go’ Jesus ni bay u rom; 24 ma re ngiyal’nem e ke n’uw yang e gin ke yan fare bowoch riy u lan e lipath, ni be yin’ e n’ew, ya be yan nga mit e nifeng. 25 Me ba ngiyal’ u thilin e dalip nge nel’ e kolok ko tanirran me yib Jesus ngorad, ni be yib u daken e ran. 26 Ma fa’ani changar pi gachalpen miyad guy ni be yib u daken e ran me ri yib e tamdag ngorad nib gel nib gel. Miyad yog ni lungurad, “Ba kan!” Miyad tolul ni kar tamdaggad. 27 Ma ka chingiyal’ nem me non Jesus ngorad ni ga’ar, “Nge pagan’med, ya gag. Dab kum tamdaggad!” 28 Me non Peter ni ga’ar, “Somol, fa’anra ri gur, me ere mog ngog nggub ngom nga daken e ran.” 29 Me fulweg Jesus ni ga’ar, “Moy!” Ma aram me chuw Peter u bowoch nge yan ngak Jesus u daken e ran. 30 Machane fa’ani guy gelngin e nifeng me rus, ma aram me nguchur nga ar. Me pong ni ba ga’ laman ni ga’ar, “Somol, mu ayuwegneg!” 31 Ka chingiyal’ nem me k’iyag Jesus pa’ nge kol me ga’ar ngak, “Rib achig e michan’ rom ngak Got. Mangfan ni be maruwar Got u wun’um?” 32 Miyow af nga bowoch, me mocha’ e nifeng. 33 Fa pi’in gachalpen Jesus ni yad bay u lan e bowoch e ra parawgad u p’eowchen Jesus me lungurad, “Riyul’ ni Fak Got gur!” 34 Miyad th’ab e lipath ngarbad nga Gennesaret, 35 me poy e girdi’ Jesus u rom. Ma aram miyad l’oeg e girdi’ ngranod ra feked e girdi’ nib m’ar i yib ngak Jesus ko yungi binaw nib liyeg e gin’em. 36 Miyad wenig ngak ni nge pag e pi’in yad mm’ar nga yugu ra mathgad nga taban e thal ni wuru’ e mad rok u but’; ma urngin e pi’in nra mathgad ngay ni yigo’o ra golgad.