Matthew 20 (TOMA)
1 «Mazɔlɔɔ geeɠɔlɔgi ma masadai ɠulaʋɛ ga pɛlɛ kɛɛɠɛi nii é ɠulani ga sobuzobui, nii a kɛ é botiɠɛ nuiti gaiziɛ, é ti leʋe ná-leezɛn ɓelei zu. 2 É tanigaa ɠaani, ta naati ti suvaawogi wo, ti zoloo wali ɠae gila ma foloi zu, é naati teʋe ná-leezɛn ɓelei zu. 3 Naa ʋoluma é ɠulani ʋolu sobu lɛlɛi laaʋuusiɛi ma, é taɠiligaa ʋɛtɛ, ti loni dɔɔɠɔ ɓalagi zu, botii la ti ya. 4 É ɠɛni ti ma: ‹À li nà-kpelei zu, wo-zalai nii maanɛai ga gè fe wo ya, nà naa ve.› 5 Naati ti liini kpelei zu. Pɛlɛ kɛɛɠɛi ɠulani mɔnɔ folo gaalɔgai ma, naa ʋolu é ɠula lɛlɛi zaʋasiɛi ma kpɔkɔ voloi, é taɠiligaa leʋe mɔnɔ ɠana nɔ. 6 Kpɔkɔi lɛlɛi lɔɔlusiɛi ma, é ɠulani ʋolu, é zunui taɠiligaa ʋɛtɛ, ti loni ete zaamaʋɛ. É ti ɠaazaɠani, é ɠɛ ma: ‹Toɠa ɠale wo luʋa kpain loni ʋɛ, wo la boti ɠɛɛzu?› 7 Ti gooɠaaʋoteni, ti ɠɛ ma: ‹Nu nɔpɛ ge la botii veeni gi ya, gi ʋa kɛ.› É ɠɛni ti ma: ‹Wa ɓalaa, à li nà-kpelei zu.› 8 «Kpɔkɔi zeeliai ma, é ɠɛni ná naavolo makɛ nui ma: ‹Botiɠɛ nuiti toli, è ti-zalaiti fe ti ya, ɗa tɔɔzei nu ɠaaɓelagiti ma, é li ma mɔungiti pɔ.› 9 Zɔiti ti botii lɔɔzeini lɛlɛi lɔɔlusiɛi ma, naati ti ʋaani, ɛsɛ pɛ ge sɔlɔɔ ga wali ɠae ɠilagila. 10 Naa ʋoluma nu mɔungiti ti ʋaani, ti ɗa ɠisiɛ ga ta sɔlɔɔsu ga mɔinga, kɛlɛ tiya ɓalaa ti pɛ ti sɔlɔɔni ga wali ɠae ɠilagila. 11 Siɛgi zu ti ɠɛni wali zosu da, ti ɠɛni ɓɔɛzu unsu ga pɛlɛ kɛɛɠɛi, 12 ti ɗa ɠɛ ma: ‹Wɛlɛ botiɠɛ nu ɠaaɓelagi niiti è ti zeɠeai, naati lɛlɛi ɠila boti nɔ ɠa ti kɛa, tama, è ɗa gi-zalaiti gaa ɠɛ sɔli ga tiye, gɛiti gi luʋa folo ɠelegi wu kpain.› 13 É ti ɠila gooɠaaʋoteni, é ɠɛ ma: ‹Bɔɛ, gè la telebotala vai ɠɛɛni ga ɗe, kɛbɛ de zoloogɛ folo luʋa wotii ma zalai ma ga wali ɠae ɠila, kɛlɛ? 14 Ɗa-walii zeɠe, è li. Nà pɔ ga gè nu ɠaaɓelagi zala ga è ɠɛʋele. 15 Ɓaa màa la nɛɛni mu gè ʋa yiimaɠɛ ga zèaɠɔligi mu ɓaa? Ɓaa tɛi gè faaɓɔɠɔi ɠɛɛzu, naama loloi ɠa è kulazu mu ɓaa?› » 16 Yesu wooɠaaɓelani, é ɠɛ ma: «Ʋele ɠana é la, nu mɔungiti ta ɠɛ ga ma ɠaaɓelagiti, nu ɠaaɓelagiti ti ɠɛ ga ma mɔungiti.» 17 Siɛgi zu é ɠɛni lɛɛzu la Zeluzalɛme, Yesu keela puugɔ maazu felegɔiti (12) seɠeni yɛ pelei zu, ti maaɠelesa ge leʋe, é ɠɛ ti ma: 18 «À woilo, ada lɛɛzu Zeluzalɛme. Nu ná-Doun Zunui ɠa ʋaazu lɔɔzu zalaɠa ɠula ɠundiɠiiti zeezu ta tɔ kalamɔinti. Ta ná-tukpɔi ɠaaleʋe ga é za. 19 Ta dɔ zii ɠiligiti zeezu ga naati ti ɲɛɛɠula su, ti doɠa ga kpakɔi, naa ʋolu ti kpadɔ saa wului ma. Naa pɛ poluma, toɠa wuzeɠe, é ɠula saai ya foloi zaʋasiɛi.» 20 Názuʋɛ, Zeɓedé anzai, ta ná-doun zunu felegɔiti, ti maaɓuɠani Yesu ʋa. É nɔkɔni Yesu ɠɔɠɔwu, nii a kɛ é faaɓɔɠɔ vali ma. 21 Yesu ɠɛni ma: «Ɓɛgele ɠa è pɔ?» É gooɠaaʋoteni, é ɠɛ ma: «Wɛlɛ dòun zunu felegɔiti ba. Ɗa ɠɛna ɗa-masadai zu, va bu kae ga ti zei è ɠoba, gilagi ɠɛ è yeezazuʋɛ, zɔi ɠɛ è ɠɔʋɛzuʋɛ.» 22 Kɛlɛ Yesu gooɠaaʋoteni, é ɠɛ ma: «Wo la kwɛɛ nii wo falizu ɠana. Wa zoo nɛi wo ɓɔɔle ga soolɛi ma ɗaawɔi nii gè ɓɔɔlezu la?» Ti ɠɛni ma: «Eyei, gá zoo naa la.» 23 Yesu zɛba é ɠɛ ti ma: «Gaama ʋe, wa ɓɔɔle ga nà-ziawɔi. Kɛlɛ nii é ga sei wo fai kòba zèezazuʋɛ ta kɔ̀ʋɛzuʋɛ, naama zobo ge la veeni zèa ga gè fe. Naama zeizuʋɛti ta ga naama nuiti tɔnɔ, niiti Kɛ̀ɛ ti makɛgai ti ʋɛ.» 24 Kaladopo puugɔi zɔiti ti naama wooi mɛnigai ma, nii ɠɛɛɠɛloun felegɔiti ti boni, é wanani ti ma. 25 Yesu zɛba é ti pɛ toli ɠoba, é ɠɛ ti ma: «Wo kwɛni nii a ɗa ɠɛ zooiti su: Zou ɠundiɠiiti ta ɗa zei nuɓusɛiti unga, nu ɓiigiti ti ɗa zei ti unga ga ta-zobogi. 26 Wɔun, naa ta mina ɠɛ wo zaama. Kɛlɛ tɔun ni nui ta ɠa pɔ é ɠɛ ga nu ɓii gola wo zaama, kɛni é ɠɛ ga wo pɛ wa-wotiɠɛ nui. 27 Zɔi é pɔ é ɠɛ ga nu mɔungi wo zaama, kɛni naa ɠɛ ga wa-luɔi. 28 Mazɔlɔɔ, anɛɛ Nu ná-Doun Zunui ʋe, é la ʋaani ga nu ʋa botii ɠɛ bɛ, kɛlɛ tɔ ɓɔɠɔi mu paaʋɛ ga é botii ɠɛɛ nuiti bɛ, é zɛnvui ve ga nu mɔinmɔin unmɔɔ saɓui.» 29 Siɛgi zu ti ɠɛni ɠulazu la Zeliko ʋa, bɛbɛ wolai ʋilɛni Yesu ʋolu. 30 Gaazuɠole nu felegɔ ɠɛni zeini pele ɠobaʋɛ. Ti mɛnigai ma ga Yesu ɠa é leʋesu ná ʋelei, ti tɔɔzeini ga kpeei loa, ti ɗa ɠɛ ma: «Màliɠii, Davide ná-Doun Zunui, gi ɠaazumaawɔinɠa!» 31 Bɛbɛi zelii loni ti ma ga ti maaɠɛ kpɔ, kɛlɛ tɔun ti wooɠula sɛsɛ, ti ɗa ɠɛ ma: «Màliɠii, Davide ná-Doun Zunui, gi ɠaazumaawɔinɠa!» 32 Yesu loni, é ti loli, é ɠɛ ti ma: «Lee ɠa wo pɔ ga gè kɛ wo ʋɛ?» 33 Ti gooɠaaʋoteni, ti ɠɛ ma: «Màliɠii, gi-ɠaazuʋɛti ti zeɠe ma.» 34 Ti maawɔin Yesu zoni, é yeevɔɔɠu ti-ɠaazuʋɛti ba. Gaamago nɔ, ti wozaɠaani, ti ʋilɛ polu.