Matthew 20 (YAPE)
1 “Gagiyeg nu tharmiy e bod be’ ni fi’in bangi grape, ni yan nni kakadbul ni be gay e girdi’ ni ngar maruwelgad u fithik’ fa gi grape ni fi’in. 2 Me ta’reban’rad ngay ni nge pi’ puluwrad, nrogon ni yibe pi’ puluwon e girdi’ nra reb e rran ma reb e salpiy nsilber, me pi’rad ngranod ni ngar maruwelgad u fithik’ fa gi grape ni fi’in. 3 Miki yan bayay nga market ko mereb e kolok me guy boch e pumo’on ni yad be sasak’iy u rom ndariy ban’en ni yad be rin’, 4 me ga’ar ngorad, ‘Kum marod ngam maruwelgad u fithik’ fa gi grape ni fi’ig mu gu pi’ puluwmed ni bfel’.’ 5 Ma aram miyad yan. Miki rin’ ni aram rogon ko ragag nge l’agruw e kolok nge ku bayay ko dalip e kolok. 6 Ke chugur ni nge lal e kolok me yan nga market me guy boch e pumo’on ni ka yad be sasak’iy u rom. Me fithrad ni ga’ar, ‘Mangfan ni gimed be adbey e bin daba’ e rran u roy ndamur rin’ed ban’en?’ 7 Miyad fulweg ngak ni lungurad, ‘Bochan e dariy be’ nike pi’ e maruwel ngomad.’ Me yog ngorad ni ga’ar, ‘Ere kum marod ngam maruwelgad u fithik’ fa gi grape ni fi’ig.’ 8 “Ma fa’ani neap’ me yog fa en nsuwon fa gi grape ngak e en ni pilungen girdi’en e maruwel rok ni ga’ar, ‘Mpining fapi girdi’en e maruwel ngam pi’ puluwrad, ni ngam tabab ko pi’in nni pi’ e maruwel ngorad u tomur, ma ga yan mu thang ngak e pi’in yad e som’on nni pi’ e maruwel ngorad.’ 9 Fapi pumo’on nra tababgad ko maruwel ko lal e kolok e ra bagayad min pi’ ta’reb e salpiy nsilber ngak. 10 Ere fa’ani yib fapi pumo’on ni yad e som’on nni pi’ e maruwel ngorad ni ngan pi’ puluwrad miyad finey ni bay ni pi’ puluwrad ni bo’or; machane ku er rogorad nra bagayad ma ta’reb e salpiy nsilber nni pi’ ngak. 11 Miyad fek e salpiy rorad miyad gun’gun’nag e en ni pi’ e maruwel ngorad ni yad be togopluw ngak, 12 ni be lungurad, ‘Pi pumo’on ni ba’aray nni pi’ e maruwel ngorad u tomur e ta’reb e awa nra maruwelgad, ma gamad e polo’ e rran ni gu maruwelgad u tarama’en e yal’ nib gel — machane kam pi’ puluwrad nta’reb rogon nga puluwmad!’ 13 Fa’anem nib mul suwon fa gi grape ngak e fulweg ngak bagayad ni ga’ar, ‘Fager, mu tiyilim ngog, dawor gu ban nigem. I ta’reban’dow ngay faram ni ngam maruwel nreb e rran ma ta’reb e salpiy nsilber puluwom. 14 Ere mfek puluwom e chiney ngam man nga tafnam. Re mo’on ney ni ir e tomur nni pi’ e maruwel ngak e gub adag ni nggu pi’ puluwon nta’reb rogon nga puluwom ni kug pi’. 15 Gathi bay mat’wug ni nggu rin’ e tin ni gub adag ko salpiy rog? Fa ke awan’um ni bochan e gub gol?’ ” 16 Me ul ul Jesus ngay nge ga’ar, “Ere pi’in yad ba tomur e bay ra m’onod, ma pi’in yad mm’on, e bay ra tomurgad.” 17 Nap’an ni be yan Jesus nga Jerusalem me fek fa ragag nge l’agruw i gachalpen nga orel nge non ngorad ni go’ yad, ma yad be yan. 18 I ga’ar ngorad, “Mu telmed ngog, gadad be yan nga Jerusalem, ni ir e bay ni pi’ e en ni Fak e Girdi’ riy ngak e pi tolang ko prist nge pi tamchib ko Motochiyel, ni yad e bay ra turguyed ni ngan li’ ngem’, 19 miyad pi’ ngak e pi’in gathi yad piyu Israel, ni yad e bay ra moninggad ngak, miyad toy ko dumow, miyad richibiy ko kuruth; ma chirofen nra gaman e dalip fen ngay e bay ni faseg ko yam’.” 20 Me yib e chitiningin fa gali cha’ ni fak Zebede ngak Jesus ni yad fa gali cha’ ni fak me siro’ ngak Jesus, me wenignag ban’en ngak Jesus ni nge ayuweg riy. 21 Me fith Jesus ngak ni ga’ar, “Mang e gab adag ni nggu rin’ ngom?”Me fulweg ni ga’ar, “Gub adag ni ngamog ni nge par e gal pagel rog ney nga but’ u to’obem, ni bagayow nga ba’ ni mat’aw rom ma bagayow nga ba’ ni gilay’ rom ko ngiyal’ ni gur e kam mang pilung riy.” 22 Me fulweg Jesus ngorow ni ga’ar, “Da mu nangew e n’en ni gimew be wenignag. Rayag romew ni ngam unumew e n’en ni bay ko fare kap nike chugur ni nggu unum?”Miyow fulweg ni lungurow, “Rayag romew.” 23 Me yog Jesus ngorow ni ga’ar, “Ri bay mu unumew e n’en ni bay ko kap rog, machane dariy mat’wug ni nggu duwgiliy e en nge par nga ba’ ni mat’aw nge en ni nge par nga ba’ ni gilay’ rog. Ya gali yang i n’ey e tagil’ e gali cha’ nike ngongliy e Chitamag rogon ni ngar tagil’iyew.” 24 Ma fa’ani rung’ag fa ragag nem i gachalpen Jesus murung’agen e ren’ey miyad damumuw ngak fa gali walag. 25 Me piningrad Jesus ngar mu’ulunggad ngak ni yad gubin me ga’ar ngorad, “Gimed manang ni pi pilung e ba ga’ lungurad u puluwon e girdi’, ma pi’in yad be yog e thin rorad e yad be gagiyeg nagrad. 26 Machane gimed e gathi ireram rogon e n’en ni ngam rin’ed. Fa’anra ba’adag bigimed ni nge mang ir e ba tolang, ma ir e thangri mang tapigpig romed ni gimed gubin; 27 ma fa’anra ba’adag bigimed ni ir e nge m’on, me ir e thangri mang sib romed 28 ni bod e en ni Fak e Girdi’ nde yib ni ngan pigpig ngak, machane yib ni nge pigpig me pi’ e pogofan rok nge biyuliy bo’or e girdi’ ngay.” 29 Ma nap’an nra chuwgad u Jeriko me lek e girdi’ ni pire’ ni pire’ Jesus. 30 Ma bay l’agruw i pumo’on ni kar pirew nga but’ u to’oben e kanawo’, miyow rung’ag ni bay yib Jesus u rom, miyow tabab ko pong ni ba ga’ lamrow ni be lungurow, “Fak David! Mu runguymow!” 31 Me puwan’ fapi girdi’ ni pire’ ngorow miyad yog ngorow ni ngar th’abew gulungrow. Machane fin aram e ur tolul nigew ni kari ga’ lamrow ni be lungurow, “Fak David! Mu runguymow!” 32 Me tal Jesus nge piningrow. Me fithrow ni ga’ar, “Mang e gimew ba’adag ni nggu rin’ ngomew?” 33 Miyow fulweg ngak ni lungurow, “Somol, gamow ba’adag ni ngam chuweg e malmit romow!” 34 Me kireban’ Jesus ngorow me math nga owcherow; ma ka chingiyal’ nem me yag ni ngar guyew ban’en, miyow un ngak.