Matthew 26 (TOMA)
1 Yesu ɓegai ma ga kalagi naati pɛ bo, é ɠɛni ná-kaladopoiti ma: 2 «Wo suɠwɛɛni ga folo felegɔ ʋoluma, Pake|Pakegi fɛtii ɠa ɠulazu, tama názu ɠa ti ʋaazu Nu ná-Doun Zunui lɔɔzu la nuiti zeezu, ti kpadɔ saa wului ma.» 3 Zalaɠa ɠula ɠundiɠiiti ta nuɓusɛiti ta-lotuɠɔiti ti zɛba ti ɠaalɛ ba zalaɠa ɠula ɠundiɠi wolai Kayife ná-koizuʋɛ. 4 Ti pɛ ti zolooni ma ga ti keleɠele ɠaiziɛ ga ti Yesu zo dɔɔɠuzu, ti paa. 5 Kɛlɛ ti ɠɛni ɓɔɠɔ ma: «Kɛni ade mina kɛ fɛtii zu, nii a kɛ ade mina wutu teʋe bɛbɛi zaama.» 6 Yesu ɠɛni Ɓetani, gee nu wɔlɔmai Simon ná-pɛlɛi wu. 7 Anzanui ta maaɓuɠani ba, goolei ɠɛni zoni zea, kpɛtɛai ga aaleɓatelegi, daavegai ga gulɔ maku nɛɛnɛgi, nii sɔngɔi wola ɓaai. Siɛgi zu Yesu ɠɛni la daamii wosu, anzanui gulɔ maku nɛɛnɛgi ʋuuni nɔungi zu. 8 Kaladopoiti ti miná ɠaai ma, ti yiiɠaawanani ga gola, ti ɗa ɠɛ ma: «Niima vaa zuɠoloɠolo ka lee? 9 Nu a la zoo gulɔ maku nɛɛnɛgi nuu ʋɔdizu ga sɔngɔ wola, ma walii ve bala nuiti zea.» 10 Kɛlɛ Yesu naama vai ɠwɛɛgai ma, é ɠɛ ti ma: «Lee vaa zu wo anzanui nii ɓɔlɔzu? Faa ʋapa gola ɠa é kɛa bɛ̀. 11 Bala nuiti ta wo ʋa yeenɔpɛ, kɛlɛ nɔ̀un gè la ʋaazu yɛsu wo ʋa yeenɔpɛ. 12 É gulɔ maku nɛɛnɛgi nii ʋua kɔ̀lɔgi ma, nii a kɛ é màaɠulu vai ɠɛʋele ɓɛtɛ. 13 Gè bo wo ma ga gaamai, ʋɛ nɔpɛ niima Woo Niinɛ Ʋagɔi laazeelizu ná eteai zu ná pɛ, nii ɓalaa anzanui nii kɛai, naa laa ɠa zeeli, é ɠɛ ga ɠizɛsui ná-faa zu.» 14 Naama ziɛgi zu, keela puugɔ maazu felegɔi (12) ɠila, nii daaseigi ɠɛni ga Zudase Isekaliyɔte, naa liini zalaɠa ɠula ɠundiɠiiti pɔ bɛ, 15 é ɠɛ ti ma: «Ni nà Yesu lɔɔna wo yeezu, wali lielegɔ ɠa wa fe zèa?» Ti wali ɠae ʋuusaʋagɔ (30) veeni zea. 16 É zo niina naama ziɛgi zu ma, é ɠɛni yeeɠɛɠala ʋagɔ ɠaiziɛzu ga é Yesu lɔ ti yeezu. 17 Ɓului nii lɛʋɛ la su, naama vɛtii ma volo mɔungi, Yesu ná-kaladopoiti ti ʋaani, ti ɠɛ ma: «Mini ɠa è pɔ ga gi Pake|Pakegi daamii ɠɛʋele ɓɛtɛ ná è ʋɛ?» 18 Yesu ti wooɠaaʋoteni, é ɠɛ ma: «À li taazuʋɛ, zunui inkɛ ʋɔ bɛ, wo ɠɛ ma: ‹Kalamɔn ɠɛ: Nà-yeeɠɛɠalai zeelia, è ʋɔ bɛ ɠa gè Pake fɛtii ɠulazu ná, gá nà-kaladopoiti.› » 19 Kaladopoiti ti naa ɠɛɛni, nii Yesu ti leveni ma. Ti Pake daamii ɠɛʋele ɓɛtɛni. 20 Kpɔkɔi zeeliai ma, Yesu zeini daami laɓalii ɠakala ta keela puugɔ maazu felegɔiti (12). 21 Siɛgi zu ti ɠɛni daamii wosu da, é ɠɛni ti ma: «Gè bo wo ma ga gaamai, wo ɠila ka ʋaazu tèʋesu sìli nuiti pɔ.» 22 Naama wooi kaladopoiti gola yiiɓɔlɔni. Ti ɠɛni gaazaɠasu ga seɠezeɠedai, ti ɗa ɠɛ ma: «Nà ʋe mu ɓaa, Màliɠii?» 23 É ti wooɠaaʋoteni, é ɠɛ ti ma: «Zɔi gi yeelɔai ɓɔni ɠilagi zu gá tɔ, naama nui ɠa é ʋaazu dɔ̀ɔzu sìli nuiti zeezu. 24 Nu ná-Doun Zunui ɠa za, eɠɛʋelei sɛʋɛai la GALA sɛʋɛiti su, é lo tɔun ba. Kɛlɛ maanɔɠɔi ɠa naama nui luɠɔ, nii é ʋaazu Nu ná-Doun Zunui lɔɔzu sili nuiti zeezu. A la vizɔ ma nui ma ga é mina vɔlɔ zɔlɔɔ pɛ.» 25 Zudase nii é ɠɛni yaavazu, naa ɓalaa gaazaɠani, é ɠɛ ma: «Kalamɔn, nà ʋe mu ɓaa?» Yesu gooɠaaʋoteni, é ɠɛ ma: «Ɗa ɓɔɠɔi è boga.» 26 Siɛgi zu ti ɠɛni daamii wosu da, Yesu ɓului zeɠeni. Kpegai ma ga mama fee ƓALA falii wo, é galeɠaleni, é fe kaladopoiti zea, é ɠɛ ma: «À seɠe, wo mi, nii ɠa é ga kpùsɛi.» 27 Naa ʋoluma, é ziawɔi ta zeɠeni. Kpegai ma ga mamagi ve GALA bɛ, é feeni ti ya, é ɠɛ ma: «Wo pɛ à ɓɔɔle ga nii. 28 Nii ɠa é ga mà ɲamai, nii é minazeɠegi laazeelizu. Tɔ ɠa puai nu mɔinmɔin bɛ, nii a kɛ ta-ɠotoiti suvaayɛ ti ʋɛ. 29 Gè bo wo ma, gè la mɔ ansaɠɔ gwaai ma ɗɛi nii ta ɓɔlea pɛ, eyɛsu foloi ada kpɔle la ʋɔɔma ga niinɛ, Kɛ̀ɛ ná-masadai zu.» 30 Ti ɓegai ma ga guyei loo, ti ɠulani, ti li Wolive wulu ɓelei ma ɠizei ma. 31 Yesu zɛba é ɠɛ ti ma: «Za ɓidii wo pɛ wa ʋaazu ɠɛlɛzu bà tɔɔzei nii ʋa é ʋaazu ɠɛɛzu ga ze, mazɔlɔɔ sɛʋɛʋɛ GALA Sɛʋɛi zu ga: ‹Nà ʋaazu baala makɛ nui loɠazu, naazu baala kpulugi zu ɠa vaza.› 32 Kɛlɛ siɛgi zu gè wuzeɠezu la, gè ɠula saai ya, nà tosu da wo luɠɔ Galilé yooi zu.» 33 Piyɛlɛ kpɔɛi zeɠeni, é ɠɛ ma: «Anɛɛ ni zɔiti pɛ ta ɠɛlɛzu è ʋa, tɔɔzei nii ʋa é ʋaazu ɠɛɛzu ga ɗe, nɔ̀un gè la ɠɛlɛa è ʋa pɛ.» 34 Yesu ɠɛni ma: «Gè bo è ma ga gaamai, za kpidii nɔ, tɛɛ zinɛi ʋa ɠɛ é ɓɔɛ, ɗa ʋaazu ɠɛlɛzu bà ná zeizu ɠɛ saʋa.» 35 Piyɛlɛ ɠɛni ma ʋolu: «Anɛɛ ɓalaa da zaazu ʋɔɔma, naa ɠa ɠɛ, kɛlɛ gè la ɠɛlɛa è ʋa pɛ.» Kaladopoi zɔiti ɓalaa ti lɛɛni ga naama woo ɠilagi nɔ. 36 Naa ʋoluma, Yesu ta ná-kaladopoiti ti zeelini adaʋɛ ta, ʋɛ ná laaseigi ga Gɛtɛsemane. É ɠɛni ti ma: «À zei ʋɛ, siɛgi zu nɔ̀un gè liizu la munu, gè GALA fali.» 37 É zɛba é Piyɛlɛ zeɠe ta Zeɓedé ná-doun zunu felegɔiti. Naama ziɛgi zu, é tɔɔzeini ga é lɔ gaazuɠili wolai zu, ziiɓɔlɔ wolai ʋili ma. 38 É ɠɛni ti ma: «Ziiɓɔlɔi ʋooʋa zìimaʋɛ ma, eyɛsu é ɠɛ é pàa. À yɛ ʋɛ, ade ɠaazuɓa ʋɔɔma.» 39 É lago liini fɔɛn luɠɔ, é laaʋɛ zooi ma, é GALA fali ɠani, é ɠɛ ma: «Ee, Kɛ̀ɛ, ni toɠa zoo ɠɛɛzu, soolɛi ma ɗaawɔi nii maaɠooza bà. Kɛlɛ anɛɛ naa ʋe, zìima vai mina ɠɛ, kɛni ɗɔnɔi nɔ.» 40 É ɠaleni ma kaladopoiti pɔ bɛ, é ti ɠa ɲiizu. É ɠɛni Piyɛlɛ ma: «Deɠɛmu wo la zooni, wo ʋa yɛ bà, ade ʋa ɠaazuɓa ʋɔɔma lɛlɛ ɠila daawu! 41 À ɠaazuɓa, wo GALA fali, wo mina ʋa loozu tɛgai zu. Nui yɛnvui laavegɛ ga kisiɛ ʋagɔiti, kɛlɛ zɛbɛ la kpusɛi ʋa.» 42 Naa ʋoluma, é maaɠoozani ti ʋa siɛ laa velesiɛi zu, é GALA fali, é ɠɛ ma: «Ee, Kɛ̀ɛ, ni ziawɔi nii la zooga maaɠoozazu bà, kɛni gè ɓɔɔle la, zèe ɠa bu, è-yiimai nɔ ɠɛ.» 43 É ɠaleni ma ʋolu, é kaladopoiti ka ɲiizu, tɔɔzei ɲiimɛnii ɓɔini ti la ga gola. 44 É zɛba é ti yɛ ná, é maaɠooza ti ʋa mɔnɔ, é GALA fali siɛ laa zaʋasiɛi zu, é ɗa lɛ woo ɠilagi nɔ ma. 45 Siɛgi zu é ɠaleni ma la, é ʋa ná-kaladopoiti pɔ bɛ, é ɠɛni ti ma: «Wa dɛ ɲiizu, wo ɗa looɠo? Yeeɠɛɠalai zeelia, Nu ná-Doun Zunui ɠana ʋa lɔɔzu kotoba nuiti zeezu. 46 À wuzeɠe, ade li. Zɔi é yàavazu, wɛlɛ ba, é ʋaazu.» 47 Yesu ɠɛni dɛ ɓɔɛzu, eyɛsu Zudase ɗa unkula, nii é ɠɛni ga keela puugɔ maazu felegɔi (12) ɠila. Bɛbɛ wolai ɠɛni polu, boɠa zɔkpɔiti ta kpekpe kpuɠaiti ti zoni ti ya. Zalaɠa ɠula ɠundiɠiiti ta nuɓusɛiti ta-lotuɠɔiti ka ti bɛbɛi naa leʋeni. 48 Yaava nui Zudase poo gila dɛɛni ga tiye, é ɠɛ ti ma: «Zɔi nɔpɛ gè nɛɛnɛzu, gè laaʋɛ komaga, tɔ ɠana, à so.» 49 Naa ɠa é kɛɛni, é sakpani nɔ Yesu ma, é ɠɛ ma: «Kalamɔn, ɗa ná!» É nɛɛnɛni ga daaʋɛ komagai. 50 Yesu ɠɛni ma: «Bɔ̀ɛ, nii è ʋaai kɛɛzu, naa ɠɛ!» Naa ʋoluma, zɔiti ti maaɓuɠani, ti yeeʋɛɛ Yesu ma, ti so. 51 Naama ziɛgi zu, Yesu ná-siɛpoluiti gila ge ná-boɠa zɔkpɔi ɠulani ma laɠagi zu, é pili zalaɠa ɠula ɠundiɠi wolai ná-duɔi ma, é naa woii leʋe ba. 52 Yesu ɠɛni ma: «Ɗa-woɠa zɔkpɔi lɔ ma laɠagi zu, tɔɔzei zɔiti kpein ti kɔɔi ɠɔɔzu ga boɠa zɔkpɔi, ti undaa ɠa ʋili ga boɠa zɔkpɔi. 53 Ɗa kaazu ga gè la ɓena zoo gè ʋa wooɠula Kɛ̀ɛ ma ɓaa? A la zoo ɠani nɔ é geezuɠeelai ma waa mɔinmɔin teʋe, ti ʋa, ti ɓɔ bà. 54 Kɛlɛ naazu GALA Sɛʋɛi zu wooiti daa ɠa zeeli ɠale? Tɔɔzei é bogɛ ga ʋele ɠa faiti maanɛai ga ti ɠɛɛ la.» 55 Yesu zɛba é ɠɛ bɛbɛi ma: «Wo ʋaaʋɛ nɔ̀un so fai zu ga boɠa zɔkpɔiti ta kpekpe kpuɠaiti, eɠɛ toosu nu zo faa? Folo-o-folo gè ɠɛa ɠɛɛzu zeini GALA sei ʋɛlɛi ma ɠoizuʋɛ, gè ɗa nà-kalagi ve, wo la sòni názu. 56 Kɛlɛ niima vaiti pɛ kɛɛʋɛ, naa ɠa a kɛ GALA goo wo nuiti ta-zɛʋɛiti su wooiti daazeeli.» Naa ʋoluma, kaladopoiti pɛ ti zeɠeni koba, ti ʋela. 57 Zɔiti ti Yesu zoni, ti liini la zalaɠa ɠula ɠundiɠi wolai Kayife ná-koizuʋɛ, ʋɛ tɔ kalamɔinti ta totuɠɔiti ti ɠaalɛɛni ba ná. 58 Piyɛlɛ ʋilɛni polu ɠoozama, eyɛsu ti zeeli zalaɠa ɠula ɠundiɠi wolai ná-koizuʋɛ. É lɔɔni koizuʋɛ, é zei salaʋusuiti koba, nii a kɛ é kwɛɛ, ʋelei naama vai ɠaaɓelazu la. 59 Zalaɠa ɠula ɠundiɠiiti ta tukpɔɠaaleʋe nu wolaiti ti ɠɛni zɛɛ zeeleiti gaiziɛzu Yesu laalɔɠɔma, nii a kɛ ti tukpɔɠaaleʋe ga é za. 60 Kɛlɛ ti la ɠɛni zeele zɔlɔɔsu, anɛɛ ɓalaa zɛɛ zeele mɔinmɔin ge ʋaani, ti ɗa ɓɔɠɔ lɛ. Gaaɓelasu, felegɔ ʋaani, ti ɠɛ ma: 61 «Nii ɠa kɛai ma: ‹Nà zoo gè GALA sei ʋɛlɛi ɠolo, gè lati, gè to ʋolu folo saʋagɔ laawu.› » 62 Zalaɠa ɠula ɠundiɠi wolai wuzeɠeni, é ɠɛ ma: «È la nuu tanɔpɛ gaaʋotesu, nii niima nuiti ti bosu è laalɔɠɔma?» 63 Kɛlɛ Yesu maaɠɛni kpɔ. Zalaɠa ɠula ɠundiɠi wolai ɠɛni Yesu ma ʋolu: «Nà è ɠaazaɠasu zɛnvu su ƓALAGI laaseigi zu, ga è gaamai wo gi ma, ni ɗa ɠa è ga Kilista, GALA Doun Zunui.» 64 Yesu gooɠaaʋoteni, é ɠɛ ma: «È boga ɗa ɓɔɠɔi. Kɛlɛ nà bosu wo ma, é ɓudɛ naa maazu, é zo niima ziɛgi ma, wa ʋaazu Nu ná-Doun Zunui ɠaazu, é zeini Zɛbɛi-Pɛ-Maliɠii yeezazuʋɛ, é ɗa ʋa geeɠɔlɔgi ma lonaɓiingiti maazu.» 65 Zalaɠa ɠula ɠundiɠi wolai zɛba é ɠɔba zeɠeiti baliʋali ga, kidaaʋiligi maaʋele ma, é ɠɛ ma: «É woo ɲɔiti boga GALA daalɔɠɔma, zeele ɓɛgele ɠa ade ɓɛdɛi ba niina? Wo woo ɲɔi nii mɛnigai na! 66 Wa ɠisiɛzu ɠale?» Ti gooɠaaʋoteni, ti ɠɛ ma: «Maanɛɛʋɛ ga é za.» 67 Naazu ti laaɗɛi ʋilini gaazu, ti ɗa doɠa. Tanigaa ti ɠɛni goizuloɠazu, 68 ti ɗa ɠɛ ma: «Ɓɛ ɠa é è loɠaai? Naama nui lɛ ga giye, ɗɛi è ga Kilista!» 69 Naama ziɛgi zu, Piyɛlɛ yɛni zeini eteaʋɛ, koi zaamaʋɛ. Botiɠɛ anzanui ta maaɓuɠani ba, é ɠɛ ma: «Ɗa ɓalaa, è ɠɛni Galilé nui Yesu ʋa.» 70 Kɛlɛ Piyɛlɛ zeɠeni ga ɛsɛ pɛ gaazu, é ɠɛ ma: «Nii mu è bosu, gè la vɔlɔ gaaɠaazu.» 71 Tɛi é liini ga nu lɛɛzu ʋelei, botiɠɛ anzanui taɠili ge kaani, é ɠɛ zɔiti ma, niiti ti ɠɛni ná: «Zunui nii ɠɛni Nazalɛte nui Yesu ʋa.» 72 É zeɠeni ga ʋolu, é ɠona vɔlɔ, é ɠɛ ma: «Gè la zunui nii ɠwɛɛ pa!» 73 Ná tago kɛai ma, zɔiti ti ɠɛni loni koizuʋɛ, naati ti maaɓuɠani Piyɛlɛ ʋa, ti ɠɛ ma: «Gaamazu, ɗa ɓalaa ɗa ga niima nuiti ti ta, nu ɠa naa ɠwɛɛsu è ɓɔɛ wooi nɔ ʋa.» 74 Piyɛlɛ zɛba é ɠɛ ma: «Gè ɠonaa, GALA ge dòɠa, ni zɛɛ ɠa gè bosu, gè la zunui nii ɠwɛɛ pa!» Gaamago nɔ, tɛɛ zinɛi ɓɔɛni. 75 Piyɛlɛ ɠigi looni naama wooi zu, nii Yesu boni ma ga: «Tɛɛ zinɛi ʋa ɠɛ é ɓɔɛ, ɗa ʋaazu ɠɛlɛzu bà ná zeizu ɠɛ saʋa.» É ɠulani, é wɔlɔ ga gola.