Proverbs 1 (TOMA)

1 Salomɔn é ɠɛni ga Davide ná-doun zunui, ta Izilayɛle masagi, naa ná-tɛnɛ faalaaliiti: 2 Ti ɠɛ ungi ɠa ga ti nu ɠala ga ɠimalai, ti nu ɠɛʋele ɓɛtɛ,é kpɔɛiti gaaɠa, niiti ti woni ga keleɠelegi. 3 Ti nui ɠala ga siɛ ʋelei ná-eteai zu, keleɠelegi ʋɔ,é lelebo, é zɔle, é zoloo su. 4 Ti ɠi pagɔi ve naati zea, niiti ti la dɛ faa mɔinmɔin kwɛni,ti faaɠwɛgi ta kidafaawui ve zunu loungoiti zea. 5 Ɠima nui woilo, toɠa ta ɓɔ ná-soofaalai ʋa,zɔi keleɠelegai, naa ɠa ziɛ ʋele ʋagɔi zɔlɔɔ. 6 Ta zoo ti tɛnɛ faalaalii ma lɔɔɠuzu vai tanigaani kwɛɛ,ta ɠima nuiti daawooiti ma lɔɔɠuzu vaiti poluʋɛti. 7 Ɠɔoɠɔ GALAGI ɠaazuluabai ɠa é ga faaɠwɛgi lɔɔzeizuʋɛ,faaɠaaɠalala nui ɠa ɗa ɠimalai ʋɛlɛʋɛlɛ ta kalagi. 8 Dòun zunu, woilo, è dama ga faaɠwɛgi, è sɔlɔɔsu è-ɠɛɛ ya,mina è-lee ná-tɛnɛ gooiti da ɠoba. 9 Mazɔlɔɔ ta ɠɛ ga masa bɔɔlɔ pagɔi è unba,ta ɠɛ ga kɔbu ani ʋagɔi è ɠɔbu. 10 Dòun zunu, ni faa ɲɔu ɠɛ nuiti ta pɔ, ti è ɠaazulɛ,mina yeezei bu. 11 Ta ɠɛna ma: «Ʋilɛ gi ʋolu!Ade li de nuiti teʋesuʋɛ maaɓɔun, de ta ʋaa,de laalɛ nui ta wu lein nɔ, anɛɛ ni é la faa ɠaazani. 12 De ti-ma vului ɓɔle, eɠɛʋelei gɔvɛalaazu a ɗa kɛ la,ti ɲɛɛlɛ ɲɛgɛlɛin ga naati kɛʋele, niiti ti yeizu kabai zu. 13 Ade ti-ɠɔli pagɔiti seɠe,de da-ʋɛlɛiti buulaave da. 14 Ɗa ɗɔnɔ zɔlɔɔsu gi ʋɔ,ada ɓɔsu wali ɓɔlɔ ɠilagi ma ade pɛ!» 15 Dòun zunu, mina ʋilɛ ti ʋolu, è ʋa ziɛ ga ta-ʋelei,maaɠooza ta-ʋelei ʋa. 16 Mazɔlɔɔ ti-ɠɔɠɔiti suvilɛʋɛ faa ɲɔu ɠɛɛ vai zu,ti zuvilɛʋɛ ɲamai ʋuu zu. 17 Mazɔlɔɔ toɠa ga fuun faa,wɔnii ɗa tumɔi ɠa, é ɗa zei tuɠɔ. 18 Kɛlɛ tiya ɓɔɠɔi ɠa ti yaavai zeizu ɓɔɠɔ luɠɔ,tiya ɓɔɠɔi ti-yɛnvui ɠa ti balii laazu tuɠɔ. 19 Zekana naati gaaɓelazuʋɛ la,niiti ti ta-ɓɛtɛi wosu ga kakama vaiti su,tɔnɔ ɲɔi ɠa ɗa sɔlɔɔ nui undaaʋili. 20 Ɠimalai ɠa kpeei loozu taazuʋɛ peleiti su,toɠa wooɠulazu maaɓɔ bosuʋɛti. 21 É toligi wo maaɓɔ bosuʋɛ,é ná-keela wooi wo taa loaʋɛ, é ɠɛ ma: 22 «Ɠimalala nuiti, wa ɠimalala vaiti nɛɛzu ʋɛ, eyɛsu yeelɛ?Ɲɛɛɠulasu nuiti, wo-yiimai ɠa ɠɛɛzu ga ɲɛɛɠulasui, eyɛsu yeelɛ?Faaɠaaɠalala nuiti, wa yɛsu faaɠwɛgi wɔinzeɠezu, eyɛsu yeelɛ? 23 À woilo nà-tɛnɛ gooiti ma!Wɛlɛ nà nà-keleɠelegi ve wo ya,nà dàawooiti dɛɛ ga woye. 24 Tɔɔzei gè wo lolini, wo ɠɛlɛ,tɔɔzei gè yeeleteni, nu nɔpɛ ge la ma wɛlɛ woni, 25 wo nà-tɛnɛ gooiti kpein pilini ya,wo la vaani nà-zelilomaiti bu, 26 naa ɠa é ba, nà ɓalaagi, nà wo ɲɛɛ, siɛgi zu maanɔɠɔi ʋaazu wo ʋɔ,nà ɲɛɛɠula wo zu, siɛgi zu kidaaʋiligi zeelizu la wo ma, 27 siɛgi zu kidaaʋiligi ʋaazu la wo ʋɔ, eɠɛ fiilɛ wolai,siɛgi zu maanɔɠɔi zeelizu la wo ma, eɠɛ tɔngɔlɔ fiilɛi,siɛgi zu koozuʋiligi ta kidaaʋiligi ʋaazu la wo ʋɔ. 28 Naazu, ta wooɠula mà, gè la ti wooɠaaʋotega,ta gàiziɛ, ti la kàa. 29 Toɠa ɠɛ ɠana, tɔɔzei ti faaɠwɛgi wɔinzeɠeʋɛ,ti la yiimazeɠeni ga Ɠɔoɠɔ GALAGI ɠaazuluabai, 30 tɔɔzei ti la vaani nà-tɛnɛ gooiti bu,ti laaɓɛɛluni ga nà-zelilomaiti, 31 ti-ziɛ ʋelei ma lɔnɔgi ɠa a ɠɛ ga ti-ɠɔnɔgi,ti ɓɔɠɔ lɛnɛ gooiti ta ɠɛ ga ti-laamianigi, eyɛsu mɔtai yɛ. 32 Mazɔlɔɔ ɠimalala nui ná-kakagi ɠa ɗa paa,faaɠaaɠalala nui ná-ziizoolɛlalai ga ɓɔɠɔ, naa ɠa a ɗa too ya. 33 Kɛlɛ zɔi a woilo gòoi ma, naa ɠa zei gaanɛɛi zu,é ná-eteai ziɛ ziilɛigi zu, é la luaa maanɔɠɔi ʋa.»

Proverbs 1 (TOMA)

In Other Versions