Revelation 3 (TOMA)

1 «Sɛʋɛi ɠɛ, è teʋe Saalede Egilisii ná-geezuɠeelai ma: ‹Wɛlɛ, zɔi GALA ná-zɛnvu lɔfelaiti ti zea, ta somideɠa lɔfelaiti, naa ɠa é nii wosu:« ‹Gè è-ziɛ ʋeleiti kwɛɛ. È-lɔɠɔi ɠulaʋɛ ga ɗa vulua, kɛlɛ è zaaʋɛ. 2 Wɛlɛi wo, è naati sɛbɛlɔ, niiti ti ɠɛɛzu ti ʋa za, mazɔlɔɔ gè kaaʋɛ ga è-ziɛ ʋeleiti daa la zeelini ga pagɔ nà-GALAGI ɠaazu. 3 Ɠizɛ naa zu, ʋelei è Wooi mɛnini da, è sɔlɔɔ. Ɠolo naama ɠalagi ʋɛ, è è-ziɛ ʋelei maavalibo. Ni è la wɛlɛni ɓɔɠɔ ma, nà ʋaazu eɠɛ unma nui, è la kwɛɛ ga yeeɠɛɠalai gè ʋaazu la ɲɛgɛlɛin, gè ɠula è viliba. 4 Anɛɛ naa ʋe, ɗa-nui tanigaa ta è ʋɔ bɛ Saalede, ti la ta-zeɠeiti kɔzɔni. Gá tiyani gá ziɛ ʋɔɔma, ti maaɠiliai ga seɠe ɠolegi, tɔɔzei ti zoloogɛ. 5 « ‹Zɔi a pilɛ sɔlɔɔ, naa ɠa seɠe ɠolegiti too ɠɔba ɠana, gè la daaseigi ɠaaʋaa pɛ, gè ʋa kula zɛnvu zɛʋɛi zu. Nà daaseigi wo Kɛ̀ɛ ɠaazu ta ná-geezuɠeelaiti. 6 « ‹Zɔi nɔpɛ goiyeɠe ba, naama nui naa mɛni, nii GALA Zɛnvui bosu Egilisiiti ma.› 7 «Sɛʋɛi ɠɛ, è teʋe Filadɛlɛfi Egilisii ná-geezuɠeelai ma: ‹Wɛlɛ, zɔi ɲadegai, gaamai, masagi Davide ná-kpaɠui zea, zɔi a daalaona, nu nɔpɛ ge la daaɠuluga, a daaɠuluna, nu nɔpɛ ge la daalaoga, naa ɠa é nii wosu: 8 « ‹Gè è-ziɛ ʋeleiti kwɛɛ. Gè kwɛni ga zɛbɛ wola la è ya, kɛlɛ anɛɛ naa ʋe, è ɠoloʋɛ dàawooi ʋɛ, è ɠɛ bɛ̀ ga wooɠɛɠila nu. Wɛlɛ, gè daalaogai yɛgɛ è luɠɔ, nu nɔpɛ ge la zooga é ʋa daaɠulu. 9 Pɛtɛ, nà naati feezu è ya, niiti ti ga Setana lɛbi ʋɛlɛi ma nuɓusɛiti, ti ɠɛɛzu ɓɔɠɔ ma Zuifuiti, kɛlɛ Zuifu la ga tiye, mazɔlɔɔ zɛɛi ɠa ti bosu. Wɛlɛ, nà ʋaazu ga tiye, ti nɔkɔ è ɠɔɠɔwu, ta kwɛɛ ga gè è nɛɛʋɛ ʋɛ. 10 Tɔɔzei è ziɛni ga nà-devei, è ɠɛ ga ziilɔɔ nu, nà ɓalaagi nà è makɛ maanɔɠɔi ma ziɛgi zu, é ʋaazu zeizu eteai pɛ ma, é ɠɛ ga suɠɔɠɔgi etea nuɓusɛiti pɛ bɛ. 11 Nà ʋaazu fala. Nii é è ya, naa zo kpaan, naa ɠa a kɛ, nu nɔpɛ ge mina ɗa-zobo sɔlɔɔ fai ma zalai ɠula è ya. 12 « ‹Zɔi a pilɛ sɔlɔɔ, nà naa ɠɛ ga kpɛdɛgi nà-GALA sei ʋɛlɛi wu, é la ɠula ná eyɛsu pɛ. Nà nà-GALAGI laaseigi zɛʋɛ maaʋɛ, ta nà-GALAGI ná-taai laaseigi, Zeluzalɛme niinɛi, é ʋaazu yeizu, é zeɠe geezuʋɛ, nà-GALAGI ʋɔ bɛ. Nà dàasei niinɛi ɓalaa zɛʋɛ maaʋɛ. 13 « ‹Zɔi nɔpɛ goiyeɠe ba, naama nui naa mɛni, nii GALA Zɛnvui bosu Egilisiiti ma.› 14 «Sɛʋɛi ɠɛ, è teʋe Laodisé Egilisii ná-geezuɠeelai ma: ‹Wɛlɛ, zɔi é ga Amina, wooɠɛɠila zeelei, nii é gaamai wosu, GALA ná-kpɛtɛanii kpein ma ungi, naa ɠa é nii wosu: 15 « ‹Gè è-ziɛ ʋeleiti kwɛɛ. Gè kwɛni ga è la lɛini, è la vilɛni. Ni tama è lɛini suɠila, ɓaa è vilɛ! 16 Kɛlɛ tɔɔzei ɗa wuulee, è la lɛini, è la vilɛni, nà ʋaazu unpilisu ga ɗe. 17 Tɔɔzei ɗa ɠɛɛzu ma, naavolo nu ɠa ga ze, gè la ʋalani ani nɔpɛ ma, kpɛ̀dɛ la mɔ ani nɔpɛ ba. Tɔɔzei è la kwɛɛ ʋelei è maanɔɠɔai la, è maawɔin, è ɠɛ ga bala nu, è ɠaazuɠole, è maaɲakai ɠɛ de. 18 Naa ɠa é ba, nà è lɛnɛsu ga è zanugi ɠeya pɔ̀ bɛ, nii abui ma nɔɠɔi ɠulaai ba, naa ɠa a kɛ è ɓɛtɛ ga ɠite, seɠe ɠolegiti geya, è ɓɔɠɔ maaɠili la, naa ɠa a kɛ è-ɓusɛi ma unfesuʋɛti ti mina ɠula kɛlɛzu, è gaazuwana zalei ɠeya, è ɗa siɛ ɠaazuʋɛti, naa ɠa a kɛ è ɗa gwɛlɛi wo. 19 Nɔ̀un nà, niiti gè ti nɛai ʋɛ, nà ɗa zelii lo ti ma, gè ti maaɠolo. Ɠaaɓa, è zɛbɛzeɠe, è è-ziɛ ʋelei maavalibo. 20 Wɛlɛ, nà loni pɛlɛlaʋɛ, gè ɗa daaloɠa. Ni nu a gòoi mɛnina, é daalao, nà lɛ pɔ bɛ, gá tɔ gi daami wo ʋɔɔma. 21 « ‹Zɔi a pilɛ sɔlɔɔ, nà naa zei ɠoba nà-masa kpɔkpɔgi ɠa, eɠɛʋelei gè pilɛ sɔlɔɔni da, gè zeini Kɛ̀ɛ ɠoba ná-masa kpɔkpɔgi ɠa. 22 « ‹Zɔi nɔpɛ goiyeɠe ba, naama nui naa mɛni, nii GALA Zɛnvui bosu Egilisiiti ma.› »

Revelation 3 (TOMA)

In Other Versions