Romans 9 (TOMA)
1 Nii gè bosu, gaamai ʋe, gè la zɛɛ wosu, mazɔlɔɔ nà ga Kilista nɔnɔ. Nà-kisiɛi ɠa ɓɔɛzu pɔ̀, ti zoloogai ma ta Zɛnvu Ɲadegai, 2 zìiɓɔlɔʋɛ gola, ziizoolɛi ɠɛ zìimaʋɛ yeenɔpɛ. 3 Mazɔlɔɔ a la nɛɛ bɛ̀, nà ɓɔɠɔi ga gè ɠoto, kpè ge leʋe Kilista ʋa kɛ̀ɛleaiti ta-vaa zu, ti ga nà-nuiti kpusɛi maaʋele ma, 4 niiti ti ga Izilayɛle nuɓusɛiti. GALA ge ti ɠɛai ga ná-doun zunuiti, é lɛbiyai veai ti ʋɛ, ta minazeɠegiti, naa ʋɛɛ tɔgi ta GALA dɛbi ʋelei ʋa, é ɓɔ minazeɠegiti ba, 5 ti ga ɠɛɛɠɛ wolaiti fofodaiti, tiya ɠa Kilista ɠulaai ti zu kpusɛi letemazu. Tɔ ɠa é anii pɛ unga, mamagi ɠa GALA bɛ, eyɛsu ɠɔ. Amina! 6 De ɠɛ GALA daawooi la ga faa, naa laade. Tɔɔzei nii pɛgi é ga Izilayɛle mavofodai, naati pɛ ti la ga Izilayɛle nuɓusɛ ɠiteɠite. 7 Abalaame mavofodaiti pɛ tɛi ti ʋa ɠɛ ga ná-doun ɠiteiti. GALA ge ɠɛni Abalaame ma: «Izaake ɠa è-mavofodai a ɠula su.» 8 Naa ʋoluʋɛ ɠa ga, kpusɛi zu lointi tɛi, ti ʋa ɠɛ ga GALA dointi, kɛni minazeɠe dointi, naati ka ti levezu ga mavofoda ɠiteiti. 9 Minazeɠe kpɔɛi ɠa é ga nii, é ɠɛni ma: «Nà ʋaazu niima yeeɠɛɠalai nɔ ma, Sala ɠa doun zunu zɔlɔɔ.» 10 Kwɛgi la ga naa nɔ. Eleɓɛka yoogiti sɔlɔɔni ɠɛɛɠɛ ɠila kpegi ʋa, nii é ga ade-mɛmɛwola Izaake. 11 Doungoiti ti la ɠɛni dɛ zɔlɔɔni, ti ʋa faa ʋagɔ ɠɛ, ɓaa faa ɲɔu, kɛlɛ nii a kɛ GALA ná-devei yɛ laazuʋɛ, eɠɛʋelei ziimazeɠegi la, 12 é la ɠilini kɛɛwotiiti ba, kɛlɛ é naa yeezu, nii é toligi woga, é woni Eleɓɛka ma ga: «Nu ɠitei ɠa lɔ loungoi yeezu.» 13 Sɛʋɛʋɛ ɠani GALA Sɛʋɛi zu: «Gè yiimazeɠeʋɛ ga Zakɔɓe, gè Ezawu likpi.» 14 Lee ɠa da bo mu naazu? Telebotalai ɠa GALA ge su ɓaa? Ɓa-o, naa li poun! 15 Mazɔlɔɔ é ɠɛni Moize ma: «Nà gaazumaawɔinɠai ɠɛ naa ʋɛ, nii gè pɔ gè gaazumaawɔinɠai ɠɛ bɛ. Nà maawɔinɠai ɠɛ naa ʋɛ, nii gè pɔ gè maawɔinɠai ɠɛ bɛ.» 16 Naa ɠa é ba, nui yiima vaa laade a kɛ, ɓaa ná-gaaɓaai, kɛlɛ kɛni GALA ɓɔɠɔgoi é gaazumaawɔinɠai ɠɛɛzu. 17 GALA Sɛʋɛi zu, GALA ge ɠɛni masagi Falaɠɔn ma: «Niima vai maaʋele ɠa é kɛa, gè è zeiɗai masa kpɔkpɔgi ɠa, naa ɠa a kɛ gè sɛ̀bɛi lɛ ga è maaʋele, dàaseigi wo eteai zu ná pɛ.» 18 Naa ɠa é ba, GALA ka naa ɠaazumaawɔinɠa, zɔi é pɔ é gaazumaawɔinɠa. É naa ɠigi ɓaa, zɔi é pɔ é kigi ɓaa. 19 Ɗa ɠɛ mà tanisu: «Ni zekana é la, lee yeli ɠa GALA ge tosu nuɓusɛiti ma mu? Mazɔlɔɔ ɓɛ ɠa a ɠɛlɛ ziimai ʋa?» 20 Kɛlɛ ɓɛ ɠa è ga ɗe, ɗɛi è ga nuɓusɛi, è ʋa GALA sakpe? Pɔlɔ aniɲakai ɠa zoo nɛi ɓaa, é ɠɛ kpɛtɛ nui ma: «Leeni vaa zu è kpɛ̀tɛai ɠani?» 21 Zobo ge la pɔlɔ liɠi lo nui ya ɓaa, é ʋa pɔlɔ ɠaayɔgai ta ɓɛtɛ ga diɠi ʋagɔ wolai, é ma pɔlɔ ɠaayɔgai ta nɔ zeɠe, é kpɛtɛ ga diɠii ta nɔ? 22 Tama, GALA ge ɠɛni pɔ ga é ná-ziiɠaawanai lɛ, é ná-zobogi ɠula kɛlɛma. Anɛɛ naa ʋe, é yiilɔɔni, é maaɓɔungi wo gola, naati ta-vaa zu, niiti ziiɠaawana ɠasɔi ɠɛni niina ti unma, undaaʋiligi zoloogai ti ma. 23 É ɠɛni pɔ é ná-lɛbiyai wɔɔlɔ ʋelei lɛ ga naati, é ti ɠaazumaawɔinɠa, é ti ɓɛtɛai pɔlɔma ga ti tɔnɔ zɔlɔɔ ná-lɛbiyai zu. 24 Da ɠa é de loligai, é la nɔ ga de ɠula Zuifuiti saama, kɛlɛ de ɠula zii ɠiligiti pɛ saama. 25 Eɠɛʋelei é bogai la Wozé ná-sɛʋɛi zu, é ɠɛ ma:«Zɔi é la ɠɛni ga nà-nuɓusɛ, nà naa loli ga nà-nuɓusɛi,zii é la ɠɛni nɛɛni bɛ̀, gè naa loli ga nɛ̀ɛbɛ nui.» 26 «Ʋɛ GALA ge ɠɛni ɠɛɛzu ti ma ná: ‹Wo la ga nà-nuɓusɛa›,ta loli miná ga: ‹Zɛnvu su ƓALAGI ná-dointi›.» 27 Ezayi kpee looni Izilayɛle nuɓusɛiti ta-vaa zu, é ɠɛ ma:«Anɛɛ ni Izilayɛle nuɓusɛiti ta mɔinzu,eɠɛʋelei kpoloɗɛi ɠobaʋɛ ma ɲaɠaegi la,mɔta go nɔ ɠa a ɠizo. 28 Mazɔlɔɔ Maliɠii ɠa wooi ɠaavɔnigai pɛ pilɛ su ga maavilɛ,é kɛ eteai zu, eɠɛʋelei ná-devei la.» 29 Eɠɛʋelei Ezayi boni la mɔunpa, é ɠɛ ma:«Ni Fai-Pɛ-Maliɠii la ɠɛni ade-mavofodai yɛni ná,ada la ɠɛ ga Sɔdɔme ɠɛʋele nɔ kpein,ada la ɠula nɔ kpein ga Gomɔɔl.» 30 Lee ɠa da bo mu naazu? Zii ɠiligiti niiti ti la ɠɛa telebo faa ɠaiziɛzu, naati ti telebodai zɔlɔɔga, telebodai é zɔlɔɔsu ga kidaaleʋei maaʋele. 31 Tama Izilayɛle nuɓusɛiti, ti ɠɛni tɔgi ɠaiziɛzu, ti ʋa ɠɛ ga telebo nu GALA gaazu, ti la naama lɔgi zɔlɔɔni. 32 Leeni vaa zu? Tɔɔzei Izilayɛle ɠɛni ɠɛɛzu, é ɠɛ ga telebo nu, kɛlɛ ti la ɠɛni gaiziɛni ga kidaaleʋei, kɛni kɛɛwotiiti su. Ti-ɠɔɠɔi ziɠani kɔtui ʋa, é ga kɔɠɔziɠa ɠɔtui, 33 eɠɛʋelei sɛʋɛai la GALA Sɛʋɛi zu, é ɠɛ ma:«Wɛlɛ, nà kɔtu laazu Siyɔn,nii nu ɠɔɠɔ ɠa ziɠa ba,fasai nu ɠa ɓunɛ ma,zɔi a ɠidaaleʋe ma, naa la unfega.»