2 Thessalonians 2 (YAPE)

1 Ere rogon e wub nra tay e Somol rodad i Jesus Kristus nge rogon ni yira ulunguydad ngak e gu be wenignag ngomed, pi walageg ni girdi’en Kristus, 2 ndab mu gurgad nge wagagey lanin’med ngarogon e leam ni gimed be tay ara mu rusgad ni bochan e kanog ni re Rran nem ni nge yib Somol riy e ke taw. Sana be leamnag boch e girdi’ ni ku gogned e re bugithin ney ko ngiyal’ ni gamad be yi’iy ara gamad be machib, ara kug yoloyed nga babyor ke yan ku be’. 3 Demturug rogon ma dab mpaged be’ nge ban nagmed. Ya re Rran nem e dab ka’a yib nge yan i mada’ ko ngiyal’ nra m’ug tomuren e Togopluw ni ngan tay ngak Got, ma aram me m’ug Fa’anem nib Kireb, ni be sor i yan nga fithik’ e nifiy. 4 Ma bayi togopluw nga urngin ban’en nma meybil e girdi’ ngay nge urngin ban’en ni bay rogon ngak Got. Ma bayi tay ir nib tolang ko pin’ey ni gubin, ni mus ngalan e Tempel rok Got ni bay yan i par riy nga but’ me yog ni ir Got! 5 Da kum nanged e pi thin ney? Urngin e pi thin ney ma kugog ngomed ko fa ngiyal’nem ni ug moy romed. 6 Machane bay ban’en ni ka be tay e ren’ey ni dabi m’ug e chiney, ma gimed manang ko be mang. Ere En nib Kireb e bay yib i m’ug ko ngiyal’ ni kan turguy. 7 Ma gelngin e N’en nib Kireb nib mith e ke tabab ko maruwel, machane n’en ni bayi buch e dabi buch nge yan i mada’ ko ngiyal’ ni yira chuweg u kanawo’ rok e en ni ir e be taleg. 8 Ma aram e bay m’ug Fa’anem nib Kireb, mi Somol Jesus e bayi pag athon l’ugun ngak nge li’ ngem’ me kirebnag nga ram’en nib galgal ko ngiyal’ nra yib riy. 9 Ma Fa En nib Kireb e bay yib ni bay gelngin Satan rok, ma bayi ngongliy gubin mit e maang’ang nge pow ni be ban, nge ngongol ni yira gin ngay, 10 ma bayi bannag urngin e pi’in ngar maloggad nga urngin mit e ban nib kireb. Bay ra maloggad ni bochan e daburad ma de t’uf rorad e tin riyul’ ni ir e rayag ni nge thapegrad ngak Got. 11 Ireray fan nra pi’ Got gelngin e oloboch ni nge maruwel u lanin’rad ya nge mich u wun’rad e tin ni gathi ir. 12 Ma wenegan nra yib e urngin e pi’in nde mich u wun’rad fa tin riyul’, ma ke m’agan’rad ko denen e bay ni gechig nagrad. 13 Pi walagmad ni girdi’en Kristus, thingar gu pininged e magaer ngak Got ni gubin ngiyal’ ni bochmed, ni gimed e pi cha’nir ni gimed ba t’uf rok Somol. Ya Got e mel’egmed ni gimed e som’on ni ngam thapgad ngak Got u gelngin fare Kan ni Thothup ngu daken e michan’ romed ko tin nib riyul’, me ngongliymed ngam manged girdi’en nib thothup. 14 I piningmed Got ni ngam yodoro’gad u daken fare Thin Ni Bfel’ ni gu machib niged ngomed; i piningmed ni nge yag ngomed e f’oth romed ko fla’ab rok e Somol rodad i Jesus Kristus. 15 Pi walagmad ni girdi’en Kristus, mpired ni gimed bmuduwgil, mi gimed chichiiy pa’med ko fapi thin nib riyul’ ni fa’an ni ir e kug filed ngomed ko machib ni ug ted ngomed, nge tin kug ted nga babyor ke yib ngomed. 16 Somol rodad i Jesus Kristus nge Got ni ir e Chitamangidad, ni gamad ba t’uf rok e ir e ke runguydad ke ayuwegdad, ya ke pi’ e m’uthan’ ngodad nge reb e pagan’ nib muduwgil ni bay i par ndariy n’umngin nap’an, 17 me ir e nge suguy lanin’med ko athamgil me gel nagmed ngu’um rin’ed ma gimed be yog urngin e tin ni bfel’.

2 Thessalonians 2 (YAPE)

In Other Versions