Hosea 2 (YAPE)
1 Ere gimed piyu Israel e ngu’um pininged pi walagmed ni girdi’ nu Israel ni nge lungumed, “Girdi’ ku Got,” ma ngki lungumed, “Ke t’ufegrad Somol!” 2 Pifakag, mu weniggad ngak e chitiningimed, ni yugu aray rogon ni gathi ku ir le’engig ma gathi ku gag figirngin. Mu weniggad ngak nge tal ndabki yan nga figirngin be’ ma dabki i pi’ ir ni chuway’. 3 Ma fa’anra dabi tal, ma bay gu chuweg e mad u daken nge yan i par ni bod e rofen nni gargeleg ndariy e mad u daken. Bay gu gagiyegnag nge yan i par ni bod bbinaw ndariy e ran riy ma der tugul ban’en riy, ma aram e bay yim’ nriyul’ ko balel. 4 Dab gu runguy pifak; ya yad fak fare pin nma falchuway’ ngak ni der tamra’, 5 ma der tamra’ ni be pi’ ir ni chuway’. I ga’ar, “Bay ug lek pi’ilngeg, ni yad be pi’ ganag nge ran, nge bunu’en e saf nge mad ni wech, nge gapgep ko olive nge wayin rog.” 6 Ere bay gu ning e kanawo’ rok nga nochi ke gek’iy ni bay rachangalen; mu gu tay ba yoror ngalan e kanawo’ rok nge dabkiyag ni i rin’ e pin’en ni i rin’. 7 Bayi yan ni be lol’oeg fa pi’in ilingen, machane dab rayag gad rok. Bayi gawegrad, ma dabi piri’egrad. Ma aram e bayi ga’ar u wan’, “Nggu sul ngak fa bin m’on i figirngig, ya ngiyal’ ni ug moy rok e kabfel’ rogog ko chiney.” 8 Ya de leamnag u wan’ ni gag e ug pi’ e grain ngak, nge wayin, nge gapgep ko olive. Ma ku ug pi’ ngak e gubin e silber nge gol ni i fanay ko tay fan ni i tay ngak Baal. 9 Ere bayi taw ko ngiyal’ ni ngan kunuy e ggan nike yib ko woldug ni ngan tay nga naun mu gu fulweg e pi tow’ath rog ni grain nge wayin ni ug pi’ ngak, mu gu chuweg rok fapi bunu’en e saf nge fapi mad nib wech ni gu pi’ ni mad rok. 10 Ma aram e bay gu luf e mad u daken u p’eowchen pi ilingen, ma dariy be’ nrayag rok ni nge ayuweg nge chuweg u pa’ag. 11 Urngin e pin’en ni be pi’ e felfelan’ ngak e bay gu taleg, ni aram e mur nma tay ko yu duw, nge rran nib thothup ko yu pul, nge madnom ko Sabbath ko yu wik — urngin e madnom nma tay. 12 Bay gu kirebnag e woldug rok ni grape nge fa yu ke gek’iy rok ni fig, ni i yog ni pi ilingen e ra pi’ed ngak ni bochan e i pigpig ngorad. Bay gu pingeg e yungi grape nge gek’iy ni fi’in nge par nike ba chuwo’ i gerger, ma bay yib e gamanman ni malboch nge kirebnag. 13 Bay gu gechignag ni bochan fa yu ngiyal’ i n’em ni i par nike pag talig, ni fa yu ngiyal’nem ni fa’an i urfiy e incense ngak Baal me nunuw nge lol’oeg pi ilingen. I SOMOL e keyog e pi thin ney. 14 Ere nggu fek bayay nga daken e ted nder tugul ban’en riy; mu rom e bay gu weliy lanin’ug ngak riy nrib t’uf rog ma aram me sul ngog. 15 Mu gu fulweg ngak fa yungi grape ni fi’in, mu gu gagiyegnag e Loway ko Gafgow nge par ni mban e l’agan’. Mu rom e bay gu t’uf rok riy ni bod ni rin’ ko fa ngiyal’nem ni kab rugod, ni fa ngiyal’nem ni yib u Egypt. 16 Ma aram e bayi piningeg ni gag figirngin, ma dabki piningeg ni gag e Baal. 17 Ma gathi bay kug pag nge un fithingan Baal u l’ugun bayay. 18 Re ngiyal’ i n’em e bay gu ngongliy ba m’ag u thilmad urngin e gamanman ni malboch nge arche’, nge dab ra gafgow niged e girdi’ rog. Bay gu chuweg urngin talin e cham ni fan ko mael u daken e nam, ni urngin e saydon nge gat’ing, mu gu tay e girdi’ rog ngu’ur pired u fithik’ e gapas ndakuriy ban’en nra buch rorad. 19 Israel, bay gu fekem ngam mang le’engig;bay gu par ni gub yul’yul’;bay gu dag ngom e t’ufeg rog ni derma thil nge marnguy rog ni dabimus,mu ug tem nike mil suwom ngog ndariy n’umngin nap’an. 20 Bay gu tay nga tagil’ e thin ni kug micheg ngom mu gu tem nike mil suwom ngog;ma bay mu nang ni gag e SOMOL. 21 21-22 Ra yan i taw ko ngiyal’nem ma bay ug fulweg taban e meybil rok yu Israel ni girdi’ rog.Bay gu l’oeg e n’uw nge aw nga daken e but’ me k’uf e woldug ni grain, nge grape nge olive. 23 Ma bay gu tay e tirog e girdi’ u daken e nam rorad ngu’ur pired ni kefel’ rogorad.Ma bay gu dag e t’ufeg ko fa pi’ nem ntunguy “Det’uf” ngorad,ma bay gog ngak fa pin’em ntunguy “Gathigidi’eg” ngorad, ni bayi lungug ngorad, “Gimed e girdi’ rog,”ma bay ra fulweged ni lungurad, “I gur e Got romad.”