Jeremiah 23 (YAPE)
1 Ba gel e gechig nra tay SOMOL ngak e pi’in yad be gagiyeg, ni yad e kar li’ed e girdi’ rok ma kar wereged yad i yan. 2 Irera’ e n’en ni SOMOL, ni ir e Got nu Israel, e be yog ni murung’agen e pi’in yad be gagiyeg ni yad e ngu’ur ayuweged e girdi’ rok ni be ga’ar, “Kam wereged e girdi’ rog ka ra weargad; da um ayuweged yad. Ere bay gu gechig nagmed ni bochan e pi kireb ni ka mu ngongliyed. I Gag SOMOL e kugog e pi thin ney. 3 Ma aram e bay gu kunuy e tin bayi magey ko girdi’ rog ko pi nam i yan ni gag e kug weregrad ngay, nggu fulwegrad ko nam rorad. Ma bay yib pifakrad ni pire’ ngar yo’or gad. 4 Bay gu turguy e pi’in nge gagiyeg nge ayuwegrad. Ma aram e dab kur tamdag gad ara ur rus gad, me gag e dab kug gechig nagrad bayay. I Gag SOMOL e kugog e pi thin ney.” 5 Be ga’ar SOMOL, “Bayi taw nga bingyal’ mu gu duwgiliy be’ nib mat’aw nreb i owchen David ni nge mang pilung. Re pilung nem e bayi gagiyeg u fithik’ e gonop mi i rin’ e n’en nib yal’uw ma ba mat’aw u daken e re nam ney ni ga’ngin. 6 Nap’an nra pilung, ma aram e dabki buch ban’en rok piyu Judah, ma aram e girdi’ nu Israel e bay ra pired u fithik’ e gapas. Ma cha’nem e bay nog fithingan ni ‘Ir SOMOL Nma Mat’aw Nagdad.” 7 Be ga’ar SOMOL, “Bayi taw nga bangiyal’ ma dabki mow e girdi’ nu Israel nga fithingag ni gag fare Got ni gu be par ni gub fos ni gag e gu fek piyu Israel nga wuru’ e nam nu Egypt. 8 Machane bay ra mow niged ban’en nga fithingag ni gag fare Got ni gu be par ni gub fos ni gag e gu fek e girdi’ nu Israel nga wuru’ e nam ni bay ko lel’och, nge nga wuru’ e pi nam ni gu weregrad riy i yan. Ma aram e bay ra pired ko nam rorad.” 9 Ke m’ingan’ug,ma gu be da’da’ nreb.Ni bochan SOMOL,nge bochan e thin rok nib thothup,ma kugu bod be’ nib chingnag,nike pag oren e wayin nike unum. 10 Re nam ney e ke sug ko girdi’ nde yul’yul’ ngak SOMOL;tin kireb e yad be rin’ ma mat’awrad ni bay e ka ra muruwliyed e tin nib kireb ngay.But’ ko nam e ke kireban’ ya ke bucheg SOMOL wa’athan,ma yungi n’en nma kay e gamanman e pan riy e ke yim’ e pan riy. 11 Be ga’ar SOMOL,“Pi profet nge pi prist e dakuriy fan Got u wun’rad;kug pir’egrad ni mus ngalan e Tempel ni yad be ngongliy e kireb riy. 12 Yu pa’ i kanawo’ ni yad be lek e bayi tamasirgig me rumug riy;bay gu gagiyeg nagrad nge tun ayrad ngar paraw gad.Bay gu fek e riya’ i yib ngorad;ngiyal’ ni ngan gechig nagrad riy e be yib.I Gag SOMOL e kugog e pi thin ney. 13 Kug guy e kireb ni be ngongliy e pi profet nu Samaria:Yad be non u fithingan Baalka ra waliyed e girdi’ rog nga wuru’ e kanawo’. 14 Machane pi profet nu Jerusalem e kug guyrad ni ka ba gel e kireb ko tin yad be ngongliy:yad be par e ppin ni gathiyad bmabgol ma yad be lifith l’ugunrad;yad be towaser ko girdi’ ni nge ngongliy e kireb,ya nge dariy be’ ni nge tal i ngongliy e kireb.Rogon ko leam rog e yad gubin ni yad bod yu Sodom,ta’reb farad kireb ngak yu Gomorrah. 15 “I Gag, fare SOMOL ni Gubin ma Rayag Rok e ba’aray e tin gu be yog ni murung’agen e pi profet nu Jerusalem ni be lungug:Bay gu pi’ e woldug nib mo’oy ngar ked,nge ran ni bay e yub riy ngar unumed,ya kar gagiyeg niged e girdi’ u lan e nam ni ga’ngin ka ra pired ndakuriy fag u wun’rad.” 16 I SOMOL ni Gubin ma Rayag Rok e ga’ar ngak e girdi’ nu Jerusalem, “Dab mu telmed ko tin nra yog e pi profet ngomed; ya yad be ban nagmed ni nge l’agan’med nga bogi ban’en nde riyul’. Yad be weliy ngomed bogi ban’en ni yad e sum ko leam rorad, ma gathi gag e gog ngorad. 17 Yad be yog ngak e girdi’ ni pi’in ka ra dabuyed ni ngar motoyilgad ngog, ni yad ra par ni bfel’ rogonrad ni dabi buch ban’en rorad. Ma ku yad be yog ngak urngin e pi’in gel lanin’rad ni riya’ e dabi chuchugur nra aw ngorad.” 18 Mug ga’ar, “Dariy reb e pi profet ney ni ka’a nang laniyan’ SOMOL. Dariy bagayad ni ka’a rung’ag ara ka’a nang fan e thin rok, ara ka’a motoyil ara tiyan’ ko tin keyog. 19 Damumuw rok e ba nanyoer, ba nifeng nib gel ni bayi aw nga daken lolugen e girdi’ ni kireb. 20 Dabi m’ay nge yan i mada’ ko ngiyal’ nike mu’nag urngin e tin ke leamnag ni nge rin’. Tin bay e rran ni bay fini yib e bayi nang e girdi’ rok fan e pin’ey me tamilangan’rad riy.” 21 I SOMOL e ke ga’ar, “Gathi gag e gol’og e pi profet nem, machane ka ranod ngak e tirog e girdi’. Dariy bugithin ni gog ngorad, machane yad be yi’iy ni be lungurad e gag e thin rog. 22 Fa’an mang e yad manang lanin’ug, me ere rayag rorad ni ngar weliyed e thin rog ngak e girdi’ rog ngar paged pangirad ni kireb nge pi kireb ni yad be rin’. 23 “I gag ba Got ni gubin yang ma gu bay riy, ma gathi ta’ab yang e gu bay riy. I Gag SOMOL e kugog e pi thin ney. 24 Dariy bang nrayag ni nge mith be’ ngay nge dab gguy. Mogned, da mu nanged ni gu bay u gubin yang u tharmiy ngu but’? 25 Fapi profet ni yad ma lifith l’ugunrad e gu manang e thin ni yad be weliy ni be lungurad i gag e gog ngorad u malik’ay. 26 Nge uw n’umngin nap’an ni ngi i par e pi profet nem ni yad be waliy e tirog e girdi’ nga wuru’ e kanawo’ ko malulifith ni yad be tunguy? 27 Yad be leamnag ni pi lik’ay ni yad be weliy e ra gagiyegnag e tirog e girdi’ ngar paged talig, ni bod rogon pi chitamangirad nra paged talig ngar toer gad ngak Baal. 28 Ra lik’ay reb e profet ma thangri yog ni lik’ay e ke tay, ma re profet nike rung’ag e thin rog ni kug weliy ngak ni nge yog e thangri weliy u fithik’ e yul’yul’. Ra ni puluweg kenggin e wheat nga wom’ngin ma mang e bfel’ ni bay u kenggin e wheat? 29 Thin rog e bod ba nifiy, nge ba ama nma bilbilig e war nge par ni nochiyang. I Gag SOMOL e kugog e pi thin ney. 30 Gu ba togopluw ngak e pi profet ni bayi n’en me fek bagayad e thin rok bagayad nge weliy me yog ni gag e thin rog. 31 Ma ku gu ba togopluw ngak e pi profet ni yad be yog e thin ni sum rorad ma be lungurad i gag e thin rog. 32 Mu telmed ko tin be yog SOMOL, be ga’ar! Gu ba togopluw ngak e pi profet ni yad be weliy e lik’ay rorad ni go’ ban. Yad ma weliy e pi lik’ay rorad nem ngar waliyed e girdi’ rog nga wuru’ e kanawo’ ko sasalap l’ugun ni yad be weliy ni yad ba uf ngay. Gathi gag e gol’oegrad ara gog ngorad ni ngranod, ma dariy bochu’uw i ayuw ni yad be tay ngak e girdi’. I Gag SOMOL e kugog e pi thin ney.” 33 Me ga’ar SOMOL ngog, “Jeremiah, nap’an nra fith reb e girdi’ rog ara reb e profet ara reb e prist ngom ni ga’ar, ‘Mang e tomal rok SOMOL?’ ma ngam ga’ar ngak, ‘Gur e thi rok SOMOL, ma bayi n’agem.’ 34 Ma fa’anra reb e girdi’ rog ara reb e profet ara reb e prist ni yog e re thin ney ni ‘tomal rok SOMOL,’ ma bay gu gechignag nge gathon e tabnaw rok. 35 Rogon nra fith bagyad ko fager rok ara girdi’ ni yow tabnaw e nge ga’ar, ‘Mang e fulweg riy nike pi’ SOMOL? Mang e be yog SOMOL?’ 36 Thangri dab roged e re thin nem ni ‘tomal rok SOMOL,’ ni bochan e fa’anra yog be’, ma bay gu gagiyegnag e thin rog ngari tomal ngak. Girdi’ e ka ra thilyegned fan e thin rok e Got rorad, nib Got nib fos, ni SOMOL ni Gubin ma Rayag Rok. 37 Jeremiah, mu fith e profet, ‘Mang e fulweg nike pi’ SOMOL ngom? Mang e be yog SOMOL?’ 38 Ma fa’anra yad ra thilyeg e tin kugog nga rogned fare thin ni ‘tomal rok SOMOL,’ ma aram ngamog ngorad ni aram 39 e bay gu chibiyrad ngalang nggon’rad nga palog rog, nib mu’un fare binaw ngorad ni gu pi’ ngorad nge pi chitamangirad. 40 Bay gu fek nga dakenrad e tamra’ ndabi math bi’id nge thiyar, nge m’ayfarad ndariy duwan min pagtilinrad.