Hebrews 10 (BBT1E)

1 Jewish ro Iphey ne wie manathek thog ramuii pha ji pha ragey duiine ro; awai ne zai asi. Hì ne idamtham ne idang ò mizid zid pha ji phi ro. Chiihphado, Iphey ji ne, branthek hanyie yi Hamangkhung-aphuii shii wuii ji pha zidthek khriig rey pha khi-è-rek magey phlei? 2 Branthek Hamangkhung-aphuii shii misiasia pha ji è zai ithek layogthek shii sud arone, ithek ne din re-è layog pha ichiig rone athan, chiih-è zab zidthek ne gakdun phro. 3 Jishii, hì pha, zid ne idamtham ne bran pha ithek ro layogthek now yi ro. 4 Chiih-è rawoithek nane siphinthek ifai è ne layogthek shii akhia mua phro. 5 Ji pha chiang, Masi sohjambling shii wuii shii, ai è Hamangkhung-aphuii shii yao:“Na ne zidthek nane mizidthek achid ro,jishii na è gu chiang siu shii saro phi. 6 Na ne sraibao shii ziao pha miiramthek shiichiih-è zidthek rog shii layogthek shii khia muii pha ji shii de asang ro. 7 Chiihphado gu ne yao, Hamangkhung-aphuii Wo,Iphey pha jigi shii gu shii zey pha duiine ro, nathek è yang pha ji rek pha ‘Gune ichiih um ro.’” 8 Ai è ibi yaojong, “Na ne khuchung de ayang ro chiih-è zidthek chiih-è mizidthek sraibao shii ziao pha miiramthek de layogthek shii khia yi pha zidthek shii de na ne asang ro.” Hì pha mizid ne Iphey ji duiine zid magunde ai è hì yao ro. 9 Chiihphado ai è yao, Hamangkhung-aphuii Wo, na è yang pha ji rek pha “Gu ne ichiih um ro.” Ji-è Hamangkhung-aphuii zab ihèg zid shii fen muii srane Masi ro zid shii ji pha ithua hà ruii muii ro. 10 Nyieliieshii Isu Masi è Hamangkhung-aphuii ne aishii nyie rek phi bone yang pha ji rek phi, Gethek ne zab ai è awairo siu shii luang jia pha idang mizidthek phi pha ji è gethek ro layog è sud phi ro. 11 Zab Jewish inaitham ne awaithek ro blia rek chiih-è idang ò zid pha mizid, ji shii ji pha zid khuchung de layogthek shii ruang arek mua ro. 12 Ji-arone, Masi, ne layogthek chiang luang jia mizid zid jong, mizid ji ne idang chung, chiih-è ai ne Hamangkhung-aphuii pha phazoi hà dug dun ro. 13 Ji-è ai ne thuh ai ro makpho shii Hamangkhung-aphuii è airo lai liing hà aruii sapho thog pha ai ne khan muii ro. 14 Chiihphado, jia zid pha rog, hanyie yi layogthek è sud pho shii ne ai è idang khriigjong rab ro. 15 Chiih-è Ragung So de gethek shii airo khagi phi ro. Igobi ai è yao, 16 “Ithong è yao ro, Inai thog ruii shii hì pha shiinyie ne gu è ithek rog shii rab pha ji ro:Gu ne gu ro Iphemthek shii ithek ro lubuthek hà chab phichiih-è awaithek khani shii zey phi pha ro.” 17 Chiihphado ai è yao, “ithek ro layogthek nane awie blia shii din ne anow sha phro.” 18 Ji-è hì thek ne khungjong shii, mizid pha ji è layogthek shii ruang rek pha ji din ne achid sha ro sha ro. 19 Chiihphado, gu ijakthek, Isu iy miyao ji è gethek shii Bajo So Ithua hà wuii mua pha zab ichad sha ro. 20 Ai ne gethek shii yung saig ji è lumuii iwo, sieng pha lumuii shii hong phi ro—Ji ne ai awairo siu ji ro. 21 Hamangkhung-aphuii hò pha ilkhi bajobo phabi ne gethek rog shii um ro. 22 Ji-è cho gethek ne wie lubu nane izai migi rog, chiih-è ichiig è sudjong pha lubu chiih-è khow so è sud pha siuthek ne Hamangkhung-aphuii moe hà wuii rai haro. 23 Ji-è cho gethek ne gethek è rek pha gethek ro luthong chuh è kho rai haro, nyieliieshii gethek ai ro sbang rai rone Hamangkhung-aphuii shii migi rek mua ro. 24 Cho gethek ne nong rai chiih-è miie rone doh yi chiih-è wie rek pha now rai haro. 25 Cho gethek ne gai è rek ramuii pha duiine, gethek è ò shii male rek pha lajia pha ji shii athoh haro. Ji phachiang shii, Ithong pha Inai nui thog pha nathek è doh pha ji è cho gethek chung zab shii mana lububo rek rai haro. 26 Chiih-è gethek izai ji ìd yi pha idoh shii gethek è layogthek rek arone layogthek shii sud pha gai zid oi sha ro. 27 Ji phachiang shii, zab thog ramuii pha chua shii chiih-è hanyie è Hamangkhung-aphuii shii suang rek pho bai è ziao pha rum ji shii khan bie ro! 28 Hanyie magunde Moses ro Iphey shii anuii pho ne aishii ne bushun arek pha bran nyi-um khagi rek ne ua muii ro. 29 Chiihphado, Hamangkhung-aphuii ro Dufuii shii hanyie è snai pho shii, chiih-è layogthek è ithek shii sud pha Hamangkhung-aphuii shiinyie ifai ji shii igong oi pha duiine rek pho shii nyie rey ruii phlei? Nyieliieshii ai ne Ragung pha bushun shii de makhak-riing, ji è ithek shii chua ne khama rey buii rey ruii phro! 30 Chiih-è gethek ne thieg hanyie yao, “Gu ne rog din ruii, Gu ne phi din ruii phro” Chiih-è ai hì de yao, “Ithong ne awai bran shii chua ruii phro.” 31 Isieng Hamangkhung-aphuii wad shii thog pha ne bajo buii ro! 32 Igobi hà na rog shii nyie umjong pha ji shii now bo. Hamangkhung-aphuii ro muchuang nathek lakhung shii phi pha inai idoh shii nathek ne bajo manathek shii diig rek, ji shii rang de nathek shii ne diig ji è ayang mua ro. 33 Ji pha ishak nathek shii ne hong ne makhak-riing ne khui chiih-è ishak jia shii hanyie rog shii hì è rey pho rog shii nong pha saro ro. 34 Na è phathegphothek ro diigchiaothek shii thang, chiih-è nathek ro manathek shii ne zab reo, nathek ne nawaithek munow rey pha ji shii lised ne zud, nyieliieshii nyie yi idang rey ne rai pha wie manathek ji ne thuh de nathek shii um bamuii rone nathek ne thieg ro. 35 Nawaithek ro lububo rek pha ji shii amua rabo, chiihphado, nyieliieshii ji ne bajobo lasen mua ruii phro. 36 Hamangkhung-aphuii è yang pha ji shii blia rek pha nane chiih-è ai è nyie sbang rek pha ji shii choi pha Na ne jum rek bo. 37 Chiih-è, jigi shii yao pha duiine,“ìu jia pha ishak shii,chiih-è hanyie wuiiramuii pha ji ne wuii phro;ai ne achia phro. 38 Guro rangsua branthek, ne migi rek ne sieng ruii phro;jishii hanyie magunde idoh khid din arone,Gu ne ithek rog shii asang din sha phro.” 39 Gethek ne idoh khid pha bran nane mua pha asi ro. Ji phachiang shii gethek ne migi rek chiih-è ragia rey ro.

Hebrews 10 (BBT1E)

In Other Versions