Hebrews 10 (YAPE)
1 Israel e gathi ri ya’an ni polo’ e tin nri ir ban’en, kemus ni ya’an e pin’en ni bfel’ ni bay fini yib ni kab samathmath. Taab mit e maligach ni yibe pi’ riy u reb e duw nge reb. Ere re Motochiyel nem e uw rogon me yal’uweg e girdi’ ni yad be yib ngak Got u daken e pi maligach nem ni yibe pi’? 2 Fa’an mang e girdi’ ni yad be tayfan Got ma yad be meybil ngak e kar ni be’ech nagrad ko denen rorad, ma dabki i magawon e denen rorad nga lanin’rad, ma ke tal urngin e maligach. 3 Machane fan e pi maligach nem e nge puguran ko girdi’ e denen rorad u reb e duw ngu reb. 4 Ya racha’en e garbaw ni pumo’on nge kaming e ri dabiyag ni nge fek e denen nge chuweg. 5 Ireray fan ni fa’ani chugur ni nge yib Kristus ngaray nga fayleng me ga’ar ngak Got:“Dabum e maligach nge gamanman ni yibe pi’ ngom,machane kam ngongliy rogon ba dowef ni fenag. 6 Ya de fel’ u wun’um e gamanman ni yibe pi’ ngom u daken e altar ni kan urfiy ni ka reb,ara pi maligach ni ir e nge fek e denen nge chuweg. 7 Ma aram me lungug, ‘Got, gub arayni nggu rin’ e tin ni gab adag ni nggu rin’ —ni bod rogon murung’ageg ni kan yoloy u lan e babyor ko Motochiyel.’ ” 8 Som’on e yog ni ga’ar: “Ya gathi gab adag ara bfel’ u wun’um e pi maligach nge pi gamanman ni yibe pi’ ngom, ara pi gamanman ni yibe pi’ ngom ni kan urfiy u daken e altar nge fapi maligach ni nge fek e denen nge chuweg.” I yog e ren’ey ni yugu aram rogon ni urngin e pi maligach ney ma yibe pi’ nrogon ni be yog e Motochiyel. 9 Ma aram me ga’ar, “Got, gub aray ni nggu rin’ e tin ni gab adag ni nggu rin’.” Ma aram me n’ag Got urngin fapi maligach ni kakrom me tay Kristus ni maligach nga luwrad. 10 Bochan e rin’ Kristus e tin ni ba’adag Got ni nge rin’, ma aram fan ni gadad gubin ni kan chuweg e denen rodad kad be’echgad ni bochan fare maligach ni pi’ ni aram downgin, nri ta’ab yay ma aram e kemus. 11 Ra reb e prist rok piyu Israel mma sak’iy ngalang ngi i ngongliy e maruwel rok ni gubin e rran, ni ta’ab mit i maligach e be pi’ ni pire’ yay. Machane pi maligach nem e ri dabiyag ni nge chuweg e denen. 12 Machane Kristus e ri ta’reb e maligach ni pi’ ni fan ko denen, nib maligach ni bay i par ni bfel’ ndariy n’umngin nap’an, nge mu’ me yan i par nga but’ u ba’ ni mat’aw rok Got. 13 Ireram e gin ni bay i son riy e chiney nge yan i mada’ ko ngiyal’ ni bayi tay Got e pi to’ogor rok nga tan e rifrif u ay ni nge mang tagil’ e magif ko rifrif u ay. 14 Ere ta’reb e maligach nike pi’ ma ke yal’uweg ndariy n’umngin nap’an e pi’in kan chuweg e denen rorad kar be’echgad. 15 Ya ku errogon fare Kan Nthothup ni be micheg ngan’dad. Ya som’on e ga’ar: 16 “Be ga’ar Somol: Ireray fare m’ag ni bay gu ngongliy ngoradu tomuren e pi rran nem:Bay gu tay e pi motochiyel rog ngalan gum’ircha’rad,ma bay gu yoloy nga lanin’rad.” 17 Me ga’ar, “Ma dab kug leamnag e denen rorad nge kireb ni ur ngongliyed.” 18 Ere nap’an ni bay nn’ag fan e pin’ey, ma aram e dakuriy fan reb e maligach ni ngan pi’ ni nge fek e denen nge chuweg. 19 Pi walageg ni girdi’en Kristus, kari puf e kanawo’ ngodad ni ngdarod ngalan fa Gin Th’abi Thothup u daken racha’en Jesus ni map’ u kuruth. 20 Ke bing ngodad reb e kanawo’ nib be’ech ngak Got, ni reb e kanawo’ nib fos nike yan i kuruf fa gi mad ni kateng ni bay u Tempel ni aram downgin. 21 Ere bay e prist rodad nib tolang ni ir e be gagiyegnag e naun rok Got. 22 Ere ngad chuchugurgad ngak Got ni gadad ba yul’yul’ u lanin’dad ngak ma mmich u wun’dad nder maruwaran’dad rok, nge lanin’dad ni kan be’echnag ndakir yog ngodad ban’en nib kireb ni kad rin’ed, nge dowef ni kan maluknag ko ran nib machalbog. 23 Ere ngad chichiiyed pa’dad ko ren’en ni ir e ke l’agan’dad ngay ni ir e gadad be weliy murung’agen, ya ba pagan’dad ngak Got nra rin’ e tin keyog. 24 Ere nge bagadad ma ngi i leamnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin ni bfel’ ngak. 25 Ma ngad guyed rogon ndab da paged e mu’ulung rodad, ni bod rogon ni be rin’ boch e girdi’. Ma nge bagadad me pi’ e athamgil nga laniyan’ bagadad, ngari gel ni fan e gimed be guy ni Chirofen ni bay yib Somol riy e be chugur. 26 Ya dakuriy reb e maligach nra chuweg e denen ni fa’anra da leam niged ni ngu’ud denengad i yan u tomuren ni kan weliy ngodad e tin riyul’ kadnanged. 27 Ra errogon me ere n’en ke magey ni ngan rin’ e ngan tamdag ko n’en ni bayi m’ug: ni aram e pufthin nge nifiy nib gel ni bayi kirebnag e pi’in yad be togopluw ngak Got! 28 En nder ma fol ko Motochiyel rok Moses e yima li’ ngem’, ndanir ma runguy ko ngiyal’ nike m’ug nib kireb e rok ko mich nike dag l’agruw e girdi’ ara dalip. 29 Ere ra yan i di’in e en ni be darifannag e en ni Fak Got ni be dag ko ngongol rok ndariyfan u wan’ e racha’ ko m’ag rok Got ni ir e machalbognag fa’anem, ni en ni ir e ke tagannag laniyan’ fare Kan Nthothup nma ayuwegdad? Mu tafinay niged feni gel e gechig ni bay tapgin ni ngan pi’ ngak! 30 Ya gadad manang fa’anem ni ga’ar, “Bay gu fulweg taban e kireb, bay gu sulweg puluwon”; me ir e ki ga’ar, “I Somol e bayi pufthinnag e girdi’ rok.” 31 Rib gel e gafgow nra tay e pi’in nra gechig nagrad Got, ni Got ni be par nib fos! 32 Ki gimed manang rogomed ko tin ba’aram e rran nike yan nga tomur. Lan e pi rran nem u tomuren nike gal ram’en e tamilang rok Got nga dakenmed, e bo’or ban’en ni mu gafgowgad riy, machane gafgow ni i yib ngomed e de gel ngomed. 33 Bay yu ngiyal’ ni unog e thin nib kireb ngomed u fithik’ e girdi’ ma yibe ngongliy e ngongol nib kireb ngomed, ma bay yu ngiyal’ ni bayi n’en ma kam fal’eged rogomed ni ngam uned ngak e pi’in yibe yodoro’ nagrad ko gafgow. 34 Mu uned ko gafgow ni i tay e pi’in ka nin’rad nga kalbus, ma fa’an nni fek urngin e chugum romed u fithik’ e yargel mi gimed k’adan’med ko chugum romed ni kan fek, ma gimed ba felfelan’ ngay, ya gimed manang ni kabay ban’en romed ni kabfel’ ngay, ni bayi par ni dabi m’ay bi’id. 35 Ere dabi mulan’med ngu’um pired nib pagan’med, ya bay wenegan ni ba ga’ nra yib ngomed. 36 Ya thingari gum’an’med, ni fan e nge yag ni mu ngongliyed e tin nib m’agan’ Got ngay me yag ngomed e tin keyog nra pi’ ngomed. 37 Ni bod rogon ni keyog e babyor nib thothup ni be ga’ar:“Dabki n’uw nap’anma en ni nge yib e bay yib,ni dabi sowath. 38 Machane pi’in yad bmat’aw, ni girdi’eg, e bay ra pired nib mich Got u wun’rad miyad fos;machane fa’anra sul bagayad nga wuryal,ma dabki felan’ug ngak.” 39 Gathi gadad e pi’in ni kar pi’ed keru’rad ngak Got kar maloggad; ya gadad e ke michan’dad ngak Kristus kad thapgad ngak Got.