Hebrews 13 (BBT1E)
1 Asipho khuiinothek duiine nawaithek chung moe shii ruii bo. 2 Athieg pha biwenthek shii nawai hò hà hopha abia rabo. Giak è ne athieg pha biwenthek ho shii khliie shii ho jong. 3 Phathegpho shii now srane, nawai de ithek rog phatheg hà duiine now bo. Diigchiaopho shii now srane ithek diigchiaopho ji shii nawai è rad pha duiine now bo. 4 Yiy-gey pha ji shii ne zab ilab phi chid, chiih-è yi nane gey chung ne migi um rai chid. Hamangkhung-aphuii ne hanyie shii lubu oi hanyie è siulao rek ithek chua ruii phro. 5 Bang miie ne sgow pha ji è nawai shii ruang ruii bo, chiih-è nawai shii nyie um pha ji shii cho bo. Nyieliieshii Hamangkhung-aphuii è yao, “Gu ne na shii athoh phro; gu ne na shii asnai phro.” 6 Chiihphado, lubu boh rek srane yao,“Ithong ne garo nongpho ro,Gu ne arum phro.Gu shii hanyie nyie rek mua phiiga?” 7 Hanyie è nathek shii Hamangkhung-aphuii ro mua yao, nathek ro ibi pha dumuiithek shii now bo. Idoh pha ji now bo ithek ne khi-è rek ne sieng ithek khi-è rek ne iy chiih-è ithek ro migi shii noi bo. 8 Isu Masi ne duyo, sdoh chiih-è idang ò ro. 9 Izai lumuii ji è nathek ne zab athieg pha muyua pha ji hà adun yi rabo. Hì ne hanyie shii hì pha nuii pha ji è khoh ne ithek è anong pha michie chiang shii khoh nuii pha ji shii ne Hamangkhung-aphuii bushun è iliing pha chua shii choi pha ji wie ro. 10 Phabithek hanyie Jewish ithua pha misiasia sraibao zid nyie um pha ji shii chie phane rangsua oi ro. 11 Jewish pha kho phabi ne layog chiang shii miiram ro ifai yie ne Bajo So Ithua hà mizid zid; jishii miiram siu shii ne haliig è fuang hà ziao muii. 12 Ji pha chiang, aiwai ro ifai è branthek ro layog shii gang rek phi pha, Isu de rajan è fuang hà iy. 13 Chiihphado, cho gethek de, haliig è fuang hà aishii wuii ne chiih-è airo biwo shii thang rai haro. 14 Chiih-è ichiih sohnyiak shii ne gethek ro idang pha rajan ithua oi ro; gethek ne nyie thog ruii pha rajan shii khan ro. 15 Chiihphado, cho gethek de, nyie yi aishii Ithong rone sphunthek è nuii ne Isu chiang è Hamangkhung-aphuii shii idang mizid chiong ne zid rai haro. 16 Wie shii rek pha abia rabo chiih-è nawaithek chung nong rai bo, nyieliieshii hì pha zid ji ne Hamangkhung-aphuii shii sang yi ro. 17 Nawaithek ro dumuiithek shii nuii bo chiih-è ithek muyungthek shii luagieng bo. Ithek ne nathek luruak shii athohdang pha riig muii, nyieliieshii ithek ne ithek ro blia rek pha ji shii Hamangkhung-aphuii shii sasab phi chid phro. Nathek ithek shii nuii arone, ithek ne awaithek blia shii lised ne rek ruii phro; asi arone, ithek ne zo ne rek ruii phro, chiih-è ji ne nathek shii nong oi ruii phro. 18 Gathek shii misia shii rai bo. Gethek ne zai nyayao mua gethek munow ne sang ro, nyieliieshii gethek ne zab ishak shii zai shii rek yang. 19 Chiih-è gu shii khthiie idoh nathek moe shii thoh din yi pha Hamangkhung-aphuii shii sia bone gu ne ithek shii lubu è khung phro. 20 20-21 Gethek Ithong Isu Masi shii Hamangkhung-aphuii è iy pha ji hòi din yie; ai è awai ifai phi muii pha chiang ai ne shiishai pha Bajobo Shiishaibrogpho rey, ji pha chiang è idang pha shiinyie nabjong. Yang ne liijiing Hamangkhung-aphuii è na shii airo yang pha ji shii rek yi pha zab wie mana ji shii phi yi pha, chiih-è Isu Masi chiang, gethek chai shii ai è sang pha ji shii rek yi bo. Chiih-è biisiie ne idang è idang pha Masi ro! Amen. 22 Gu nathek shii khung, gu ijakthek hì pha lububo rek pha mua shii wie è nui bo; gu è nathek shii zey pha jigi hì ne phiang asi ro. 23 Gu ne nathek shii gethek khuiino Thimothi phatheg è khia ge pha ji shii ìd yi pha yang ro. Ai khthiie thog arone, aishii gurog noh srane nathek shii si pha wuii pha ro. 24 Nathek ro dumuiithek shii chiih-è zab Hamangkhung-aphuii bran shii gathek ro salamthek phi bo. Ithaly pha migiphothek è de nathek shii salamthek thoh gey. 25 Hamangkhung-aphuii ro bushun ne nathek zab rog rai bo.