Hebrews 13 (TOMA)

1 À mina yeeɓe ɠɛɛɠɛloun nɛɛbɛi ʋa. 2 À mina ɓe wɛɛn zɛsɛbo fai ʋa eyɛsu pɛ, mazɔlɔɔ tanigaani ti yɛgɛ kɛɛzu ti geezuɠeelaiti daazuʋɛɛni, ti la suɠwɛɛ. 3 À yiizoolɛ ga kasoɠa nuiti, eɠɛ wa tiyani ka wo kasoi ɠa ʋɔɔma. À ɠizɛ maanɔɠɔ nuiti su, eɠɛ wa ɠɛ faa ɠila ma wa tiye kpusɛi zu. 4 Ɛsɛ pɛ ge unfema ve vului ʋɛ, zinigi ta anzai ti ɠɛ ga wooɠɛɠila nua ɓɔɠɔ ʋɛ, mazɔlɔɔ GALA ka koloɠolo nuiti ta wɛɛnziɛ nuiti tukpɔɠaaleʋe. 5 À mina walii nɛɛ ʋɛ, é ʋa zei wo unda. Nii é wo ya, naa wo ɛnɛkɛ, mazɔlɔɔ GALA ɓɔɠɔi bogɛ, é ɠɛ ma: «Gè la yeeɓega è ʋa, gè la ɠɛlɛa è ʋa.» 6 Naa ɠa é ba, da zoo bosu ga ladalai pɛ ga:«Màliɠii ɠa ga nà-kpɔba nui,gè la lua ani nɔpɛ ba.Leeni ɠa nui a zoo é kɛ ga ze?» 7 À ɠizɛ wa-lotuɠɔiti su, niiti ti GALA daawooi laazeelini wo ma, wo ta-eteai ɠaaɓela ʋelei ʋɛtɛ, wo ʋokɔɠɔ ta-ɠidaaleʋei ma. 8 Yesu Kilista ɠa ga tɔnɔ wogi, ta za, eyɛsu ɠɔ. 9 À mina va bu kala kiligiti ma ziiti, ti ʋa wo ɠaka. Mazɔlɔɔ fizɔgɛ ga de-yii zɛbɛ zɔlɔɔ ga GALA ná-zaalai maaʋele, é mina ɠɛ ga deveiti ti ʋilɛgai ɠɔnɔ faiti ba, nii é la faa nɔpɛ paani naati ma, niiti ti ʋoluzeini ba. 10 Zalaɠa ɠula nui niiti ti botii ɠɛɛzu seizu ɲadegai wu, ma zobo ge la veeni ti ʋɛ ga ti ʋa naa ta mi, nii kulaai ada-zalaɠa ɠulazuʋɛ. 11 Mazɔlɔɔ suai niiti zalaɠa ɠula ɠundiɠi wolai ɠɛni ti ma ɲamai ɠulazu ga zalaɠai, ada ɲadega wolai, koto zuvaayɛ fai zu, ti ma ʋoomai ɠɛni ɠalazu ti-ʋuuzuʋɛ ʋoluʋɛ. 12 Naa ɠa é ba, Yesu ɓalaagi zaani taa ʋoluʋɛ, nii a kɛ é ná-nuiti ɲade ga tɔ ɓɔɠɔi ɲamai. 13 Deɠɛmu ade li pɔ bɛ puuzuʋɛ ʋoluʋɛ, de naa ɠɛɠala ʋɛlɛlalai ma zii zɔlɔɔ ga tɔun kɛʋele. 14 Mazɔlɔɔ taa la de ya zooi ma a lɛbi eyɛsu ɠɔ. Ada taai ɠaiziɛzu nii é ʋaazu. 15 Tɔun saɓui zu, ade mina ɓe ada-maamusɛi vee vai ʋa GALA bɛ ga zalaɠai, naa ɠa é ga de-lakɔlɔgiti ta-ɠulanuma, niiti ti kwɛɛsu kɛlɛzu kpaun ga tɔ ɠa é ga Maliɠii. 16 À mina yeema faa ʋagɔi ɠɛɛ vai ma, ta nu ɠɔɔ vai, naama zalaɠa ziiti ka ti nɛai GALA bɛ. 17 À wa-lotuɠɔiti goo zo, wo ɠolo ti ʋɛ. Mazɔlɔɔ tiya ɠa ti ɠaaɓaazu wo-yɛnvui ma, tɔɔzei ta ʋoluvaawo GALA ma ga ta-ɠɛɛwotiiti. Wa ɠolona ti ʋɛ, ta ti-losuʋɛ ɠɛ ga koozunɛɛi. Ni naa laade, ta kɛ ga gaazuɠilii, naama ge la ɠɛa wo ʋɛ ga kulanuma. 18 À ɗa GALA fali gi ʋɛ. Gi laaʋɛ da ga kisiɛ ʋagɔ ɠa gi ya, gá pɔ ga gi ziɛ ga pagɔ fai pɛ su. 19 Nà laalazu maazu ga wo GALA falii ɠɛ, naa ɠa a kɛ, su mina ɠooza, gè ʋa wo ʋɔ bɛ. 20 GALAGI nii é ziilɛigi veezu, naa ade-Maliɠii Yesu wuzeɠeni, é kula saai ya, é ɠɛ ga ná-baalagiti makɛ nu wolai, é ɠɔoɠɔ minazeɠegi ɠili ga tɔ ɓɔɠɔi ma ɲamai, 21 GALAGI naa zɛbɛi ve wo ʋɛ faa ʋagɔi pɛ kɛɛ vai zu, nii a kɛ wo ziimai laazeeli. É ziimai laazeeli wo-yiimaʋɛ ga Yesu Kilista maaʋele. Lɛbiyai ɠɛ tɔun bɛ ɠɔoɠɔ! Amina! 22 Nà wo maanɛɛnɛzu, kɛ̀ɛleaiti, ga wo yeezei niima lɛnɛ gooiti bu, mazɔlɔɔ nii gè sɛʋɛai wo ma niima zɛʋɛi zu, gè la suɠoozani. 23 Nà bosu wo ma ga ade-ɠɛɛloin Timɔte ʋilɛgɛ niina. Ni a ʋaana ʋɛ fala, nà ɠɛna ʋaa wo ʋɛtɛsu, gá yɛ ʋa gi ʋa. 24 À wa-lotuɠɔiti pɛ tuʋɔ bɛ̀, ta GALA ná-nuiti pɛ. Itali geleiti pɛ ta wo luʋɔsu. 25 GALA ná-zaalai yɛ wo pɛ wo ʋa!

Hebrews 13 (TOMA)

In Other Versions