Matthew 22 (BBT1E)

1 Isu è dinne najangthek è branthek shii yao. 2 Hamangkhung pha Sajathua ne hì duiine ro: Luang jia shii, saja jia è awuii dufuii pha phiyiy michie saro phi. 3 Ai è awai khiaothek shii phiyiy hà wuii yi pha biwenthek ho pha thoh ge, jimagunde ithek ne awuii yang phi. 4 Ji-è, ai è gai khiaothek shii hì pha mua rog biwenthek hà thoh ge: Thuh shii gu michie ne ideb sha ro; Guro rawoithek nane igong um pha suwuiiduiithek ua jong muii ro, chiih-è zab ne ideb sha ro. Phiyiy pha michie shii wuii mage bo! 5 Jishii, ho pha biwenthek ne ji anuii pha awaithek pha chongjai hà wuii dun; jia yi awai raig hà wuii marui, gai jia è awai chongjai hà wuii marui, 6 giak è ai khiao shii zum srane zuang ne ua muii. 7 Jipha saja ne bajo lijieg dun, ji-è, ai ne awai siphahithek thoh ne hanyiethek è rek jipho shii ua ne ithek rajanthek de zab ziao muii. 8 Chiihphado, ai è awai khiaothek shii ho srane ithek shii yao, guro phiyiy michie ne ideb sha ro, jishii gu è ho pha bran ji shii phi mua sapho asi ro; 9 thuh shii boh lumuiithek hà wuii ne khinyama pha bran ithek è doh pha ji shii ho mage. 10 Ji-è, khiaothek è fuang wuii srane lumuiithek hà khinyama pha bran doh muii pha ji, wie awie miapho shii khrab ne, chiih-è, phiyiy hò shii bran è zab ley ched dun. 11 Saja ji è bucho wuii ne biwenthek shii riig shii, ai è bran jia ne phiyiy yungthek aguii pha doh ruii. 12 Saja ji è sai, “Gu ijak wo! Na ne phiyiy yung aguii pha ichiih shii nyie rek ne wuii phlei?” Jishii bran ji è nyie de ayao phi. 13 Chiihphado Saja ji è awai khiaothek shii yao, “Aishii ne lai nane wad joi mua bo, chiih-è fuang pha igiia hà fen muii bo. Thiisa hà ai ne choh ne shinyin khriieg ruii phro.” 14 Isu è yao ched, “Bajo shii ho, jimagunde guii pha ji ne ìujia bie ro.” 15 Pharisithek dun srane musaithek rog Isu shii phang pha phak rai. 16 Ji-è ithek è awaithek ro samoythek nane Herod ro branthek shii ai hà thoh ge. “Masdo,” ithek è yao, “Gathek ne thieg nane izai yao. Na ne Hamangkhung-aphuii ro yang pha izai ji yua phi, gai munow shii ne nyie de samadiik ro, nyieliieshii nane gaithek shii boh ìu ariig ro. 17 Gathek shii yao bo, chiihphado, nane nyie now ga? Roman saja shii mijin than pha ji ne gethek Iphey shii gidieg ba, asi ba?” 18 Isu, ithek ro awie pha muphak ji thieg, chiihphado ai yao, “Nathek lawasdai! Nathek gushii nyie um ne phiing yi pha rek phlei? 19 Mijin shii phi pha sikhi ji gushii riig yi bo!”Ithek è sikhi ji aishii yi ne phi, 20 chiih-è ithek shii sai, “Hìthek ne hanyie mizia nane ibeng lei?” 21 Ithek è chang. “Bisiu ro.”Ji-è Isu è ithek shii yao, “Wie, chiihphado, nyie Bisiu ro ji Bisiu shii phi mage bo, chiih-è nyie Hamangkhung-aphuii ro ji ne Hamangkhung-aphuii shii phi mage bo.” 22 Ithek ji yoi mage shii, ithek ne wiengphleg dun; chiih ithek aishii thoh marui ne dun dun. 23 Jipha ò inai shii giak Sadusithek Isu shii wuii ne iy pha bran ne ahòi din phro ne yao. 24 “Masdo,” ithek è yao, “Moses è yao hò-aphuii hanyie è ani agiak pha iy dun arone, awai khuiino misiungmuii shii yiy chid srane ani giak pha ji ne iy dun pha hò-aphuii ro ani rey bo. 25 Thuh shii, khuiino miley ichiih shii rai. Abam ji è yiy srane ani oi pha iy dun, ji-è misiungmuii jine ikhuii shii thoh marui. 26 Ji duiine din pha ikhuii shii de irey, chiih-è uom pha khuiino shii irey, chiih-è mileynoi pha khuiino shii de irey dun. 27 Idohhè shii zab irey dun. Jipha hò-amuii de iy dun. 28 Thuh shii, iy pha ji è chai hòi inai shii, ai ne hanyie yiy rey phlei? Ithek zab è aishii yiy.” 29 Isu è ithek shii chang, “Nathek ne khinyama adunmey pho ro nyieliieshii ithek ne jigigam nane Hmangkhung-aphuii ro blu athieg ara ro. 30 Chiih-è iy pha ji chai sieng mage shii, ithek ne hamangkhliiethek duiine chiih-è ayiy rai phro. 31 Thuh shii, iy pha ji chai sieng ruii pha chiang shii: Hamangkhung-aphuii è ithek shii nyie yao pha ji ne nathek atham riig bey? Ai è yao, 32 ‘Gu ne Abraham ro Hamangkhung-aphuii, Isakh ro Hamangkhung-aphuii, chiih-è Jakhob ro Hamangkhung-aphuii ro.’ Ai ne isieng Hamangkhung-aphuii ro, chiih-è iy pha Hamangkhung-aphuii ro asi ro.” 33 Iphiing è ji yoi mage shii, nathek ne ai muyua jishii wiengphleg dun. 34 Isu è Sadusithek shii aro yiedang pha rek muii rone pharisithek è yoi mage shii, nathek ò wuii, 35 chiih-è nathek è jia, Iphey yua pha Masdo jia yi, musai rog aishii phang yi pha bidiang. 36 “Masdo,” Ai è sai, “Iphey shii zab è boh muyung nyie lei?” 37 Isu è chang, nawai Ithong Hamangkhung-aphuii shii nawai lubu è miie bo, nawairo zab ragung rog è miie bo, chiih-è nawairo zab khani rog è miie bo. 38 Jine zab è boh nane zab è mugak muyung ro. 39 Din pha zab è boh muyung hì ro: Nawai shii miie pha duiine nawai hadung-haluii pho shii miie bo. 40 Moses ro Iphey nane chaigthek muyua jine hì pha muyung nyi è luthong phro. 41 Giak Pharisithek ò shii khrab mage shii, Isu è ithek shii sai, 42 “Masi chiang shii nathek nyie now lei? Ai ne hanyie ro riing lei?”“Ai ne Dawid ro riing ro,” ithek è chang. 43 “Chiihphado, nyie,” Isu è sai, Dawid shii Ithong ho phane Dawid shii ragung è thoh ne bey? Dawid è yao, 44 Ithong è gu Ithong shii yao:Gu è na suangthek shii naro lai iliing hà aruii sapho shii neIchiih gu phazoi shii dug bo. 45 “Chiihphado, Dawid è aishii ‘Ithong,’ rone ho arone, nyie khi-èrek Masaiya ne airo riing rey mua phlei?” 46 Hanyie jia è de Isu musai ji achang mua, chiih-è ji pha idoh è hanyie de aishii musaisai pha lubo boh arek mua.

Matthew 22 (BBT1E)

In Other Versions