2 Timothy 1 (SBIKS)
1 ಖ್ರೀಷ್ಟೇನ ಯೀಶುನಾ ಯಾ ಜೀವನಸ್ಯ ಪ್ರತಿಜ್ಞಾ ತಾಮಧೀಶ್ವರಸ್ಯೇಚ್ಛಯಾ ಯೀಶೋಃ ಖ್ರೀಷ್ಟಸ್ಯೈಕಃ ಪ್ರೇರಿತಃ ಪೌಲೋಽಹಂ ಸ್ವಕೀಯಂ ಪ್ರಿಯಂ ಧರ್ಮ್ಮಪುತ್ರಂ ತೀಮಥಿಯಂ ಪ್ರತಿ ಪತ್ರಂ ಲಿಖಾಮಿ| 2 ತಾತ ಈಶ್ವರೋಽಸ್ಮಾಕಂ ಪ್ರಭು ರ್ಯೀಶುಖ್ರೀಷ್ಟಶ್ಚ ತ್ವಯಿ ಪ್ರಸಾದಂ ದಯಾಂ ಶಾನ್ತಿಞ್ಚ ಕ್ರಿಯಾಸ್ತಾಂ| 3 ಅಹಮ್ ಆ ಪೂರ್ವ್ವಪುರುಷಾತ್ ಯಮ್ ಈಶ್ವರಂ ಪವಿತ್ರಮನಸಾ ಸೇವೇ ತಂ ಧನ್ಯಂ ವದನಂ ಕಥಯಾಮಿ, ಅಹಮ್ ಅಹೋರಾತ್ರಂ ಪ್ರಾರ್ಥನಾಸಮಯೇ ತ್ವಾಂ ನಿರನ್ತರಂ ಸ್ಮರಾಮಿ| 4 ಯಶ್ಚ ವಿಶ್ವಾಸಃ ಪ್ರಥಮೇ ಲೋಯೀನಾಮಿಕಾಯಾಂ ತವ ಮಾತಾಮಹ್ಯಾಮ್ ಉನೀಕೀನಾಮಿಕಾಯಾಂ ಮಾತರಿ ಚಾತಿಷ್ಠತ್ ತವಾನ್ತರೇಽಪಿ ತಿಷ್ಠತೀತಿ ಮನ್ಯೇ 5 ತವ ತಂ ನಿಷ್ಕಪಟಂ ವಿಶ್ವಾಸಂ ಮನಸಿ ಕುರ್ವ್ವನ್ ತವಾಶ್ರುಪಾತಂ ಸ್ಮರನ್ ಯಥಾನನ್ದೇನ ಪ್ರಫಲ್ಲೋ ಭವೇಯಂ ತದರ್ಥಂ ತವ ದರ್ಶನಮ್ ಆಕಾಙ್ಕ್ಷೇ| 6 ಅತೋ ಹೇತೋ ರ್ಮಮ ಹಸ್ತಾರ್ಪಣೇನ ಲಬ್ಧೋ ಯ ಈಶ್ವರಸ್ಯ ವರಸ್ತ್ವಯಿ ವಿದ್ಯತೇ ತಮ್ ಉಜ್ಜ್ವಾಲಯಿತುಂ ತ್ವಾಂ ಸ್ಮಾರಯಾಮಿ| 7 ಯತ ಈಶ್ವರೋಽಸ್ಮಭ್ಯಂ ಭಯಜನಕಮ್ ಆತ್ಮಾನಮ್ ಅದತ್ತ್ವಾ ಶಕ್ತಿಪ್ರೇಮಸತರ್ಕತಾನಾಮ್ ಆಕರಮ್ ಆತ್ಮಾನಂ ದತ್ತವಾನ್| 8 ಅತಏವಾಸ್ಮಾಕಂ ಪ್ರಭುಮಧಿ ತಸ್ಯ ವನ್ದಿದಾಸಂ ಮಾಮಧಿ ಚ ಪ್ರಮಾಣಂ ದಾತುಂ ನ ತ್ರಪಸ್ವ ಕಿನ್ತ್ವೀಶ್ವರೀಯಶಕ್ತ್ಯಾ ಸುಸಂವಾದಸ್ಯ ಕೃತೇ ದುಃಖಸ್ಯ ಸಹಭಾಗೀ ಭವ| 9 ಸೋಽಸ್ಮಾನ್ ಪರಿತ್ರಾಣಪಾತ್ರಾಣಿ ಕೃತವಾನ್ ಪವಿತ್ರೇಣಾಹ್ವಾನೇನಾಹೂತವಾಂಶ್ಚ; ಅಸ್ಮತ್ಕರ್ಮ್ಮಹೇತುನೇತಿ ನಹಿ ಸ್ವೀಯನಿರೂಪಾಣಸ್ಯ ಪ್ರಸಾದಸ್ಯ ಚ ಕೃತೇ ತತ್ ಕೃತವಾನ್| ಸ ಪ್ರಸಾದಃ ಸೃಷ್ಟೇಃ ಪೂರ್ವ್ವಕಾಲೇ ಖ್ರೀಷ್ಟೇನ ಯೀಶುನಾಸ್ಮಭ್ಯಮ್ ಅದಾಯಿ, 10 ಕಿನ್ತ್ವಧುನಾಸ್ಮಾಕಂ ಪರಿತ್ರಾತು ರ್ಯೀಶೋಃ ಖ್ರೀಷ್ಟಸ್ಯಾಗಮನೇನ ಪ್ರಾಕಾಶತ| ಖ್ರೀಷ್ಟೋ ಮೃತ್ಯುಂ ಪರಾಜಿತವಾನ್ ಸುಸಂವಾದೇನ ಚ ಜೀವನಮ್ ಅಮರತಾಞ್ಚ ಪ್ರಕಾಶಿತವಾನ್| 11 ತಸ್ಯ ಘೋಷಯಿತಾ ದೂತಶ್ಚಾನ್ಯಜಾತೀಯಾನಾಂ ಶಿಕ್ಷಕಶ್ಚಾಹಂ ನಿಯುಕ್ತೋಽಸ್ಮಿ| 12 ತಸ್ಮಾತ್ ಕಾರಣಾತ್ ಮಮಾಯಂ ಕ್ಲೇಶೋ ಭವತಿ ತೇನ ಮಮ ಲಜ್ಜಾ ನ ಜಾಯತೇ ಯತೋಽಹಂ ಯಸ್ಮಿನ್ ವಿಶ್ವಸಿತವಾನ್ ತಮವಗತೋಽಸ್ಮಿ ಮಹಾದಿನಂ ಯಾವತ್ ಮಮೋಪನಿಧೇ ರ್ಗೋಪನಸ್ಯ ಶಕ್ತಿಸ್ತಸ್ಯ ವಿದ್ಯತ ಇತಿ ನಿಶ್ಚಿತಂ ಜಾನಾಮಿ| 13 ಹಿತದಾಯಕಾನಾಂ ವಾಕ್ಯಾನಾಮ್ ಆದರ್ಶರೂಪೇಣ ಮತ್ತಃ ಶ್ರುತಾಃ ಖ್ರೀಷ್ಟೇ ಯೀಶೌ ವಿಶ್ವಾಸಪ್ರೇಮ್ನೋಃ ಕಥಾ ಧಾರಯ| 14 ಅಪರಮ್ ಅಸ್ಮದನ್ತರ್ವಾಸಿನಾ ಪವಿತ್ರೇಣಾತ್ಮನಾ ತಾಮುತ್ತಮಾಮ್ ಉಪನಿಧಿಂ ಗೋಪಯ| 15 ಆಶಿಯಾದೇಶೀಯಾಃ ಸರ್ವ್ವೇ ಮಾಂ ತ್ಯಕ್ತವನ್ತ ಇತಿ ತ್ವಂ ಜಾನಾಸಿ ತೇಷಾಂ ಮಧ್ಯೇ ಫೂಗಿಲ್ಲೋ ಹರ್ಮ್ಮಗಿನಿಶ್ಚ ವಿದ್ಯೇತೇ| 16 ಪ್ರಭುರನೀಷಿಫರಸ್ಯ ಪರಿವಾರಾನ್ ಪ್ರತಿ ಕೃಪಾಂ ವಿದಧಾತು ಯತಃ ಸ ಪುನಃ ಪುನ ರ್ಮಾಮ್ ಆಪ್ಯಾಯಿತವಾನ್ 17 ಮಮ ಶೃಙ್ಖಲೇನ ನ ತ್ರಪಿತ್ವಾ ರೋಮಾನಗರೇ ಉಪಸ್ಥಿತಿಸಮಯೇ ಯತ್ನೇನ ಮಾಂ ಮೃಗಯಿತ್ವಾ ಮಮೋದ್ದೇಶಂ ಪ್ರಾಪ್ತವಾನ್| 18 ಅತೋ ವಿಚಾರದಿನೇ ಸ ಯಥಾ ಪ್ರಭೋಃ ಕೃಪಾಭಾಜನಂ ಭವೇತ್ ತಾದೃಶಂ ವರಂ ಪ್ರಭುಸ್ತಸ್ಮೈ ದೇಯಾತ್| ಇಫಿಷನಗರೇಽಪಿ ಸ ಕತಿ ಪ್ರಕಾರೈ ರ್ಮಾಮ್ ಉಪಕೃತವಾನ್ ತತ್ ತ್ವಂ ಸಮ್ಯಗ್ ವೇತ್ಸಿ|