Acts 11 (SBT1E)

1 Judea ram pumpuia tîrtonngei le iempungei hah Jentailngei khom Pathien chong an rieta an lei modôm zoi. 2 Peter hah Jerusalema a sea, hanchu sertan ngei han ama an lei dema, a kôm, 3 “Sertanloi Jentailngei ina nu tunga an kôma sâk khom na sâk ngâi!” an tia. 4 Masikin Peter'n abul renga anrêngin aroi omtie murdi a misîrpe ngaeia. 5 “Joppa khopuiliena chubai ko tho lâiin, inlârna ku mua. Puon chêk lientak anghan arikil minlia inthung invân renga juong musum ko kôla juong om ku mua. 6 Mahan anâikikin ke enna insûng sa le ram sa, rôpa intol ngâi le vângei ku mua. 7 Masuole chong mirîng ki rieta ko kôm, ‘Inthoi roh Peter; that inla sâk roh,’ a tia. 8 Hannirese keiman ‘Nimak Pumapa! ânthieng loi le annim ite ka bâia lût ngâi mak’ ki tia. 9 Invân renga rôl han avoiniknân, ‘Pathien'n ânthieng a ti sai hi nangman inthieng mak tino roh!’ a ti nôka. 10 Ma anghan voithum ajuong oma masuole azoinataka chu invân tieng lâk pâiin a oma. 11 Ma zora tak han Caesarea renga mi inthum hongtîra om ngei hah ko omna in an hong tunga. 12 Ratha'n mulung inlakloia anni ngei jûi ngei rangin mi rila. Hi iempu uruk Joppa renga Caesarea hong ngei khom min jûisa kin rêngin Cornelius ina kin lûta. 13 Ama han a ina vântîrton inding a mua, vântîrton han a kôma, joppa khuoa mi tîr inla mi inkhat a riming Simon Peter an ti hah hong minkoi roh. 14 Ama han chong nang misîrpe a ta, ama chong han nangma le ni insûngmingei sânminjôkin om nin tih, tiin khom mi ril sa. 15 Chongril ko hong phut lehan motona ei chunga ajuongtung anghan Ratha Inthieng an chunga ajuongtunga. 16 Male Pumapa'n a ti ‘John'n tui le mi a baptis ania, nangni chu Ratha Inthiengin baptist la chang nin tih,’ a ti hah ki rietsuok nôka. 17 Pumapa Jisua Khrista ei iema ama chongpêk nanâk hah Jentailngei khom a pêk ani ti ânthâr ani. Kei hih tumo ki ni, Pathien khap rang bôkpu hi!” a tia. 18 Ma chong hah an riet lechu dem khâi mak ngei, Pathien an minpâka, “Pathien'n Jentailngei khom insîra ring rangin zora inchum a pêk ani hi!” an tia. 19 Hanchu Stephan an that zora dûkmintongna sika chekinchâi ngei hah Phoenicia Ram, Cyprus tuikul le Antioch khuo dênnin an sea Judangei kôm vei thurchi an rila. 20 Hannirese, iempu senkhat: Cyprus tuihuol le Cyrenea mingei hah Antioch'a an sea, Jentailngei kôm khom Thurchi Sa an misîra, Pumapa Jisua Thurchi Sa an rila. 21 Pumapa ranakin a san ngeia, mi tamtakin an iema, Pumapa tieng an inhei zoia. 22 Ma thurchi hah Jerusalema koiindang ngeiin an lei rieta, masikin Barnabas hah Antioch taka an tîra. 23 Ama hah a tungin chu mataka mingei Pathien'n satavur tie hah a mûn chu a râisân tataka, an mulungngei murdia Pathien taksônna om mindet rangin anrêngin a mohôk ngeia. 24 Barnabas hah mi satak, Ratha Inthieng le iemna sip ania, masikin mi tamtak Pumapa tieng a tuong zoia. 25 Hanchu Barnabas hah Saul rokin Tarsus khuoa a sea. 26 A mu lehan Antioch tieng a hong tuonga, kum khat piel koiindangngei inkhômna an inchel ngâia, mi tamtak an minchu sa ngâi. Antioch'a han kêng iempungei hah Khristien an ti masatak. 27 Ma zora han Dêipu senkhat ngei Jerusalem renga Antioch an sea. 28 An lâia mi inkhat a riming Agabus ândinga rammuol pumpuia mâitâm natak chul atih, ti ratha min rietin a phuonga; ha mâitâm hah Claudius inlal lâiin atung zoi. 29 Ha anghan, ruoisingei han an thei lam chitin Judea rama iempungei kôm sanna muthuon rang an masata. 30 Ma hah an thoa masuole sum han koiindang upangei kôm pêk rangin Barnabas le Saul kuta an muthuon zoi.

Acts 11 (SBT1E)

In Other Versions