Acts 2 (SBT1E)

1 Penticos ni ahong tungin chu iempungei hah anrêngin mun khata an intûpkhôma. 2 Inningloi rengin invân renga phâivuopui angati rahang ajuong tung zuta, an insungna in hah ajuong sip zita. 3 Melei anga om meidon insem inzarin an mua, an chunga achuong chita. 4 Anrêngin Ratha Inthiengin an sip zita, Ratha'n a min chong ngei angtakin chong dangin an chong zoia. 5 Hanchu muntin renga hong Juda sakhuo mingei jerusalema an châma. 6 Ma rahang hah an rietin chu, mi tamtak an hong intûpa, mitinin iempungei chong hah anni an chong chit angin an riet sikin an mulung sûnga an kamâma. 7 an mulung ajînga, kamâmruoi khom an ti oka, “En ta, hi a chongngei murdi hih Galilee rama mi nimak ngei mo! 8 I angin mo ei rêngin ei inzirpui chong ang chita ei riet thei hih? 9 Senkhat Parthia mi, Media mi, Elam mingei ei nia, senkhat Mesopotamia rama om, Judea rama om, Cappadocia ram, Pontus le Asia rama om, 10 Phrygia le Pamphylia ram, Egypt le Libya rama Cyrene khuo kôl revêla omngei ei nia, senkhat Rom khuo renga hong, 11 Judangei le Jentail Juda lei minchang ngei ei nia, male senkhat Crete tuihuol mi le Arabia rama mi ei nia; Hankhoma, Pathien sintho roiinpui ngei an misîr, ei inzirpui chong ang chita ei riet hih!” an tia. 12 Anrêngin a mindona chang riet loiin kamâm aruoi an tia, “Hi ngei hih inmo anni rang?” tiin anni le anni an inrekela. 13 Hannirese senkhatin chu iempungei hah, innuinân an manga, “Hi mingei hih uain inrûi kêng an ni!” an tia. 14 Hanchu sômleikhat ngei leh Peter hah an indinga, mipui lâia han inringtakin chongril aphuta, “Nangni Judea rama mingei le jerusalema ompu murdi ngei, ko chongril hih rangâi ungla male mahi imo aomzie nangni lei ril rong. 15 Hi ngei hih nin iem lam angin inrûi mak ngei, atûn hin jîng dâr kuo vaikêng ala ni. 16 Hi roi hih Dêipu Joel'n a lei ril hah ani. 17 ‘Pathien'n sûn nûka chu hi anghin la tho ki tih;mi murdi chunga ka Ratha la bun ka tanin nâipasal le nin nâinupangngeiin ko chong la misîr an ta;nin ruotharte ngeiin inlârna mûng an ta,male nin tarngeiin ramangin phan an tih. 18 Ani, ma nikhuo ngeia hanchu kitîrlâmngei nupangngei, pasalngei chunga ka Ratha bun ka tako chong la misîr an tih. 19 Chungtieng invâna sininkhêlngeimale nuoi tieng pilchungakamâmruoingei min mu ngei ki tih.Mahan thisen, mei, meikhu bit ngei om a ta; 20 Nisa jîng a ta male tha thisen anghan sen atih;Pumapa Nikhuo inlal le roiinpuitak hah ajuong tung mân. 21 Hanchu, tukhomin Pumapa riming ralam murdi chu sanminringin om an tih.’ 22 “Nangni Israel mingei hi chongngei hih lei rangâi roi! Nangni rengin nin riet anghan, Nazereth Jisua hah Pathien'n nin lâia sininkhêl, kamâmruoi le sinthona ngei nangni a min riet ani. 23 Jisua hah Pathien jêklam le mintuo lam angtakin an sûra, nangnin mi nunsie ngei kuta bângin khrosa jêmdelin nin thata. 24 Aniatachu Pathien'n thina sinthotheina renga mojôkin, ama hah thinân asûr chien thei loi sikin a kaithoi zoi. 25 David reng khomin a chungroi hi anghin a rila,‘Ka makunga Pumapa ku mu tit ngâia;kên nîk loina rangin ka changtieng aom tita. 26 Masikin râisânnân ki sipa,ko chong khom râisâna asip.ka taksa khomin a sabei ngit ani,ka sabeina khom râisânnân asipa. 27 Masikin ka ratha hi mithi khuoa mâksan no ti nia,Ni mi inthieng ruok mon rang phal no ti ni. 28 Nangman ringna lampuingei mi ni min mua;male mi ni ompui sikin râisânân sip ki tih zoi.’ 29 “Ka champuingei, ei richibul Rêng David roi hah hâitakin nangni ki ril. Ama hah a thi zoia, male an phûma, a thân khom atûnten ei kôla ala om tit. 30 Ama hah Dêipu ania, a ruthûl rangin tumakhat Pathien'n David richisuonpârngei lâia rêngin la phun rangin ânkhâm ngit ti a rieta. 31 Pathien'n sûnmotona sin a tho rang tie David'n a lei riet piel sikin Khrista inthoinôk rang chong misîrin,‘Ama hah mithi khuoa mâkrakin om maka;a ruok khom thâna mon mak,’ ai ti ani. 32 Hima Jisua hih Pathien'n thina renga a kaithoinôk zoi ti chong hih keini reng hi rietpuipungei kin ni. 33 Pathien changtieng chôiminsâng ani zoia, a Pa kôm renga Ratha Inthieng leikhâm hah a changa, atûna nin mu le nin riet hi ei chunga ajuong vur ani hih. 34 David hah ama lelên invâna kal maka,‘Pumapa han ku Pumapa kôm:ka changtieng insung tit roh. 35 Keima'n na râlngei murdi ne kepha sirna nuoia ka dar mâka a ti, a tina kêng ani.’ 36 “Hanchu, Jisua nin jêmdelpu hah Pathien'n Pumapa le Khrista aminchang ngêt tih Israel mi murdi riet ngêt rese ngei a tia.” 37 An chong riet han an mulungrîl atôka, Peter le tîrton dangngei kôm han, “Lâibungngei, imo kin tho rang ani zoi?” an tia. 38 Peter'n an kôm, “Nin sietnangei ngâidam anina rangin insîr ungla, Jisua Khrista rimingin Baptis chang pak roi, hanchu, Pathien manboiapêk Ratha Inthieng hih chang nin tih. 39 A khâm hih nangni le nin nâingei le ram lataka mi murdi ngei rang le Pumapa Pathien'n a kôma a koi ngei rangin ani,” a tia. 40 Peter'n Chong dang tamtakin a ril minthâra; male atûnlâi ruolthar saloi ngei renga hih jôk roi, tiin a ngêna. 41 A chong a pom ngei murdi baptis an changa, ma nikhuo han mi isâng thum an inbôk sa zoi. 42 Tîrtonngei kôm inchûn, inlopkhômna inchelin bu khalâi ot inlopkhômna inchelin le chubaitho ningsiet takin an oma. 43 Tîrtonngei han sininkhêl kamâmruoi tamtak an tho sikin mitinin an rin ngei zoia. 44 A iempungei murdi chu inlopkhômin an neinunngei murdi an minchun zoi. 45 An rochonngei an neinunngei murdi juorin an nâng dungjûiin inmang inlômmin an insem ngâia. 46 Anîngtin mulung munkhatin Biekina an inkhôm ngâia an in tieng khom râisântak le mulungchuktakin bu khalâi an ôt ngâi. 47 Pathien an minpâka, mi murdi râisân lamin an oma. Hanchu, Pumapa minringa hong om tîr ngei chu anîngtin an lôm rangin a hong bôk pe bang ngâi ani.

Acts 2 (SBT1E)

In Other Versions