Acts 2 (TBT1E2)
1 Pentikos rangwu sa, Jisu hanpiite mina loong ah noksiit ni lomkhoon rumta. 2 Dotdi rang ni pong huuk ah likhiik, neng khoontong rumta nok dowa ih chaat rumta. 3 Eno tuihih likhiik weelu phaak arah japtup rumta ah neng sak ni ra taha. 4 Neng sak ni Esa Chiiala ah ra haano, chiiala ah ih wahoh wahoh jeng miijeng thuk rumta. 5 Deekrep dowa Rangte ra choote Jehudi nok hah loong ah Jerusalem ni songtong rumta. 6 Neng hoopti ah japchaat rum ano, miloong ah lomkhoon rumta. Jisu hanpiite loong ah maama jengjeng ih jeng rumta asuh miloong ah paatja ih rumta. 7 Neng loong ah paatja rum ano li rumta, “Arah jengla mina loong ah Galili nok hah! 8 Eno, nengjeng nengkong ah seng nok hah jeng jeng arah mamah ih chaat hi? 9 Seng loong ah Parthia, Media nyia Elam nawa; Mesopotamia, Judia, nyi Kappadosia nawa; Poontas nyia Esia nawa, 10 Phrigia nyia Pamphilia nawa, Ijip nyia Sirene reenawa Libia hah ko nawa. Seng loong mararah ah Room nawa, 11 Ranglajatte loong ah seng Jehudi damdi Judaisim ih roonghoon haano Judaisim angli, seng loong ah mararah langli Kritte nyia Arab nawa—rabah uh neng jeng ah seng jenglam ih Rangte mootkaat elong jen mokah arah tiit roongwaan rum arah chaat hi!” 12 Neng loong ah paattek nyia tanyah damdi, neng jaachi ni chengmui rumta, “Erah tiim suh liiha?” 13 Eno rukho loong ah Jisu hanpiite loong ah damdi doondaak siitkook ih rumta, Neng ih liita, “Arah miloong ah kham ih mok rumla!” 14 Pitar ah heliphante asih wasiit damdi roong toonchap ano miloong ah damdi erongwah phang jengmui rumta: Jehudi joon awan loong nyi Jerusalem ni songtongte loong, boichaat thaak he erah tiim asuh liiha erah toombaat rumha. 15 Arah mina loong ah kham ih tamokka, sen ih mokthun ehan; amadi rangkhah phek kaattok angla. 16 Arah bah khowah Joel ban jengta ah angla: 17 ‘Rangte ih liita, rangthoon doh Ngah ih amah re ang;Ngaachi ngaala warep khoh nah ang ah.Sen sah minuh miwah loong ih nga tiitkhaap baatrum ah;sen jaaro loong ah ih motmang tup rum ah,sen teekaang loong ih mangphe mang ah. 18 Minuh miwah, nga jeng chaatte loong suh,Erah tokdoh ngah ih chiiala koh rum ang,Eno neng ih nga tiitkhaap baatrum ah. 19 Ngah ih paatjaajih rangkhothung nah noisok angNyia hah khui nah uh paatjaajih ang ah.Erah doh sih, we nyia weekhot ang ah; 20 elongthoon Teesu rangka Rangwu thok ha doh,rangsa ah nakdat ih ah,nyia laphui ah sih likhiik ih saangdat ah. 21 Eno, o ih Teesu men poon ah erah mina ah epui ih ah.’ 22 “Jerusalem dowa mina loong, arah jengkhaap ah boichaat an! Najaret dowa Jisu taang ni chaan aphaan jeela, mih paatjaajih loong ah Rangte ih Jisu jun ih noisok tahan. Sen miksok ni mamah angta, loongtang ih jat ehan. 23 Heh kaankoong jun ih Rangte ih Jisu ah rangdah mina sen loong asuh bangphak khoni tekrapbot thuk tahan. 24 Enoothong Rangte ih heh chaan nawa ih saatsiit ano ngaakthing ih thukta, timnge liidi etek ih heh tajenta. 25 Dewid ih heh suh liita,‘Saapoot rookwet nga Teesu ah nga ngathong ni tup hang;heh reenah ngah tasootsaam kang. 26 Erah raangtaan ih ngah tenroon ih tonglang,nga jengkhaap adi tenroon jeela.Ngah, tekte ang ang bah uh,nga laalom theng adoh naangtong ang, 27 timnge liidi an ih tek lampo nah ngah tathiinhaat rang;adoleh an jeng chaatchaatte loong ah mangbeng nah tah chaam thukko. 28 Roidong lam ah an ih noisok ih halang,nga reenah ang uno tenroon ih tongthuk hang.’ 29 “Nga joonte loong, sengte sengwah Dewid Luuwang khiikkhi ah sen suh baat jaatjaat ejih. Heh ti ano bengta, heh mangbeng ah amadi uh eje. 30 Heh khowah angta, Rangte ih baatta ah heh ih jat eta: Rangte ih kakhamta Dewid sutom dowa wasiit heh teewah likhiik Luuwang dongthuk ah. 31 Rangthoon doh Rangte tiimjih re ah erah Dewid ih bantup eta, erah thoidi Kristo ngaaksaat tiit ah baatta,‘Heh tek lampo mongrep ni tathiin haatta,Heh sak ah mangbeng ni tachaamta.’ 32 Jisu ah Rangte ih tek nawa ngaaksaat ih thukta, seng loong ah ih jat ehi. 33 Jisu ah ngaaksaat thuk ano heh Wah Rangte ih jaawah ko tong thukla, eno Heh kakham jun ih Esa Chiiala ah choh eha. Amadi sen ih tiimjih tup han nyia tiimjih chaat han ah langla seng raangtaan ih ranglakkot. 34 Tiimnge liidi Dewid ah rangmong ni tawangta; erah nang ebah Dewid ih liita,‘Teesu ih nga Teesu suh liita:Anpi anra loong ah ngah ih an lathong nah maang thiinthiin 35 nga reenah jaawah ko tong uh.’ 36 “Jerusalem dowa miloong ah ih jat ejih, Jisu ah sen ih bangphak ni tek haat tan ah Rangte ih Teesu nyia Kristo ang thukla!” 37 Miloong ah ih jeng ah chaat rum ano, rapne sootsaam rumta Pitar nyia kaamwah loong suh li rumta, “Phoh ano loong seng ih tiimjih etheng ah?” 38 Pitar ih baat rumta, “Sen loong ah rangdah nawa sa ejih eno Jisu Kristo mendoh sen rangdah biin anaan suh juutem theng; eno Rangte lakkot Esa Chiiala ah choh an. 39 Rangte ih kakhamta ah sen raangtaan ih nyia sen sah loong raangtaan ih, adoleh o mina heh re nawa haloot ni angla erah loong raang ih—erah langla o mina seng Teesu Rangte ih heh jiinni poon rumha erah loong raangtaan ih.” 40 Pitar ih neng suh jengthoon ah jirep jenglam ih jatthuk ano li rumta, “Lajak miloong ah raangtaan ih chamnaang rangwu thok hala erah dowa maama teenuh teewah puipang an!” 41 Pitar jengkhaap ah hanpi rum ano miloong ah juutem rumta, erah sa dowa ih hajaat jom mina ih jaatjaang rumta. 42 Kaamwah loong taangnawa nyootsoot rumta di, rangsoom suh lomtong rum adi nyia phaksat room phaksah rum adi neng saapoot ah liin eta. 43 Kaamwah loong asuh mih paatjaajih loong reethuk kano, warep paatjaata. 44 Kristaan loong ah rangsoom rangtu eroomroom ih tongtha rum ano neng huikhaak uh eroomroom ih maak rumta. 45 Neng hah ah sangleh, o tiimjih jamha erah jun ih ngun ah phe phaksah ih rumta. 46 Rangwu rookwet Rangteenok ni eroomroom ih chomui rumta, neng nok ni phaksat ah roongngit roongkhu nyia tenroon woksoon, ih room phaksah rumta, 47 enooleh tenroon woksoon ih rangphoong rangsoom tongtha rumta. Eno rangwu rookwet khopiiroidong chote loong ah Teesu ih neng damdi weewe thok ih thukrum taha.