Psalms 105 (TBIAOTANT)
1 E bar Ikiavɨra Itir Godɨn ziam dɨponɨva a mɨnabaka.Egh ingangarir ekiar an amizibar gun Kantrin Igharazibar Gumazamiziba bar me mɨkɨmam. 2 E Ikiavɨra Itir God bagh ighiaba bangɨ egh an ziam fam.Egh bizir aghuir an amizibar gun mɨkɨmam. 3 Gumazamizir Ikiavɨra Itir Godɨn boroghɨn zuiba,uan navir averiabar a bagh bar akongegh.E an ziar aghuim gɨnɨghnɨgh,an ziar ekiam bar a pɨrafɨ bar akuegham. 4 E zurara Ikiavɨra Itir Godɨn boroghɨra mangɨuarir akurvaghsɨ an gavgavim bagh an azangsɨgham. 5 5-6 Ia Abrahamɨn ovavir boriba,Abraham an Ekiamɨn ingangarir gumazim.Ia Jekopɨn boriba,ia Ikiavɨra Itir God ua baghavɨra inabazir gumazamiziba,ia arazarazir ekiaba koingangarir gavgavir an amiziba koakar a en apanibagh asɨghasɨgha mɨkemeziba,ia uam adagh nɨghnɨghvɨra ikɨ. 7 Ikiavɨra Itir God, a en God.A nguazir kamɨn gumazamiziba bar me gativagha men gari. 8 Ikiavɨra Itir God e koma Akar Gavgavir mam gami,egh zurazurara Akar Dɨkɨrɨzir Gavgavir kam gɨnɨghnɨgham.An Akar Dɨkɨrɨzir Gavgavir kam gɨnɨghnɨgh mangɨvɨra ikiam. 9 An Abraham ko Akar Dɨkɨrɨzir Gavgavir kam gami.Egha Aisak koma Akar Dɨkɨrɨzir Gavgavir kam akɨri. 10 An Akar Dɨkɨrɨzir Gavgavir kam Jekop koma a gami,a Israelian ovavim,egha Akar Dɨkɨrɨzir Gavgavir kam gavgavim a ganɨngi,eghtɨ a zurara ikɨ mamaghɨra ikiam. 11 Ikiavɨra Itir God kamaghɨn mɨgɨa ghaze,“Kɨ Kenanɨn nguazim nɨ danɨngam,eghtɨ nguazir kamkar nɨn ovavir boribar nguazim.” 12 Fomɨra Israelia bar avɨrasemezir puvatɨgha,egha Kantrin Igharazibar Gumazamizibar mɨn pura Kenanɨn nguazimɨn iti. 13 Egha Kantrin Igharazibar Gumazamizibar mɨnpura tintinibar dagh aruavɨra iti. 14 Ezɨ God tarazi ataghizɨ,me me mɨsogha me abɨnizir puvatɨ.A men akurvagha me baghaAkar Gavgaviba atrivibagh anɨga me dɨkabɨra ghaze, 15 “Kɨ ua bagha mɨsevezir gumazamiziba,ia me gasɨghasɨghan markɨ!Ia nan akam inigha izir gumaziba pazɨ me damuan markɨ!” 16 Ikiavɨra Itir God mɨtiriar aghazir ekiam amadazɨ,a nguazimɨn oto.A men daghebagh amizɨ,da bar gɨfa. 17 E fo, a Josep amadazɨa uan adarazir faragha ghua Isipɨn kantrin iti.Me dagɨaba bagha Josep amadazɨ,a Isipɨn kantrin aven ingangarir gumazir kɨnimɨn mɨn iti. 18 Ezɨ Isipia paza a gamuasenɨn gavgavimɨn an suemning gike.Egha ain ring an fɨrim dafa. 19 Ezɨ Josep ikia ghuavɨra itima,bizir a mɨkemeziba guizbangɨram otifi,Ikiavɨra Itir Godɨn akam kamaghɨn aka,Josepɨn akaba da guizbangɨra. 20 Ezɨ gɨn Isipɨn atrivim gumazir mam amadazɨ,a ghua kalabusɨn Josep inigha azenim gatɨ.Guizbangɨra, gumazamizir avɨribar garir atrivir kam Josep ataghizɨ,a fɨriaghɨrɨ. 21 Atrivir kam Josep inighauan bizibar ganasa gumazir dapanimɨn anetɨ.Ezɨ Josep Isipɨn gavmanɨn gumazir dapanimɨn iti. 22 Josep atrivimɨn dɨpenimɨn ingarir gumaziba ko, gumazir nɨghnɨzir aghuiba a ganɨdiba,a me gativagha men sure gami. 23 Jekop gɨn ghua Isipɨn kantrin otogha,nguibar igharazimɨn gumazimɨn mɨn puram an guraghav ikia iti. 24 Ikiavɨra Itir God uan adarazir akurazɨ,me borir avɨriba bate.A me gamizɨ, men dɨbobonimmen apanibar dɨbobonim gafira. 25 God Isipia gamizɨ,me an gumazamizibar apanim gamua,egha pazɨ me damuasa tuaviba buri. 26 Gɨn, God uan ingangarir gumazim Moses ko Aron, a mɨsevezir gumazim, an aning amada,ezɨ aning Isipɨn kantrin zui. 27 Aning Isipɨn kantrin ikiaGodɨn mirakelba ko dɨgavir kuram gamir arazarazibagh ami. 28 Isipia Godɨn akam batoghavɨra iti.Kamaghɨn amizɨ, God mɨtarmer bar ekiam gamizɨ,a men nguazim avara. 29 A men dɨpabagh amizɨ, da bar ghuzibar otivizɨ,men osiriba bar ariaghire. 30 Mɨtiviba otiva bar avɨrasemegha men nguaziba bar adagh izɨfa,egha uaghan atrivimɨn dɨpenir ekiam gizɨfa. 31 God mɨkemezɨ, bereziba ko itiba otiva bar avɨrasemeghamen nguazim bar a gizɨfa. 32 Amozimɨn danganimɨn, God amozir ofɨzir ekiar dagɨabar mɨn gariba amadazɨ da nguazimɨn izaghirɨ.Ezɨ onɨmarim taghtagha nguazimɨn izaghira men nguazim gasava amadi. 33 God tuavir kamɨn men wainɨn ikarɨziba ko men fighɨn temebagh asɨghasɨki,egha men nguazimɨn temeba bar ada apɨragharɨki. 34 A mɨgeima, odeziba otifi.Ezɨ dar dɨbobonim bar ghuavanabozɨ,gumazitam dar ponan iburagham. 35 Odezir kaba, bizir dafariba itiba, bar ada ame.Dagher me opariziba, uaghan odezir kaba bar ada ame. 36 God Isipian adarazi bar,men otarir ivariaba bar me mɨsoghezɨ me ariaghire. 37 A gɨn Israelia inigha Isipɨn kantri ategha azenan ghu.Me gol ko silvan avɨriba inigha da sara ghue.Egha me bar moghɨra mɨkarziba deragha gavgavigha azenan izi. 38 Dughiar kamɨn Isipia Israelian atiatingi.Me zuima, datɨrɨghɨn Isipia bar akonge. 39 God ghuariar ekiar mam isa overiamɨn pɨn anetɨzɨ, a me avara.Ezɨ a dɨmagaribar ghuariam gamizɨan avimɨn mɨn isia isiragha angazangarim me ganɨdi. 40 Me dagheba bagha an azangsɨsi, ezɨ a kuaraziba amadazɨ da izi me da ame.Egha a uan Nguibamɨn bretba isame bagha da amadazɨ, me da apa bar izefe. 41 A dagɨam gamizɨ, a kuiaghirɨzɨma,dɨpam otogha ivemara ghuadɨpaba puvatɨzir danganimɨn Faner ekiamɨn mɨn oto. 42 Guizbangɨra, Ikiavɨra Itir God uan ingangarir gumazim Abraham koma Akar Dɨkɨrɨzir Gavgavim gami,egha an a gɨnɨghnɨghavɨra ikia, bizir kabagh ami. 43 Kamaghɨn amizɨ, a uan gumazamiziba inigha zui.Gumazamizir kaba, a ua baghavɨra me amɨsefe,ezɨ me bar akuegha ighiabagh amua zui. 44 A gumazamizir igharazibar nguaziba isa me ganɨngi.Egha uan adarazir amamangatɨzɨ,me gumazamizir kabar azeniba ko nguibaba ini. 45 God kamaghɨn ifonge,Israelia zurara an arazir a ifongeziba ko an Arazibar gɨn mangam.Kamaghɨn amizɨ, a me bagha bizir aghuir kabagh ami. Aleluia!E Ikiavɨra Itir Godɨn ziam pɨrafam!