Colossians 1 (TOMA)

1 Nɛ̀i gè ga Pɔle, nà ga Yesu Kilista ná-keelai, GALA ziimai maaʋele ma, gá ade-ɠɛɛloin Timɔte, 2 gá wo luʋɔsu, GALA ná-nuɓusɛiti, wɔi wo Kolɔse taazuʋɛ, gi-ɠɛɛleaiti gilibalai zu ada Kilista, wɔi wo ga wooɠɛɠila nuiti: Ade-Ɠɛɛ GALA ge zaalai la wo ma, é ziilɛigi ve wo ʋɛ. 3 Gá GALA mamasu ɠɔ, de-Maliɠii Yesu Kilista Kɛɛɠɛ ya, siɛgi zu gá ɠɛna GALA falia la wo ʋɛ. 4 Tama, gi wa-ɠidaaleʋe vai mɛnini Yesu Kilista ma, ta nɛɛbɛi é wo-yiimaʋɛ, é lo GALA ná-nuiti pɛ ba. 5 Naama ɠidaaleʋei ta ma nɛɛbɛi ʋilɛgɛ naa ʋa, nii é ga wa-ɠitogi GALA ge makɛsu wo ʋɛ geeɠɔlɔgi zu. Kitogi naa, wo kwɛni ga gaamai ma lɛnɛgi maaʋele, é woni wo ma, nii é ga Woo Niinɛ Ʋagɔi. 6 Woo Niinɛ Ʋagɔi tɛi ge ʋaani wo ʋɔ bɛ. É ʋaani ga kulanumai, é li luɠɔ eteai zu ná pɛ, ʋelei é kɛai la wo zaama, kaite naama voloi, yeei mɔunpa wo GALA ná-zaalai ma wooi mɛnini da, wo tɔɔzei ga kwɛɛga, ʋelei é la ɠiteɠite. 7 Gi-nɛɛɲɔɠɔi Epafelase, gi boti ɠilagi zu, naa ɠa é wo ɠalagai ga naa, toɠa wo ʋɛ ga Kilista ná-botiɠɛ nui, é ga wooɠɛɠila nui. 8 É nɛɛbɛ vai wogɛ gi ma, nii Zɛnvu Ɲadegai feai wo ʋɛ. 9 Naa ɠa é ba, kaipa gi wo-maawooi mɛnini, gi la looɠosu GALA falii ʋa wo ʋɛ. Gá GALA falizu ga é wo laave ga ziimai ɠwɛɛgai ga ɠimalai maaʋele, ta keleɠelegi nii Zɛnvu Ɲadegai feezu. 10 Naazu, wa zoo wo ziɛ eɠɛʋelei Maliɠii pɔ la, wo ɗa naa ɠɛ yeenɔpɛ, nii nɛai bɛ. Wa gwaai wo ga kɛɛwoti ʋagɔi ma zii pɛ, wa li luɠɔma GALA kwɛɛgai zu. 11 GALA ge wo zɛbɛlɔ fai pɛ su ga ná-zɛbɛi maanɛai, nii a kɛ wo ziɛ fai pɛ bu ga ziilɔɔi. 12 À Ɠɛɛɠɛ GALA mama ga koozunɛɛi. Tɔ ɠa é zobo fea wo ʋɛ, ga wo wɔnɔ zɔlɔɔ poganiiti su, ti makɛgai wozakalagi ma masadai zu naati bɛ, ti ga ná-nuiti. 13 É ade ɠulaa kpidii ná-zobogi ya, é li ga deye nɛɛbɛ Loun Zunui ná-masadai zu. 14 De unmɔɔgi zɔlɔɔga ga tɔun maaʋele, é ade zuvaayɛ ga da-ɠotoiti. 15 GALAGI nu la kaazu, Kilista ɠa é ga naa maaniinigi. Tɔ ɠa é ga Doun Zunu Mɔungi, bɔɔlɔai kpɛtɛanii pɛ ba. 16 Mazɔlɔɔ GALA ge aniiti kpein kpɛtɛni ga Kilista maaʋele, geeɠɔlɔgi zu, zooi ma, niiti nu a ti ɠa ga ɠaazu, ta niiti nu la ti ɠa ga ɠaazu, masadaiti, maliɠilaiti, kundiɠilaiti, zobodaiti. GALA ge anii pɛ kpɛtɛni saɓui zu, ta tɔun bɛ. 17 Kaite toɠa ná aniiti pɛ tuɠɔ, ti pɛ ta ɠɛʋele ma tɔun saɓui zu. 18 Egilisii é ga kpusɛi, tɔ ɠa é ga naa ma ungi. Tɔ ɠa é ga fai pɛ tɔɔzeigi, Doun Zunu Mɔungi, buzeɠeai, é ɠula saai ya, naa ɠa a kɛ é ɠɛ ga ma mɔungi fai pɛ su. 19 Mazɔlɔɔ GALA ge deveni ga fai kpein daazeeliai, naa zei ziimaʋɛ. 20 Zenɔ ɠana, GALA ge deveni ga é ti yɔɠɔzuɓɛtɛ ta aniiti pɛ ga ná-Doun Zunui maaʋele, niiti ti eteai zu, ta niiti ti geeɠɔlɔgi zu. É ziilɛigi ɓɛtɛni ga ná-Doun Zunui ma ɲamai maaʋele, nii puai saa wului ma. 21 Wa ma, mɔungi wo maaɠoozani GALA ba, wo ɠɛni ga sili nuiti, tɔɔzei wo ɠɛni kisiɛ ɲɔiti bosu, wo ɗa faa ɲɔiti kɛ. 22 Kɛlɛ é wo yɔɠɔzuɓɛtɛa niizu ga saai maaʋele nii ná-Doun Zunui boga kpusɛi zu, ga é ʋa wo lo ɠaazu ɲadedai zu, kɔzɔzu nɔpɛ ge mina ɠɛ wo ʋa, ta peelalazu nɔpɛ. 23 Anɛɛ naa ʋe, kɛni wo lo kpaan, wo zapelɔ kidaaleʋei zu. À mina ɲiikpi, wo ʋa maaɠooza wa-ɠitogi ʋa, nii wo mɛnini ga Woo Niinɛ Ʋagɔi maaʋele. Niima Woo Niinɛ Ʋagɔi ɠa ga naa, nii daazeelini kpɛtɛanii pɛ ma eteai zu. Nà Pɔle, gè ɠɛa ga ma wotiɠɛ nui. 24 Kòozu ɠa nɛɛzu niizu nà-kpɔlɔiti su wa-vaa zu. Nii daa la zeelini Kilista ná-kpɔlɔi vaa zu, gè naa laazeeli kpùsɛi zu, nɔnɔ ma ɓusɛi ʋɛ, nii é ga Egilisii. 25 Gè ɠɛa ga Egilisii ná-botiɠɛ nui, eɠɛʋelei naama losuʋɛ la GALA ge kalivaai mà wa-vaa zu. É tèʋeni ga gè daawooi laazeeli, ta mina yɛ ʋoluzu. 26 Daawooi nii é ga GALA ná-faazeikpasui ma lɔɔɠuzu vai é ɠɛa lɔɔɠuni nuɓusɛiti ba kaite wɔlɔwɔlɔ, kɛlɛ é ɠulaa kɛlɛma niizu ná-nuiti bɛ. 27 GALA ge devea ga é dɛɛ ga tiye ga ʋelei naama lɔɔɠuzu vai maayikiai la gola zii ɠiligiti bɛ. Naama lɔɔɠuzu vai ɠa é ga: Kilista ɠɛ wo-yiimaʋɛ, lɛbiyai é ʋaazu, naa ma ɠitogi. 28 Gá Kilista ná-fai laazeelizu nui pɛ ma. Gá tɛnɛgi wosu, gi ɛsɛ pɛ kala ga ɠimalai pɛ, naa ɠa a kɛ ɛsɛ pɛ suzeeli ta-ɠilibalai zu ta Kilista. 29 Naa ɠa é kɛɛzu gè botii ɠɛɛzu, gè ɲɛpii ɠɔ ga Kilista ná-zɛbɛi, nii é botii ɠɛɛzu zìimaʋɛ ga gola.

Colossians 1 (TOMA)

In Other Versions