Ezekiel 27 (TOMA)
1 Ɠɔoɠɔ GALAGI ɓɔɛni pɔ̀, é ɠɛ mà: 2 «Ɗa ʋe, zunui, maawɔin wuyei loo Tiil taa wolai ma. 3 Ɗa ɠɛ Tiil ma: ‹Ee, ɗa ʋe è zeini kpoloɗɛi laaʋɛ,è yaaɠolai ɠɛɛzu wo yɔɠɔzu, wa ziɛla nuɓusɛiti pɛ,Maliɠii Ɠɔoɠɔ GALAGI wooi ɠaa:Ee, Tiil, ɗa ɠa è ɠɛni: Nà-pagi laazeeliʋɛ! 4 Ɗa-you ɠwɛmaʋɛ zeeliʋɛ kpoloɗɛi zaamaʋɛ,è lo nuiti ti ɗa-ʋagi laazeelini mɛtu. 5 Seniil sipɛlɛ guluiti ka ti è ɓɛtɛni ga tiye,è ɠakamaʋɛti pɛ kpɛtɛʋɛ ga naa.Ti Liɓan sɛdele gului ta zeɠeni,ti naa ɠɛ ga zaamazu wului. 6 Ti Ɓasan sɛne gulu wolai ta zaɠani ga kein kpizɛ mitɛiti,è ziɛ vai zu.Ti ɗa-lakaiti kpɛtɛni gaKitime ziɛ zaama yooiti ma sɛdele guluiti,see ɲiigai ʋɛai ti ʋa. 7 Ɗa-zeɠe wolai fiilɛi zeizu su,naa ɠɛni ga geze ʋagɔi suʋuai, Ezipete gelei,è yɛsu ɠoozama, ti ɗa è ɠwɛɛ.Seɠei naati ti looni ga ma ɓiinii ta ma ɓɔigi,é zeɠe ziɛ zaama yooi zu, daa ga Sipele,tandai naati ka ti ɠɛni ɗa-zɔɔlaiti makɛsu. 8 Sidɔn ta Aalevade nuiti kaè ɠɛni ti zeɠezu ga ɓato li nuiti.Tiil nuiti ti wola zooni,naati ka ti ɠɛni ga ɗa-ɓatoi ma ɠundiɠiiti. 9 È ɠɛni botiɠɛ nuiti seɠezu, ti Ɓiɓelɔse ɠima nuiti,ga naama ɲɛɛliɠi nuiti ti ɗa ɓatoi ʋalizuʋɛti kpɛtɛ.Kpoloɗɛi ɠaaʋɛ ɓatoiti ta ma wotiɠɛ nuititi ɠɛni ɠomisu è ʋɔ bɛ, ti ɗa ɗa-zɔɔlaiti geya. 10 Pɛɛlese zalaʋusuiti ta Lude geleiti, é ʋɛɛ Pute geleiti ba,ti ɠɛni botii ɠɛɛzu ɗa-zalaʋusui zu.Ti ɠɛni ga ɗa-ɠɔɔɠɔ nuiti,ti ɓena kɔɔɠɔ zɛpɛgiti ta ta-ɠɔlu wɔɔlɔgiti sɛlɛ è ʋɔ bɛ,ti ɠɛni ta ɓɔsu ɗa-lɔɠɔɠulagi ʋa. 11 Aalevade nuiti ta ɗa-zalaʋusuititi ɠakuni ɗa-ziɠigiti ma, ti ɗa ti makɛ.Gamade nuiti ti ɠɛni wɛlɛzu taai ma,ti ɠɛni ta-ɠɔɔɠɔ zɛpɛgiti sɛlɛsu siɠigi ʋa, koozuʋɛ,ti ɠɛni ɗa-ʋadai laazeelizu.› » 12 « ‹Wa Taalasise nuiti wo ɠɛni yaaɠolai ɠɛɛzu yɔɠɔzu, è-zɔlɔɔ ganiiti pɛ su ti mɔinni è ya. Ti ɠɛni ɗa-yaaɠo zɔɔlaiti geyazu ga walii, ta kɔlui, ta kɔlu ɓɔigi, ta bɔbɔgi. 13 Wa Yavan nuiti ta Tuɓale nuiti, naa ʋɛɛ Mesɛke nuiti ba, wo ɠɛni yaaɠolai ɠɛɛzu yɔɠɔzu, ti ɗa duɔiti fe è ya ta kɔlu ɓɔigiti ga ɗa-yaaɠo zɔɔlaiti maavalibogi. 14 Ɓɛte-Togaalema nuiti ti ɠɛni kɔɔɠɔ zooiti teʋesu ɗa-lɔɔɠɔi zu, ta kɔɔɠɔ zoo ɓulugiti, ta soovale fuuluiti. 15 Wa Dedan nuiti wo ɠɛni yaaɠolai ɠɛɛzu yɔɠɔzu. Ziɛ zaama yooi bɔɔlɔzu ná-yaaɠolai ɠɛni ɠɛɛzu è yeezaama, ti ɠɛni ɗɔnɔ ma lɔnɔgi zalazu ga see ɲiigaiti ta ebɛne wuluiti. 16 Wa Siili yooi wo ɠɛni yaaɠolai ɠɛɛzu yɔɠɔzu, ti ɗa è yea aniiti geya, wo ɠɛni ti ɓɛtɛzu ga bɔɔlɔa. Ti ɠɛni ɗa-lɔɔɠɔiti sulaavesu ga kɔtu zɔngɔ ɓaagiti ti ga gelenategiti, ta seɠeiti ti loai ga ma ɓɔigi, ta seɠe zuʋuaiti, ta geze ʋagɔ zeɠeiti, ta kpɔzɔiti, ta kɔtu zɔngɔ ɓaagiti ti ga luɓiiti. 17 Wa Zuda ta Izilayɛle yooi wo yaaɠolai ɠɛɛni yɔɠɔzu, ti ɠɛni Minite moloi leʋesu è ma, ta gatoiti, naa ʋɛɛ kɔin gulɔi ta gulɔi ʋa, ta gulɔ maku nɛɛnɛgiti. 18 Wa Damase nuiti wo yaaɠolai ɠɛɛni yɔɠɔzu, ti ɗa wo-yeaɠɔligiti geya, wo ti ɓɛtɛni ga bɔɔlɔa, ti ɠɛni Ɠɛlebon lɔɔi veezu wo ya, ta Saɠaal ʋaala deɠa ɠolegi. 19 Vedan ta Yavan ta Uzale wa naati wo ɠɛni yaaɠolai ɠɛɛzu yɔɠɔzu, ga kɔlu ɠaingaiti niiti ti ɓɛtɛai mɛtu, ta kasegi, naa ʋɛɛ seeli kpaɠa maku nɛɛnɛgiti ba. 20 Wa Dedan wo ɠɛni yaaɠoi ɠɛɛzu yɔɠɔzu ga soo maaɠili zɔɔlaiti. 21 Wo yeezoni wa Alaɓuiti ta Kedaal you ɠundiɠiiti pɛ, ti ɠɛni pɔdii loozu è ma ga baala ziʋoiti, ta baala sinɛ wolaiti, ta boli zinɛiti. 22 Saɓa ta Layema yaaɠoiti ti ɠɛni pɔdii loozu è ma. Pɔdi anii ti ɠɛni teʋesu ɗa-lɔɔɠɔi zu, é ɠɛni ga tufa maku nɛɛnɛgi ma ʋagɔi ma zii pɛ, kɔtu zɔngɔ ɓaagi ma zii pɛ, ta zanugi. 23 Wo ɠɛni pɔdii loozu ɓɔɠɔ ma wa Ɠalan, Kané, ta Edɛn, taa wolai naati, ta Saɓa yaaɠoiti, ta Asiili, ta Kilimade. 24 Nii ti ɠɛni pɔdizu è ma, é ɠɛni ga seɠe laaɓaagiti, tookɔba wolaiti ma ɓɔigi, seɠe zuʋuaiti, seɠeiti ti ʋɛɛzu pɛlɛwuʋɛ, galu vɛlɛaiti ta ma maaɓiligiti, naati ti ɠɛni ɗa-lɔɔɠɔi zu.› » 25 « ‹Taalasise ɓato wolaiti ka ti ɠɛni ɗa-zɔɔlaiti mɛɛnsu.È ʋɔ bɛ laaveni, è ɠasɔɠili ga pɔdi anii kpoloɗɛi zaamaʋɛ. 26 Ɗa-ɠein dii nuiti ti liini ga ɗe ziɛ wuuzeigi zaamaʋɛ,folo ɠulazu ʋele viilɛi è zuɠaleɠaleni kpoloɗɛi zaamaʋɛ. 27 Ɗa-naavoloiti, ɗa-laamianigiti, ta ɗa-ʋɔdi aniiti,naa ʋɛɛ ɗa-nuiti ba ti botii ɠɛɛzu ziɛi ɠa, ta ɗa-ɠein dii nuiti,ɲɛɛliɠi nuiti ti ɠɛni ɗa-ɠeingiti kpaalɛzu,ta yaaɠoiti ti ɠɛni ɗa-ʋɔdii loozu,naa ʋɛɛ ɗa-zunuiti kpein ba ti è ya ga salaʋusuiti,ta bɛbɛi gaalɛai ba è ma,ti pɛ ta ʋu ya kpoloɗɛi zaamaʋɛ,voloi è loozu bu la. 28 Keingi zu wotiɠɛ nuiti ta-ɠidaaʋili kpeei ɠaziɛla nuiti pɛ suɓali ɲɛgɛlɛin. 29 Naazu zɔiti pɛ kein dii mitɛi ti ya,ta ɠula ta-ɓatoiti su.Kein su wotiɠɛ nuiti, kpoloɗɛi ɠaa ɠein dii nuiti pɛ,ta lo zooi ma. 30 Ti pɛ ta ɓain ɗa-vaa zu,ta wɔlɔ ga gola.Ta fufiligi ʋu tɔungiti ma,ti ɗa ɠilikili zuʋui zu. 31 Ta tɔungiti kpuye ɗa-vaa zu,ti saa wɔlɔ wo seɠeiti too ɠɔba,ti ɗa wɔlɔ è ma ta-yiiɠoloɠologi zu, ti ɗa zɔngɔ. 32 Ta-yiiɓɔlɔi zu, ti ɗa gɔlɔi wo è ma ga maawɔin wuyei,ti ɗa saa wɔlɔi wo ga:Ɓɛ ɠa é ɠɛni ga Tiil ɠɛʋele,taai tɛi kɛʋele goloai kpoloɗɛi zaamaʋɛ? 33 Siɛgi zu ɗa-ʋɔdi aniiti ti ɠɛni liizu la kpoloɗɛi ɠa,è ɠɛni nuɓusɛ mɔinmɔin maavaa ɠɛɛzu.È-zɔlɔɔgi ná-mɔin maaʋele ma ta ɗa-ʋɔdi zɔɔlai,è ɠɛni etea masagiti ta-ɓɛtɛi lɛɛzu su. 34 Kɛlɛ wɛlɛ, ɗa ɠaa è zuɠaleɠaleai kpoloɗɛi ma lakpatakpagiti zea,è ʋilini ya ziɛi ɓoma munu.Ɗa-ʋɔdi aniiti ta wɔiti wo botii ɠɛɛzu ʋɔɔma,ti pɛ ti ungi yɛga kpoloɗɛi wu. 35 Ziɛ zaama laaiti ma nuɓusɛiti sasuɓaliaga naama vaiti ti zeeliai è ma.Ta-masagiti sasu ɠa ɓalizu ga duai.Maaɠilii é ti ma, toɠa ɠaazu ti-ɠaazuʋɛti. 36 Yaaɠoiti ti zii ɠiligiti saama, ta foei vɛɛzu è ma,è ɠɛa ga ti maalua anii,è ɠoloɠologa, è la mɔ wuzeɠea eyɛsu ɠɔ!› »