Ezekiel 7 (TOMA)
1 Ɠɔoɠɔ GALAGI ɓɔɛni pɔ̀, é ɠɛ mà: 2 «Ɗa ʋe, zunui, Maliɠii Ɠɔoɠɔ GALAGI wooi ɠaa Izilayɛle nuɓusɛiti ma:‹Wɛlɛ, yeeɠɛɠala ɠaaɓelagi ɠaa!Ma ɠaaɓelagi zeelia zooi ma zoko naanigɔi pɛ bɛ. 3 Niizu wɔnɔi ɓega,nà nà-ziiɠaawanai lɛɛzu ga woye,gè wo-ziɛ ʋelei ma lukpɔi ɠaaleʋe,gè wo zala, é zoloo wa-ɠɔzɔba vaiti ma. 4 Gè la wo ɠaazumaawɔinɠaa, gè la wo makɛga.Nà wo zala ga wo-ziɛ ʋelei ta wa-ɠɔzɔba vaitiwo ɠatani ti ɠɛɛ vai ʋa.Wa suɠwɛɛ naazu ga nà ɠa gè ga Ɠɔoɠɔ GALAGI.› 5 Maliɠii Ɠɔoɠɔ GALAGI wooi ɠaa:‹Nimizai, nimiza ɠila kpegi,kɛɠala la ná, naa ɠa é ʋaazu! 6 Gaaɓela foloi zeelia.Gaama ʋe, é zeelia,wɔnɔi ɓega, toɠa nuu é ʋaazu. 7 Wo ɠoloɠolo foloi ʋaa, zooi ɠaa nuɓusɛiti!Ungo, yeeɠɛɠalai zeelia, foloi maaɓuɠa.Wɛlɛ, kidaaʋili fai ɠa é gizeiti ma,koozunɛɛi ʋotogi zu. 8 Niizu gaamago nɔ, nà nà-ziiɠaawanai lɔɔzu wo unga,nà zeelizu nà-ziiɠulagi ɠwɛgi ma wo laalɔɠɔma.Nà wo lukpɔɠaaleʋezu é zoloo wo-ziɛ ʋeleiti ma,gè wo zala ga wa-ɠɔzɔba vaiti pɛ. 9 Gè la wo ɠaazumaawɔinɠaa, gè la wo makɛga.Nà wo zala ga wo-ziɛ ʋelei ta wa-ɠɔzɔba vaitiwo ɠatani ti ɠɛɛ vai ʋa.Wa suɠwɛɛ naazu ga nà ɠa gè ga Ɠɔoɠɔ GALAGI, é wo loɠazu.› » 10 «Wɛlɛ tukpɔɠaaleʋe voloi ʋa,faa zuɠoloɠologi ɠɛʋele ɓɛtɛa.Doɠa ɓakɔi ɠɛʋele ɓɛtɛa!Wasogi zuwɔɔlɔa! 11 Toomai wuzeɠea,ga é ɠɛ ga kpakɔi é lo faa ɲɔu ɠɛɛ vai ʋa.Tanɔpɛ ge la yɛga ná ɲɛgɛlɛin,anɛɛ niima nuɓusɛiti su,ɓaa bɛbɛ wolai nii é zɔngɔzu,ɓaa ti wɔɔlɔ ʋelei ta ta-lɛbiyai. 12 Yeeɠɛɠalai ɠana zeeli,ma voloi maaɓuɠaa,ani ɠeya nui la mɔ ɠoozunɛa,zɔi é ani ʋɔdizu, naa la mɔ ɠaazuɠilia,mazɔlɔɔ nà-ziiɠaawanai ɠa nuɓusɛi pɛ daalɔɠɔma. 13 Ani ʋɔdi nui la zooga é ʋa ná-sɔɔlai zɔlɔɔ ʋolu,anɛɛ ni toɠa yɛ vulua.Tɔɔzei fai deveai nuɓusɛiti pɛ ma, é la zeɠea ma.Ti pɛ ta eteai ziɛzu faazupui zu,tanɔpɛ ge la zooga é ʋa yɛ vulua. 14 Ta yɛ puʋugi vɛɛzu ɠɔ, ti fai pɛ kpɛtɛ,kɛlɛ zunu nɔpɛ ge la lia kɔɔmaʋɛ,mazɔlɔɔ nà-ziiɠaawanai ɠa nuɓusɛiti pɛ daalɔɠɔma.» 15 «Kɔɔi ɠa ɓɔi taazuʋɛ,ɗɔfɔ zeeɓɛi ta pului ɠɛ pɛlɛyeɠeiti bu.Zɔiti ta ɠɛ ɓalaɠaiti su,naati ta za kɔɔi zu,niiti ti taazuʋɛ,naati ti loo bu ga pului ta ɗɔfɔ zeeɓɛi. 16 Niiti ta yɛ vulua, ta ʋela, ti li gizeiti ma.Eɠɛʋelei poopogi a ɗa kpalagi wo da,ti pɛ ta kpalagi wo ta-vaaɠaaza golaiti faa zu. 17 Ti-yeeiti su ɠa ɠɛ yɔɔɠɛ,ti-ɲiibiiti su ɗa ɓali. 18 Ta saa wɔlɔ wo seɠeiti too ɠɔba,ti zasu ɗa ɓali ga dualuagi,ti-ɠaazuʋɛ maalɔɔɠu ga unfegi,tɔungiti pɛ kpuyegai. 19 Ta ta-waliiti pili ya taazuʋɛti,ta ta-zanugiti deve ga kɔzɔba aniiti,mazɔlɔɔ walii ɓaa zanugi la zooga é ʋa ti ɠizo,Ɠɔoɠɔ GALAGI ná-ziiɠaawana voloi zu.Ani la mɔ ɠɛa ti ya a kula ɠɛ ti-ɠɔdayeɠei zu,ɓaa a ti-ɠogiti sulaave,mazɔlɔɔ walii ta zanugiti ka ti ɠɛni gati ɠɔɠɔziɠa ɠɔtui ta-vaaɠaaza golaiti faa zu. 20 Ta-ɠɔbu ani pagɔiti ka ti ti ɠɛɛni ga ta-waso ganii,ti naati kpɛtɛni ga kɔɔɠɔ ganigiti, ti ɠɔzɔai, ti maayo ge zeɠe.Naa ɠa é ba, nà naa ɠɛɛzu ga ti ɠɔzɔ anii. 21 Nà wɛɛinti zɛsu na, ti ʋa, ti loo ma naavoloi zu,zooi zu nu ɲɔiti ti kɛ ga kɔɔzoganii,ti ɓega ʋoluma ga kɔzɔ. 22 Nà ʋoluave ti ʋa,ta nà nɛ̀ɛbɛ adaʋɛ yɛ ná, ti ná ɠɔzɔ,toosu nuiti ta lɛ ná, ti kɔzɔ. 23 Kɔlu yɔlɔɠɔi ɠɛʋele ɓɛtɛ,mazɔlɔɔ zooi zulaavega ga ɲama ʋuu lukpɔɠaaleʋei,taai zulaavega ga toomai. 24 Nà ʋaazu ga zii ɠiligiti ti ziliai gola,ti ta-ʋɛlɛiti so.Gè zobobɛ nuiti ta-wasogi ɠwɛteʋe,ta-zalaɠa ɠulazuʋɛti ti ɠɔzɔ. 25 Kidaaʋiligi ʋaa!Ta ziilɛigi ɠaiziɛzu, kɛlɛ ti la sɔlɔɔsu. 26 Maanɔɠɔi ɠa ʋa, é la maanɔɠɔi ma,woo ɲɔi ʋa, é la woo ɲɔi maazu,ti ɗa GALA goo wo nui maanɛɛnɛ ga é kulakɛlɛmai ta lɛ.Zalaɠa ɠula nui la mɔ nu ɠalaga,kɛwolaiti ti la mɔ nu lɛnɛga. 27 Masagi ɠa zei gaazuɗɛʋui zu,kundiɠii ɠɛ kidaaʋiligi zu,nuɓusɛiti sasu ɗa ɓali ga duai.Nà ʋaazu ti zosu, eɠɛʋelei ti luʋa ʋeleiti ti la,gè ti lukpɔɠaaleʋe, eɠɛʋelei soloogai la ti ma.Ta suɠwɛɛ naazu ga nà ɠa gè ga Ɠɔoɠɔ GALAGI.»