Isaiah 59 (TOMA)

1 Ɓa-o, Ɠɔoɠɔ GALAGI yeei la ɓuɠani nu magala faa ma,ɓaa goizu ʋa ɓɔlɔ faa mɛni faa zu. 2 Kɛlɛ wa-vaaɠaaza golaiti kati wo ʋalisu ma wa GALA,wa-ɠotoiti ka ti kɛɛzué ɠɔgi zeɠe wo ʋɔ pelei,ga é mina wo woomɛni. 3 Mazɔlɔɔ ɲamai ɠa wo-yeeiti ma,wo-yeeɓeɠaiti kɔzɔʋɛ ga faaɠaaza golaiti,zɛɛi ɠa é ɠulazu wo-laaʋɛti,wo-nɛgiti ta famai wosu. 4 Tanɔpɛ ge la ɓaazaɠazu tukpɔɠaaleʋezu ga teleboda,ta la tukpɔlosu ga pagɔ,ta zeizu wafuun fai maazu,ti ɗa gaaʋalaba vaiti bo,nu ɓɔlɔ wɔin nɔ ɠa ti-yiimaʋɛ,naama loin ɠa ti sɔlɔɔsu ga telebotalalai. 5 Ta ʋɛɛni pɛɛɠaali ɠain ma,ziingo lɛdɛi ɠa ti fɛlɛzu.Zɔi a naama ɠain miina, toɠa za,ma ɠain ɠilagilagi ti ʋɛɛni ma,a saɠana, pɛɛɠaalii ɠa ɠula su. 6 Ta-ziingo lɛdɛi la nu ɠulaa seɠe vaa zu,é la zooga é ʋa nu maaɠili.Ta-ɠɛɛwotii ti kɛɛzu, toɠa ga kɛɛwoti ɲɔi,ta tooma vai ɠɛɛzu ga ti-yeeiti. 7 Ti-ɠɔɠɔi maavilɛʋɛ liizu faa ɲɔu ɠɛɛzuʋɛ,ti zuvilɛ nu ʋagɔi undaaʋilisu.Ta-ɠisiɛiti ta ga kisiɛ ɲɔiti,faa zuɠoloɠologi ta gaaʋalaba vai ɠa é ta-ʋeleiti su. 8 Ti la ziilɛi pelei ɠwɛɛ,sɔle faa la peleiti su ti ziɛzu la.Pele goiti ti ti laazu, ta ga peleiti ti zuɓiligai,nu nɔpɛ a ʋilɛna su, é la ziilɛigi ɠwɛɛ. 9 Naa ɠa é ba, sɔledai maaɠoozaa ade ʋa,telebodai la zeelizu de ma.Ade ɠɛni ɠitosu wozakalagi ʋa,adaʋɛ pɛ suɓidia,ade ɠɛni foloi maaɓɔunsu,da ziɛzu kpidii zu. 10 Da yeeʋɛɛzu mɛmɛ pɛlɛi ʋa eɠɛ gaazuɠole nu,da yeeʋɛɛzu mɛmɛ eɠɛ nuiti gaazu la ti ʋɛ.De ɠɔɠɔi ɗa ziɠa folo gaalɔgai eɠɛ kpidi ɓɔii zu,anɛɛ ni de ɠɛdɛgɛ ga pagɔ,de ɠulaʋɛ ga ʋe da gɔvɛiti. 11 De pɛ de ɠɛni zikɔzu eɠɛ filɛ zuai,de la ɠɛa ɓesu kpalagi ʋa eɠɛ poopogi,de ɗa ɠito sɔle faiti ba, kɛlɛ é la ná,kizogi, kɛlɛ naa maaɠoozaai de ʋa! 12 Mazɔlɔɔ gá-lɔ koloɠologiti suwɔɔlɔʋɛ gola è laalɔɠɔma,ta gá-ɠotoiti ta gi ʋeelalazu.Gá-lɔ koloɠologiti giliʋɛ gi ʋa,gi gá-vaaɠaaza golaiti kwɛɛ. 13 Gá ga tɔ koloɠolo nuiti,gi Ɠɔoɠɔ GALAGI yaavani,gi ʋoluave fai zu gá-ƓALAGI ná-faiti ba.Gi ɠɛni ɠisiɛzu nu ɓɔlɔ vai zu ta kololalai.Nii é gi-yiimaʋɛ, gi kpɛtɛai ɠi su, naa ɠa nɔ ga zɛɛ vaiti. 14 Naa ɠa é kɛa ɓalaa, sɔle fai ɠulaa ʋoluzu,telebodai maaɠoozaa gi ʋa.Mazɔlɔɔ gaamai ɠɔɠɔ la mɔ loni kɛlɛzu,tosu la mɔ sɔle fai ʋa. 15 Gaamai ɲɛɛlɛa,zɔi é maaɠoozazu faa ɲɔi ʋa,ta naama nui maavo.Kɛlɛ Ɠɔoɠɔ GALAGI pɛtɛni,ziiɠaawana ga sɔledaa la mɔ ná. 16 É kaani ga nu nɔpɛ ge la ná é maanɛɛnɛ wosu, daavɔɔni.Naazu ɠa tɔ ɓɔɠɔi zeelokoi ɓɔni ba la,ná-telebodai ɠɛ ga poluzeigi. 17 Toɠa telebodai loozu ɠɔba eɠɛ kaka makɛ ɠɔɔɠɔ zɔɔlai,é kizogi ma ɠɔɔɠɔ wɔɔlɔgi lɔ unba,é potokula zeɠe wolai loo ɠɔba ga seɠewuzeɠei,é ɲɛpi ɠɔɔ zɛbɛi velevele ɓɔɠɔ ma eɠɛ seɠeungi. 18 Toɠa ɛsɛ gilagilagi zala é zoloo ná-kɛɛwotiiti ma,ziiɠaawanai ɠa ɠɛ ga sakpe nuiti tɔnɔ,é sili nuiti sala, nii soloogai ti ma.Toɠa ziɛ zaama yooi zu nuiti sala, ta kpoloɗɛi laaʋɛ nuiti. 19 Ɛsɛ pɛ ka lua Ɠɔoɠɔ GALAGI laaseigi ʋa ta ná-lɛbiyai,é zo folo ɠulazu, é li folo liizu,siɛgi zu é ʋaazu eɠɛ ziɛ wola nii tɔngɔlɔ fiilɛi daaʋilisu. 20 Unmɔɔ nu ɠa ʋaazu Siyɔn ʋɛ,ta Zakɔɓe nɔnɔiti bɛ ta ɠɛlɛ ta-lɔ koloɠologi ʋa,Ɠɔoɠɔ GALAGI wooi ɠana. 21 Ɠɔoɠɔ GALAGI ɠɛ ma: «Nɔ̀un nà, minai gè seɠezu ti ʋɛ, nà-Zɛnvui ɠa ɠɛ è ʋa, ta dàawooiti gè pua è-la, ti la ɠaaɠalega ma, ti ʋa ɠula è-la, ti la ɠulaa è-lointi da, ti la ɠulaa è-lointi ti-lointi da, é zo niizu ma é eyɛsu ɠɔ.» Ɠɔoɠɔ GALAGI ɠa é boga.

Isaiah 59 (TOMA)

In Other Versions