Isaiah 63 (TOMA)

1 Ɓɛ ɠa nuu é ʋaazu, é zeɠe Edɔme,é ʋaazu de ʋɔ, é zeɠe Ɓosela, ná-seɠei zu ɓɔiɗai?Ná-seɠeungi velevelegai ma,kɔgi logai ga é ɗa ziɛ, daai ná-zɛbɛi la? «Nà ʋe de, Ɠɔoɠɔ GALAGI,é ɓɔɛzu ga telebodai,nii zobogi bɛ é wo ɠizo.» 2 Kɛlɛ leeni ɠa é ɗa-zeɠeungi zuɓɔiɗai?Ɗa-zeɠeiti kɛai eɠɛ nuiti maazeɠei,niiti ti dɔɔɓɔi gwaai ziɠazu. 3 «Nà ɠila kpe ka gè ɠɛni dɔɔɓɔi gwaai ziɠazuʋɛ,zunu ɠila kpalaa ge ɠɛni bà nuɓusɛiti saama.Gè ɠɔɠɔloni nuiti ma nà-ziiɠaawanai zu,gè ti ɠaayɔni nà-ziiɠulagi zu.Ti-ma ɲamai vazani nà-seɠeiti ma,gè nà-seɠeiti pɛ suɓɔini. 4 Gè potokula foloi leveni zìimaʋɛ,yeeɠɛɠalai zeelia gè nà-nuɓusɛiti unmɔɔ. 5 Gè wɛlɛni mini-o-minikɛlɛ nu nɔpɛ ge la ɓɔni bà.Dàavɔɔni ga nu la yeeveezu bɛ̀.Naazu ɠa zèei ɓɔni bà la,nà-ziiɠulagi loni ɠɔɠɔʋolu. 6 Nà-ziiɠaawanai zu gè nuɓusɛiti dɛɛvɛni ɠɔɠɔwu,gè ti ɠɛɛni unga wuulee nà-ziiɠulagi zu,gè ti-ma ɲamai ʋuuni ya zooi ma.» 7 Nà ɠizɛsu Ɠɔoɠɔ GALAGI ná-wooɠɛɠiladai zu,Ɠɔoɠɔ GALAGI maamusɛ ungiti kana ade ʋɛ,niiti pɛ é ti ɠɛa de ʋɛ,ná-nuɓɔɠɔla wolai zu Izilayɛle ʋɛlɛyeɠei ʋɛ,niiti pɛ é ti ɠɛa ná-nɛɛbɛi zu, ta ná-wooɠɛɠilada wolai zu. 8 É ɠɛni ma: «Izilayɛle nuiti ta ga nà-nuɓusɛiti,doun zunuiti ti la yaava pɛ.»É ɠɛni ti ʋɛ ga Kizo Nui. 9 Ta-ɠidaaʋiligiti pɛ su, tɔ ɓɔɠɔi yiizoolɛni.Geezuɠeelai é loni kobaʋɛ, naa ɠa é ti ɠizoni.Ná-nɛɛbɛi ta ná-maawɔinɠai zu, é ti unmɔɔni.É ti zeɠeni ga ɠasɔ, é ti la yeeloko zu,ta-vai pɛ su kaite wɔlɔwɔlɔi zu. 10 Kɛlɛ ti kololalai ɠɛɛni,ti ná-Zɛnvu Ɲadegai yiiɓɔlɔni.Naa ɓɔɠɔ ɠɛɛni ga ti zili nui,é tɔɔzei é ɗa ti zakpe. 11 Ti-ɠigi looni wɔlɔwɔlɔ vaiti su ta Moize, ti ɠɛni ma:«Mini ɠa naama nui ná,nii é ná-baala kpulugi ta makɛ nui ɠulani kpoloɗɛi wu?Zɔi é ná-Zɛnvu Ɲadegai yeini ti zaama,mini ɠa é ná? 12 É ɠɛni Moize ɠoba, é yeei maale, zeei maayikiai,é ziɛi ʋalini su ti luɠɔ,é ɓɔɠɔ lɔɠɔɠula faa ɠɛɛni é wosu eyɛsu ɠɔ. 13 É ti leʋeni ziɛi ɓomaʋɛti,eɠɛ sooi é teʋebai zu, ti la ɠɛni ɓunɛni. 14 Ti ɠɛni eɠɛ togani ɓulugi é yeizu pɛtugi zu,siɛgi zu Ɠɔoɠɔ GALAGI ná-Zɛnvui liini la ga tiye dooɠo bosuʋɛ.Ʋele ɠana è loni la ɗa-nuɓusɛiti tuɠɔ,è ɓɔɠɔ lɔɠɔɠula maayiki.» 15 Yɛ geeɠɔlɔgi zu, è wɛlɛ,è yɛ è-zeizu ɲadegai naa volozu,è naa ɠa nii é zeelizu gi ma.Mini ɠa ɗa-maayogi ná ta ɗa-yeeɠaaɓaai,ta ɗa-yiizoolɛi ta ɗa-maawɔinɠai nɔ̀un bɛ? 16 Mazɔlɔɔ ɗa ɠa è ga gi-Ɠɛɛ,Abalaame la gi ɠwɛɛ,Izilayɛle ɓalaa la gi ɠwɛɛ.Kɛlɛ ɗɔun ɗa, Ɠɔoɠɔ GALAGI, ɗa ɠa è ga gi-Ɠɛɛ,kaite wɔlɔwɔlɔ è-laaseigi ɠa ga:«Gi unmɔɔ nui». 17 Leeni vaa zu, Ɠɔoɠɔ GALAGI, è gi yɛgai ná, gi ɠaka,gi maaɠooza ɗa-ʋelei ʋa?Leeni vaa zu è gi-ɠigiti kpaa,gi la unfesu è ma?Ʋa gi ʋɔ ʋolu, ɗa-nɛɛbɛi maaʋele ma ʋɛ,gɛi gi ga ɗa-wotiɠɛ nuiti,gi ga ɗa-nuɓusɛiti. 18 Ɗa-nuɓusɛ ɲadegaiti gi zooi zɔlɔɔni ga gɔnɔ.Su la ɠoozani, gi zili nuiti ti ɠɔɠɔzɔ è zei ʋɛlɛ ɲadegai ʋa. 19 Kaite suɠoozaa gi ɠɛɛʋɛeɠɛ nuɓusɛiti è la zeini ti unda,è-laasei ge la ʋɛɛni ti ʋa!Ee, ni è ɠɛni geeɠɔlɔgi ʋalizu ga,ni è ɠɛni yeizu!Gizeiti ta la ɲiikpi è ɠakalaʋɛ.

Isaiah 63 (TOMA)

In Other Versions