Jeremiah 10 (TOMA)

1 Ee, Izilayɛle nuɓusɛiti, à woilo wooi ma Ɠɔoɠɔ GALAGI bosu! 2 Ɠɔoɠɔ GALAGI wooi ɠaa:«À mina ʋokɔɠɔ zii ɠiligiti siɛ ʋelei ma,à mina lua poogiti ba ti ɠulazu kɛlɛma geezuʋɛ,tɔɔzei zii ɠiligiti ta luazu ti ʋa. 3 Ziiti zeavaiti ta ga wafuun faiti.Ta gului ʋɔna dɔɓɔi zu,ɲɛɛliɠi nui kpɛtɛ ga zoovɛi, 4 ti maaɓɛtɛ ga walii ta zanugi,ti malitoi zeɠe, ti kpadɔ ɓɔɠɔ ʋa ga kɔlu ɠaazoɓagi,nii a kɛ é mina ɗa ga ɲiikpi. 5 Niima ɠalagiti kɛɛʋɛ eɠɛ maalua aniiti ti loni kpeele ɓelei zu,ti la ɓɔɛa, kɛni nɔ nu ɗa ti zeɠe,tɔɔzei ti la zooga ti ʋa kɔɠɔloda ɠila kpalaa kɛ siɛi zu ɓɔɠɔ ʋɛ.À mina lua ti ʋa, ti la faa ɲɔu ɠɛɛzu,ti la ɓalaa zooga faa ʋagɔ ɠɛɛzu.» 6 Nu nɔpɛ ge la ga è ɠɛʋele, Ɠɔoɠɔ GALAGI!È wɔɔlɔʋɛ, eɠɛʋelei ɗa-zobogi maawooi wɔɔlɔai la. 7 Ɛsɛ pɛ maanɛɛʋɛ é ɗa-zobogi ɠwɛɛ,ziiti pɛ ta-masagi, unfemai ɠa ga ɗɔnɔ,mazɔlɔɔ ziiti ta-ɠima nuiti kpein saama,masadai kpein su,nu nɔpɛ ge la ɠulani ga ɗe. 8 Ti pɛ, zeeɠaaɠwɛɛzu la ba, ta ga ɠimalala nuiti ta faaɠaaɠalala nuiti.Ta-ɠimalai ɠa ga wafuun faa.Ta-ɠalagi ɠa nɔ ga gului, 9 ta wali loɠai é zeɠezu Taalasise, naa ʋɛɛ zanugi ʋa seɠeai Ufaze,ɲɛɛliɠi nui kpɛtɛai, ani ɠaawuun nui ti ʋɛlupɛlu.Naama ɠalagiti ka ti ti maaɠilizu ga geze ɓiinii, ta ma ɓɔigi,kɛlɛ ti pɛ ta nɔ ga ɲɛɛliɠi nui ɠoozu ɠeleɠelegi. 10 Kɛlɛ Ɠɔoɠɔ GALAGI ɠa gaamazu ga GALAGI,zɛnvu su ƓALAGI, ɠɔoɠɔ masagi.Siɛgi zu é yiiɠaawanazu la, eteai ɠa ɗa ɓali,zobo nɔpɛ ge la ziiti bɛ ná-ziiɠaawanai luɠɔ. 11 Ɗa nii wo ti ma ga:«Galagi niiti ti la geeɠɔlɔgi ta zooi ɓɛtɛni,naati ta ɲɛɛlɛzu zooi ɠa ta geeɠɔlɔgi wu.» 12 Ɠɔoɠɔ GALAGI zooi ɓɛtɛni ga ná-zobogi,é eteai laani ga ná-ɠimalai,é geeɠɔlɔgi zuvieni ga ná-keleɠelegi. 13 A devei veena, ziɛiti ta ɗa ɠaalɛ ba geezuʋɛ,tonaɓiin golaiti ta lɛ, ti zeɠe zou ɓela ga.Toɠa ɗa mainmain ɠula tonai ʋɛ,fiilɛiti ta ɗa ɠula ti-makɛsuʋɛti. 14 Nuɓusɛi pɛ ka ɗa ɠɛ ga ɠimalala nu ná-faaɠwɛgi zu,ɲɛɛliɠi nui kpein ka ɗa unfe ga ná-kɔɔɠɔ ganigi nii é kpɛtɛai,mazɔlɔɔ kɔɔɠɔ ganigi naati ta nɔ ga wafuun gani,zɛnvu viilɛ la ti zu. 15 Ta nɔ ga wafuun gani, ɲɛɛɠulasu ɠɛɛwotii nɔ ʋe,ti pɛ ta leʋesu, ti ɓe,siɛgi zu Ɠɔoɠɔ GALAGI wuzeɠezu la ti laalɔɠɔma. 16 Tɔun ge la ga ti ɠɛʋele,tɔungi é ga Izilayɛle ná-naavoloi.Tɔun tɔ ɠa é ga eteai pɛ kpɛtɛ nui,tama Izilayɛle wolodamai ɠa ga tɔun nɔnɔ.Daasei ka ba ga: «Ɠɔoɠɔ GALAGI, Fai-Pɛ-Maliɠii». 17 Zeluzalɛme, è zeiɗa kɛlɛ su, è-ɠɔligiti seɠe zooi ma. 18 Mazɔlɔɔ Ɠɔoɠɔ GALAGI wooi ɠaa:«Niima ziɛgi zu, nà zooi ɠaa nuɓusɛiti kpɛɛzu,nà ti ɠatasu ɠoba, tanɔpɛ ge la ʋelaa.» 19 Ee, màawɔinɗa, gè ɠoloɠologa!Nà-palai ɠa tàɓazu gola!Gè ɠɛni ɠɛɛzu ma: «Faa wola laade,nà yiilɔɔ ma wanai wu.» 20 Kɛlɛ nà-seɠe ɠotai ɠoloɠologa,ma ɠaluiti pɛ tɔɔɠulaa.Dòinti ti zeɠea kòba, ti lia.Nu la mɔ bɛ̀, nii a nà-seɠe ʋɛlɛi lo,é ʋa dòoɠosuʋɛ ɓɛtɛ ʋolu. 21 Totuɠɔiti ta-vaaɠaazagi ʋe,ti ɠɛni ga ɠimalala nuiti,ti la Ɠɔoɠɔ GALAGI ɠaazaɠani.Naa ɠa é kɛa ti loa bu,ta ta-nui niiti ti ɠɛa ti unma ga kasɔ,naati pɛ ti vazaga. 22 À woilo dɛɛ zɔngɔ wooi tɛi ma, maaɓuɠaa,zɔngɔ woo wolai ʋe, é zeɠezu lɛkpɛmaʋɛ nu ɠɔʋɛzu ʋele yooi zu,toɠa ʋaazu Zuda laa wolaiti suwosu,ti ɠɛ ga koʋeiti pɛɛzuʋɛ. 23 Ɠɔoɠɔ GALAGI, gè suɠwɛɛga nii deveai nui ma, naa la tɔ ɓɔɠɔ yeezaama,zɔi é ziɛzu, naa leve la kɔɠɔ losuʋɛti ma. 24 Ee, Ɠɔoɠɔ GALAGI, gi maaɠolo,kɛlɛ kɛ ga damakpɛgi, è mina kɛ ga ɗa-yiiɠaawanai,è mina gi ɠoloɠolo ɲɛgɛlɛin. 25 Ɗa-yiiɠulagi yei zii ɠiligiti ma, niiti ti la è ɠwɛɛ,ta masadaiti ma, niiti ti la wooɠulazu è ma! Mazɔlɔɔ ti Izilayɛle mia,ti mi mɛtu, ti ti-ma zuwu ɠaaleʋe,ti seizuʋɛ zuwoga, naa zuɲaka yɛ.

Jeremiah 10 (TOMA)

In Other Versions