Jeremiah 3 (TOMA)

1 Maliɠii ɠɛni ma:«Ni zunui a ɠɛlɛna anzai ʋa,naa zeɠe pɔ bɛ, é li, é zei taɠili bɛ,sini pɔlɔmai ɠa ɠale ma pɔ bɛ mɔnɔ ɓaa?Zooi la ɠɔzɔa nɛi naazu ɓaa?Tama, ɗa ʋe, Izilayɛle, è koloɠologi ɠɛa wa ɗa-wɛɛn mɔinmɔingiti,ɗa ɠalesu ma ʋolu pɔ̀ bɛ!»Ɠɔoɠɔ GALAGI wooi ɠana. 2 «Ɠaazu wuzeɠe, è gizeiti pɛtɛ zooi zu niiti gulu la ti ma,ada ɠila kpalaa kana nɛi ɓaa,ʋɛ è la ɓɔɠɔ lɔɔni ná koloɠologi zu?È ɠɛni ɗa-wɛɛinti maaɓɔunsu,è zeini pelelaʋɛti eɠɛ teʋeteʋe nui nii é teʋebai zué ɗa naati kpɔun, niiti a loo ti ma.È zooi ɠɔzɔa ga ɗa-ɠoloɠologi ta ɗa-ladalalai. 3 Naa ɠa é ba, sabalagiti maaleʋeni, tona ɠaaɓelagiti ti la ʋuuni.Kɛlɛ wɛɛnzo anzanu ɠaazuʋɛ ɠa é ɠɛni è ʋa,è la kɛɛni è zasu ʋa ɓali, è ʋa unfe. 4 Niizu ɠa è tòlisu da ga: ‹Kɛ̀ɛ, ɗa ga bɔ̀ɔlai,kaite mà nu niinɛlai zu!› 5 Ɗa gaazaɠagi wosu, è ɗa ɠɛ ma:‹Toɠa yɛsu ziiɠaawanai zu eyɛsu ɠɔ ɓaa?Toɠa naama vaa wanai makɛsu dàalɔɠɔma yeenɔpɛ ɓaa?›Wɛlɛ, naa ɠa è bosu,kɛlɛ è la ɓesu faa ɲɔu ɠɛɛ vai ʋa,è vɔɔnɛ ba nɔ kpaan!» 6 Ɠɔoɠɔ GALAGI ɠɛni mà, masagi Zoziase ná-siɛgi zu: «È naa ʋɛtɛga, nii wooʋalada nui Izilayɛle kɛai? Tɔungi é ɠɛni liizu gize wolaiti bu, ta gulu wolaiti, é ɗa koloɠologi ɠɛ ná. 7 Gè ɠɛni ɓɔɠɔ ma: ‹Kpega ʋoluma ga niima vaiti pɛ kɛ, toɠa ɠalesu ma, é ʋa pɔ̀.› Kɛlɛ é la ʋaani ʋolu. Ná-seelai Zuda, woovele nui, naa kaani. 8 Anɛɛ ni gè vului ɠoloɠologɛ gi yɔɠɔzu gá wooʋalada nui Izilayɛle, gè vulu zaa zɛʋɛi ve zea, tɔɔzei ná-wɛɛnziɛgiti faa ʋa, niiti é ti woni, ná-seelai Zuda, é ga wooʋalada nui, naa la luani ɲɛgɛlɛin, é liini, é ɗa koloɠologi ɠɛ ɓalaa. 9 Izilayɛle zooi ɠɔzɔa ga siɛ ʋele ɲɔi, é wɛɛnziɛgi ɠɛa ta kɔɔɠɔ ganigiti ti ga kɔtuiti ta guluiti. 10 Naa pɛ kɛɛʋɛ, Izilayɛle ná-seelai, woovele nui Zuda, la ɠaleni ma, é ʋa ʋa pɔ̀ ga yii pɛ, kɛni dakɔlɔgi nɔ,» Ɠɔoɠɔ GALAGI wooi ɠana. 11 Ɠɔoɠɔ GALAGI ɠɛni mà: «Wooʋalada nui Izilayɛle zɔlegɛ é leʋe woovele nui Zuda ʋa. 12 Li, è zeze ga niima wooiti lɛkpɛmaʋɛ nu ɠɔʋɛzu ʋelei, è ɠɛ ma:‹Ʋa ʋolu, wooʋalada nui Izilayɛle! Ɠɔoɠɔ GALAGI wooi ɠana.Gè la mɔ ɠaazu ɲɔu loga è ʋa,mazɔlɔɔ nà ga wooɠɛɠila nu,›Ɠɔoɠɔ GALAGI wooi ɠana.‹Gè la yɛga nà-ziiɠaawanai zu yeenɔpɛ. 13 Ɗa-vaaɠaazagiti kwɛɛ dɛɛ nɔ,mazɔlɔɔ nà, Ɠɔoɠɔ GALAGI, ɗa-ƓALAGI,nà ɠa è wuzeɠeai dàalɔɠɔma.È ɓizɛni adaʋɛ pɛ, gala kiligiti pɔ bɛ,gulu wolai ma zii pɛ pɔ bɛ,è la ɠɛni woiloni gòo ma,›Ɠɔoɠɔ GALAGI wooi ɠana.» 14 «À ɠale ma, wo ʋa, kololala lointi!»Ɠɔoɠɔ GALAGI wooi ɠana.«Mazɔlɔɔ nà ɠa gè ga wo-Maliɠii.Nà wo zeɠezu, gila taa wolai ta zu,felegɔ pɛlɛyeɠei ta wu,ga gè li ga woye Siyɔn. 15 «Nà totuɠɔiti feezu wo ya, niiti dàai ti la. Ta wo makɛ ga keleɠelegi ta ɠimalai. 16 Siɛgi zu wo ɠaawɔɔlɔzu la zooi ɠa, wo mɔin gola, naama voloiti su, nu la mɔ Ɠɔoɠɔ GALAGI ná-minazeɠe kesui ná-faa woga, nu la mɔ ɠisiaa su, ma ɠisiɛi la mɔ loa nu ʋɛ. Po ge la mɔ ʋua nu ʋa, ta nu la mɔ taɠili kpɛtɛa,» Ɠɔoɠɔ GALAGI wooi ɠana. 17 «Naama ziɛgi zu, Zeluzalɛme laasei ka ʋɛɛ ga ‹Ɠɔoɠɔ GALAGI ná-masa kpɔkpɔgi›. Zii ɠiligiti kpein ta ɠaalɛ ba ná Ɠɔoɠɔ GALAGI laaseigi zu. Ti la mɔ ɠaaɓaa ti ʋa vɔɔnɛ faa ɲɔu ɠɛɛ vai ʋa. 18 Naama ziɛgi zu, Zuda nuɓusɛiti ta ɓɔ Izilayɛle nuɓusɛiti ba, ti zeɠe lɛkpɛmaʋɛ nu ɠɔʋɛzuʋɛ yooi zu, ti li ʋɔɔma naama yooi zu nii gè feeni ti-mɛmɛwolani zea ga tɔnɔ. 19 Nɛ̀i gè ɠɛni ɠɛɛzu ma:‹Gè ɠɛni pɔ gè wo zo eɠɛ doun zunuiti!Gè ɠɛni pɔ gè zou ʋagɔi ve wo ya,gè zou ve wo ya ga wɔnɔ,nii fizɔgai ti pɛ ba ziiti saama.›Gè ɠɛni ɠɛɛzu ma ɓalaa: ‹Wa tòli ga Kɛ̀ɛ,›wo la zeɠea pòlu eyɛsu ɠɔ. 20 Ungo, eɠɛʋelei anzanui a ɗa sinigi ɠaaʋɛɛ la,ʋele ɠana wo gàaʋɛa la, Izilayɛle ʋɛlɛyeɠei,»Ɠɔoɠɔ GALAGI wooi ɠana. 21 Kpee wooi ɠa mɛnisu gizeiti ma,Izilayɛle lointi ta-wɔlɔ wooiti be, ta ta-maanɛɛnɛ wooiti.Mazɔlɔɔ ti ti-ziɛ ʋeleiti ɲɔuɗa,ti yeemani Ɠɔoɠɔ GALAGI ma, ta-ƓALAGI. 22 «À ɠale ma deɠɛmu, kololala lointi,nà wo ɠɛdɛ, gè wo ɠula wa-ɠaka faiti su.»«Giya ɠaa, giya ɠaa, gi ʋa ʋolu è ʋɔ,mazɔlɔɔ ɗa ga Ɠɔoɠɔ GALAGI, gá-ƓALAGI! 23 Ungo, gi ɓeni ɓɔɠɔ ʋa ti gi yaava,zii ɠiligiti ta-ɠɔɔɠɔ ganigiti faa zu gizeiti ma,gi ɗa zɔngɔi wo gizeiti ma.Kɛlɛ Ɠɔoɠɔ GALAGI, gá-ƓALAGI ɠa é ga Izilayɛle ná-kizogi. 24 Kaite gi ma loungoyai zu,kɔɔɠɔ gani kɔɔ vai gi zɔlɔɔ nuiti sɔlɔɔ ganiiti koloɠoloni,ta-logani goiti ta ta-logani wolaiti,ti-loun zunuiti ta ti-loun anzanuiti. 25 Gá laazu gá-unfegi zu,gá-unfetalai ɠɛa ga gá-ʋɛɛmazeɠei.Mazɔlɔɔ gi kotoi ɠɛa Ɠɔoɠɔ GALAGI, gá-ƓALAGI laalɔɠɔma,giya-o, gi-mɛmɛwolani-yo,é lɔɔzei gi ma loungo ziɛgi zu ma, eyɛsu za.Gi la woiloni Ɠɔoɠɔ GALAGI, gá-ƓALAGI wooi ma.»

Jeremiah 3 (TOMA)

In Other Versions