Jeremiah 49 (TOMA)

1 Fai bogai Amɔn nuiti ta-vaa zu. Ɠɔoɠɔ GALAGI wooi ɠaa:«Zunu loun la Izilayɛle ʋɛ ɓaa?Pogani zeɠe nu la bɛ ɓaa?Leeni vaa zu galagi Milikɔme Gade yooi zeɠezu ga poganii,ná-nuɓusɛiti ti zei ma laaiti su? 2 Naa ɠa é ba, foloi tanigaa ta ʋaazu,nà kɔɔɠɔ ɓeei ʋili Amɔn nuiti ta-laa wolai Laɓa zu,»Ɠɔoɠɔ GALAGI wooi ɠana.«Ná valibo, puuzuʋɛ ɠoloɠolo,taaiti ti logai ba, naati pɛ ta ɠala.Naazu Izilayɛle ɠa zei naati unda,niiti ti zeini tɔun unda.»Ɠɔoɠɔ GALAGI ɠa é boga. 3 «À wɔlɔ, Ɠɛsɛɓon nuiti, mazɔlɔɔ Ayi taai ɠoloɠologa!Laɓa laaiti, à ɓɔɠɔ maalolibo!À saa wɔlɔ wo seɠei loo ɠɔba, wo saa wɔlɔi wo,wo ɗa ziɛziɛ siɠigi wu.Mazɔlɔɔ galagi Milikɔme ɠana li duɔlai zu,ta zalaɠa ɠula nuiti, ta ná-kundiɠi wolaiti. 4 Leeni vaa zu è ɓɔɠɔ maamusɛzuga ɗa-nɛmɛiti ma vaa?Ɗa-nɛmɛi ɠa na ɠoloɠolo, gaazulɛɛ anzalopoi,ɗɛi è ɠalivaani ɗa-naavoloi ma,è ɗa ɠɛ ma: ‹Ɓɛ ɠa a zoo é laalɛ bù?› 5 Nà ʋaazu è ʋɔ ga maalua vai,»Ɠɔoɠɔ GALAGI, Fai-Pɛ-Maliɠii wooi ɠana,«é zeɠe è-maaɠoolii pɛ su.Wo pɛ wa ɓɛ, wo ɠilagilagi li ga letegi nɔ,nu nɔpɛ ge la pela nuiti gaalɛa ba. 6 Naa ʋoluma, nà Amɔn nuiti ta-vai valibo,gè ʋa ʋolu ga ta-nuiti ti duɔlai zu,»Ɠɔoɠɔ GALAGI wooi ɠana. 7 Fai bogai Edɔme yooi ná-faa zu.Ɠɔoɠɔ GALAGI, Fai-Pɛ-Maliɠii wooi ɠaa:«Ɠima nui la mɔ Teman ɓaa?Ná-tɛnɛbo nuiti ti ʋalaga ɠigi ma ɓaa?Ta-ɠimalai ɠoloɠologa? 8 À ɠale ma, à ʋela, Dedan nuiti,à zei pugiti su,mazɔlɔɔ gè ʋaa ga faa zuɠoloɠologi wo ʋɔ,Ezawu mavofodaiti,gè wuzeɠea wo laalɔɠɔma, ma yee zeelia. 9 Ni leezɛn ɠula nuiti ta ʋaana è ʋɔ bɛ,kɛni ma ɠɔpɔ gilagila nɔ ɠa ta zɛ ná.Ni unma nuiti ta ʋaana, ti ɠula è viliba kuai,ta faa zuɠoloɠolo gola ɠɛ eɠɛʋelei ti pɔ la. 10 Mazɔlɔɔ nà ɠa gè wo maaɓezeɠelesu,Ezawu mavofodaiti,gè wo-lɔɔɠuzuʋɛti kula kɛlɛzu,wo la mɔ zooga wo ʋa lɔɔɠu.Toɠa ɠɛ ga nimizai wo-mavofodai ʋɛ.Wo-ɠɛɛleaiti, wo-zeiɲɔɠɔiti, ta la ɠɛa ná, é ʋa ɠɛ ma: 11 ‹Zeɠe ɗa-ʋodointi kòba, nà ti ɠula su,ɗa-ʋoanzaiti ta ɠito bà, nà ɠaaɓa ti ma.› » 12 Mazɔlɔɔ Ɠɔoɠɔ GALAGI wooi ɠaa: «Zɔiti ti la ɠɛni ʋeelalani ga ti ʋa ɓɔɔle ga nà-ziiɠaawana ɗaawɔi, naati ta ɓɔɔle la nɔ. Ɗɔun ɗa, Edɔme, ɗa ɠɛɛzu ɗa zosu ga zɔi sɔ ge la ba? É la ɠɛa ɠana ɲɛgɛlɛin, ɗa ɠa è maanɛai è ɓɔɔle ga ziawɔi tɛi. 13 Nà naama ɠonai wosu ɓɔɠɔ ma, ɗa-laa wolai Ɓosela ɠaaɠaalɛi, ɓaaɠula ma, é ɠoloɠolo, nu a ɠɛna foovoo loa, é ná ɠɛ ga poogi. Maaɠoolii zu laa wolaiti pɛ gaa ɠa ʋala ti ʋa eyɛsu ɠɔ,» Ɠɔoɠɔ GALAGI wooi ɠana. 14 Gè woo niinɛ mɛnigɛ,é zeɠe Ɠɔoɠɔ GALAGI ʋɔ bɛ,keelai leʋegɛ zii ɠiligiti saama, é ɠɛ ma:«À ɠaalɛ ba, wo ʋa Edɔme laalɔɠɔma!À li, wo laalɛ bu!» 15 «Mazɔlɔɔ wɛlɛ, Edɔme, nà è ɠaalɔizu ziiti saama,ɠaazu unfe ge la è ʋɛ nuɓusɛiti saama. 16 Maaluai è bosu ta ɗa-wasogi è ɠakaga,ɗɛi è-laazuʋɛ ga fasa yeɠeiti su,è zeini gizeiti unmaʋɛ.Anɛɛ ni ɗa è-laɠagi losu gaaɠooza ga koɠɛi nɔnɔi ɠɛʋele,nà è volo ná ʋa,»Ɠɔoɠɔ GALAGI wooi ɠana. 17 «Edɔme ɠa ɠɛ ga adaʋɛ nu iɲɔ ga leʋe ná ʋa.Nii kpein a ɠɛ leʋesu náʋɛ, kɔɔlɛ ɓooi ɗa yei ga tiye,ti ɗa foei vɛ ga ziiɠoloɠologi, ta ɠɛna koloɠolo pelei ɠaa. 18 Eɠɛ faa zuɠoloɠologi é ɠɛɛni Sɔdɔme ta Gomɔɔl,ta maaɠoolii ma laaiti su,» Ɠɔoɠɔ GALAGI ɠɛ ma,«nu nɔpɛ ge la mɔ zeiɗa ná,nuɓusɛ nɔpɛ ge la mɔ zeizeiga ná. 19 Wɛlɛ eɠɛ zalai é lɛɛzu,é ɠula Zuludɛn lɔɓɔ wolai zu,é ʋa adaʋɛ laalɔɠɔma, ʋɛ ná la ʋalasu,nà ʋaazu, gè ti pɛ kpale ná, gaazulooma la ɠila nɔ laawu.Zɔi gè yiimazeɠeai la, gè naa zei Edɔme unda.Mazɔlɔɔ ɓɛ ɠa é ga kɛ̀ʋele?Ɓɛ ɠa ná-poluvaawo kuye mà?Baala makɛ nui ɓɛ ɠa a lo dàalɔɠɔma? 20 À woilo dɛɛ faazeikpasui manii Ɠɔoɠɔ GALAGI kpɛtɛai Edɔme nuiti daalɔɠɔma,ta kisu vaiti é ti ɓɛtɛai Teman nuiti daalɔɠɔma.Gaamazu ta li ga tiye eɠɛ togani goa nɔ,ta ti-zeizuʋɛ ɠoloɠolo. 21 Ti loo lugi ɠa zooi ɓali,ma ɓee wooi mɛnini Seeli Kpoloɗɛi ʋɔ bɛ. 22 Wɛlɛ, kɛɛʋɛ eɠɛ koɠɛi,é lɛɛzu, é ɗa ɠoʋe Ɓosela maazu.Naama volo ná, Edɔme ɠɔɔɠɔ nu ɠɛzɛiti zii ɠa zɛlɛeɠɛ anzanui doun zɔlɔɔ koozuwanai ba. 23 Fai bogai Damase ná-faa zu. Ɠamate ta Aalapade ti lɔa unfegi zu,mazɔlɔɔ ti woo ɲɔu mɛniga.Ti-yii ɠa zoolɛzueɠɛ kpoloɗɛi é ɲiikpisu, é la zooga losu kpɛ. 24 Damase nuiti ti iɲɔ ge leʋea,ti ʋoluazoga ga ti ʋela,ti zasu ɠana ɓali,dualuagi ta taɓai ti zogaeɠɛ anzanui é doin zɔlɔɔsu. 25 Kɛɛʋɛ ɠale ti ɠɛlɛai ba,taa wolai tɔna, tɔɠɔɠulaai gola,taai nii é ɠɛni ga nà-koozunɛ ungi! 26 Ná-buzeɠe niinɛgiti kpein ta loo bu taazuʋɛ koi yɔɠɔzuʋɛti,ná-kɔɔɠɔ nuiti pɛ undaa ɠa ʋili naama volo ná,»Ɠɔoɠɔ GALAGI, Fai-Pɛ-Maliɠii wooi ɠana. 27 «Nà abui lo Damase ziɠigiti ba,toɠa masagi Ɓɛne-Ɠadade ná-masa pɛlɛiti gala.» 28 Fai bogai Kedaal Alaɓuiti ta-vaa zu, ta Ɠasɔɔl masadaiti,niiti Ɓaɓilɔne masagi Neɓukadenɛzaal vɔnini ti ma.Ɠɔoɠɔ GALAGI wooi ɠaa:«À wuzeɠe, wo li Kedaal laalɔɠɔma,wo ti pɛ suɠoloɠolo folo ɠulazu ʋele nuiti pɔ bɛ. 29 Ti ta-zeɠe ɠotaiti kula ti ya, ta ta-logani ɓulugiti,ta ti-lɔɔɠuzuʋɛti, ta ta-zɔɔlaiti pɛ.Ti li ga ta-ɲɔmɛiti,ti ɗa kpee loo ti ma ga:‹Maalua vaa ʋe mini-o-mini!› 30 Ɠasɔɔl nuiti, à ʋela, wo li mini-o-mini,wo zei pu zeɠeiti su,»Ɠɔoɠɔ GALAGI wooi ɠana.«Mazɔlɔɔ Ɓaɓilɔne masagi Neɓukadenɛzaal deve woga wo laalɔɠɔma,é kisiɛa wogɛ wo laalɔɠɔma. 31 À wuzeɠe! À li niima nuɓusɛiti daalɔɠɔma,ti zeini kpɛ, maaɠili la ti ma,»Ɠɔoɠɔ GALAGI wooi ɠana.«Kpo ge la ta-ʋɛlɛiti da, sɔɠɔ ge la su,ti zeini yɛ. 32 Ti zili nuiti ta li ga ta-ɲɔmɛiti,ta-logani ɓulu golaiti ta ɠɛ ga kɔɔzoganii.Nà niima nuɓusɛiti fazasu mini-o-mini,tɛiti kpein ti ti-ɓakalagiti bosu.Nà ʋa ga ti ɠoloɠolo fai, é zeɠe adaʋɛ pɛ,»Ɠɔoɠɔ GALAGI wooi ɠana. 33 «Ɠasɔɔl laai ɠa ɠɛ ga koʋeiti daamiizuʋɛ eyɛsu ɠɔ,nu nɔpɛ ge la mɔ zeiɗa ná pɛ,nuɓusɛ nɔpɛ ge la ná ɠɛa ga zeizeisu.» 34 Wɛlɛ keela wooi ʋa GALA goo wo nui Zelemi sɔlɔɔni Ɠɔoɠɔ GALAGI ya, é lo Elame nuiti ba, Zuda masagi Sedesiyase ná-masadai lɔɔzei ziɛgi zu: 35 «Ɠɔoɠɔ GALAGI, Fai-Pɛ-Maliɠii wooi ɠaa:‹Nà Elame ná-mɛɛin ɠalezu ga,ná-kɔɔɠɔ zɔɔlai ɓiigi ma zobogi. 36 Nà seɠe ga fiilɛi ʋepema naanigɔi pɛ, geeɠɔlɔgi wu,gè ʋaa la Elame.Gè ti vaza adaʋɛ pɛ.Elame ɠɔɔʋelai ɠa ɠɛ zooi pɛ su, kula ba la ba. 37 Nà Elame nuiti ziilaave ga dualuagi ti zili nuiti tuɠɔ,niiti ti pɔ ga ti ti ʋaa.Nà maanɔɠɔi leʋe ti ma, nà-ziiɠaawana wolai zu,›Ɠɔoɠɔ GALAGI wooi ɠana.‹Nà boɠa zɔkpɔi ʋilɛ ti ʋolu,eyɛsu gè ɓe ti ma. 38 Nà nà-masa kpɔkpɔgi zei Elame nuiti saama,gè masagi ta kundiɠi wolaiti undaaʋili,›Ɠɔoɠɔ GALAGI wooi ɠana. 39 ‹Kɛlɛ naa ʋoluma, Elame nuiti ti ga duɔiti,nà ʋa ga tiye ʋolu,›Ɠɔoɠɔ GALAGI wooi ɠana.»

Jeremiah 49 (TOMA)

In Other Versions