John 17 (TOMA)

1 Siɛgi zu Yesu ɓeni la ga naama wooiti bo, é ɠaazulɛɛni geeɠɔlɔgi zu ʋele, é ɠɛ ma: «Kɛ̀ɛ, yeeɠɛɠalai zeelia. È-Loun Zunui ná-lɛbiyai ɠulana kɛlɛma, nii a kɛ è-Loun Zunui ɓalaa ɗa-lɛbiyai ɠula kɛlɛma. 2 Tɔɔzei è zobogi veeʋɛ zea nuɓusɛi pɛ ma, nii a kɛ é ɠɔoɠɔ zɛnvui ve naati bɛ, niiti è ti vea zea. 3 Tama ɠɔoɠɔ zɛnvui naa ɠa, ga ti è ɠwɛɛ, ɗɛi ɗa ɠila kpe è ga GALA kiteɠitegi, ta ti naama nui ɓalaa kwɛɛ, nii è teʋegai, Yesu Kilista ya. 4 Gè ɗa-lɛbiyai lɛa zooi ma, botii nii è feai zèa ga gè kɛ, gè naa ɠaaɓelaga. 5 Ɗa ɓalaagi Kɛ̀ɛ, lɛbiyai nii é ɠɛni zèa è ɠobaʋɛ, aisa eteai ʋa ɠula, nà-lɛbiyai naa ɠulana kɛlɛma niina è ɠobaʋɛ.» 6 «Gè è lɛa ga naama nuiti, niiti è ti veai zèa, è ti ɠula eteai zu nuiti saama. Ti ɠɛa ga ɗɔnɔiti, ɗa ma, è ti ve zèa. Ti makɛgɛ è-laawooi ma. 7 Ti kwɛni niina ga nii pɛ è fea zèa, ti pɛ seɠeʋɛ ɗa nɔ è ʋɔ bɛ. 8 Keela wooi nii è feai zèa, gè naa laazeelia ti ma, tama ti yeezei bu. Gaamazu, ti kwɛɛgɛ ga sèɠeʋɛ è ʋɔ bɛ, gè ʋa, ti la da ɓalaa ga ɗa ɠa è tèʋegai. 9 Tiya ɠa gè è maanɛɛnɛzu ti ʋɛ. Gè la è maanɛɛnɛzu eteai ʋɛ, kɛlɛ naati bɛ è ti veai zèa, tɔɔzei ta ga ɗɔnɔiti. 10 Mazɔlɔɔ nii nɔpɛ é ga nɔ̀nɔ, naa ɠa ga ɗɔnɔ, nii ma é ga ɗɔnɔi, naa ɠa ga nɔ̀nɔi. Nà-lɛbiyai ɠa ɠulazu kɛlɛma ga ti maaʋele. 11 Ná tago nɔ ʋe niina, gè la mɔ ɠɛɛzu eteai zu, tɔɔzei nà ga ʋa è ʋɔ bɛ, kɛlɛ tiya ma, ta yɛsu eteai zu. Kɛ̀ɛ, ɗɛigi è ɲadegai, ti makɛ ga è-laaseigi ná-zobogi, daaseigi nii è feai zèa, nii a kɛ ti ɠili ʋa, ti ɠɛ ga ani ɠila, eɠɛʋelei de la. 12 Yeeɠɛɠalai pɛ gè kɛai ti ʋa, gè ɠɛa ti makɛsu è-laaseigi ná-zobogi zu, daaseigi nii è feai zèa. Kpàaʋɛ ti maazu, ti tanɔpɛ ge la looni ya, kɛni zunui nii undaaʋiligi leveai ma, nii a kɛ GALA Sɛʋɛi zu wooi ʋilɛ su. 13 «Niima ziɛgi zu, nà ga ɠale ma è ʋɔ bɛ, kɛlɛ nà niima wooiti pɛ bosu siɛgi zu gè la dɛ eteai zu, nii a kɛ nà-koozunɛɛi ɠɛ ti-yiimaʋɛti, koozunɛɛi nii gaavɔnigai. 14 Gè è-laawooi vea ti ya, naa ɠɛa ga zaɓu eteai ti wɔinzeɠe, tɔɔzei ti la ga eteai nɔnɔ, eɠɛʋelei nɔ nà ɓalaa gè la ga eteai nɔnɔ la. 15 Gè la è maanɛɛnɛzu ga è ti ɠula eteai zu, kɛlɛ è ɓaa ti maazu Inɛgi laalɔɠɔma. 16 Ti la ga eteai nɔnɔ, eɠɛʋelei nɔ nà ɓalaa gè la ga eteai nɔnɔ la. 17 Ti zeɠe ga ɗɔnɔ ɲɛgɛlɛin ga gaamai maaʋele, è-laawooi ma ka é ga gaamai. 18 Eɠɛʋelei è tèʋegai la eteai zu, ʋele nɔ ɠana nà ɓalaa gè ti leʋegai la eteai zu. 19 Tama nɔ̀un gè ɓɔɠɔ vea è ya ta-vaa zu, nii a kɛ tiya ɓalaagi ti ɓɔɠɔ ve è ya ga gaamai.» 20 «Tiya ɠila nɔ lɛi gè ʋa ɠɛ è maanɛɛnɛzu ti ʋɛ, kɛlɛ nà è maanɛɛnɛzu naati pɛ bɛ, ti ʋaazu ɠidaaleʋezu mà ta-zeele wooi maaʋele ma. 21 Nà è maanɛɛnɛzu, Kɛ̀ɛ, va bu ti ɠɛ ga ani ɠila. Kɛ̀ɛ, ʋelei è ɠiliai la bà, ta ʋelei nà ɓalaa gìliai la è ʋa, va bu ti ɠɛ ga ani ɠila ɠana, ti ɠili de ʋa, nii a kɛ eteai la da ga ɗa ɠa è tèʋegai. 22 Lɛbiyai nii è feai zèa, gè naa vea ti ya, naa ɠa a kɛ ti ɠɛ ga ani ɠila, eɠɛʋelei de la ga ani ɠila, de felegɔ. 23 Nɔ̀un gè ɠili ti ʋa, ɗa ɓalaagi è ɠili bà, naa ɠa a kɛ ti ɓɔsu, ti ɠɛ ga ani ɠila kpe nii gaavɔnigai, eteai zoo é kwɛɛ naa maaʋele ma ga ɗa ɠa è tèʋegai, naa ʋoluma è niiti nɛɛʋɛ ʋɛ, eɠɛʋelei è nɛ̀ai la ʋɛ. 24 «Kɛ̀ɛ, nà pɔ ʋɛ gè ná, niiti è ti vea zèa, naati ɓalaa ti ɠɛ bà ná, naa ɠa a kɛ ti naama lɛbiyai ɠaa, lɛbiyai nii è feai zèa, mazɔlɔɔ è nɛ̀ɛni ʋɛ, aisa eteai ʋa ɓɛtɛ. 25 Kɛ̀ɛ, ɗɛigi è lelebogai, eteai la è ɠwɛɛni pɛ, kɛlɛ nɔ̀un gè è ɠwɛɛ. Tama nii tɛiti ti gaaɠaa niina ga ɗa ɠa è tèʋegai. 26 Gè è lɛa ga tiye, nà ma, nà yɛsu è lɛɛzu ga tiye, nii a kɛ nɛɛbɛi nii è dɛa ga ze, naama nɛɛbɛi ɠɛ ti-yiimaʋɛti, nà ɓɔɠɔi ɓalaa gè ɠili ti ʋa.»

John 17 (TOMA)

In Other Versions