Jude 1 (TOMA)
1 Nɛ̀i gè ga Zude, Zake deɠei, gè ga Yesu Kilista ná-botiɠɛ nu, nà ɠa gè sɛʋɛi nii leʋesu wo ma, wɔi Ɠɛɛɠɛ GALA ge wo loligai, é wo nɛai ʋɛ, ta Yesu Kilista wo makɛsu. 2 Maawɔinɠai ta ziilɛigi ta nɛɛbɛi ɠɛ wo ma ga gola. 3 Nɛ̀ɛɲɔɠɔiti, eɠɛʋelei wɔin ɠɛni mà la, ga gè sɛʋɛi ɠɛ wo ma, é ʋilɛ kizo fai ʋa ade ɓɔgai ma, kɛɛɠeleɠele ge la ná, kɛni gè kɛ, naa ɠa a kɛ, gè wo iɲɔdɔ ga wo kɔɔi ɠɔ kidaaleʋei vaa zu, é veeni GALA ná-nuiti zea, ná ɠɛ ɠila kpe nɔ. 4 Mazɔlɔɔ nui tanigaani ti lɔɔni wo zaama dɔɔɠuzu, niiti ta-undaaʋili fai wogai kaite GALA Sɛʋɛi zu, GALA gaazuluabalala nuiti, niiti ti da-ƓALAGI ná-zaalai maavalibosu ga ɓaaɠulama vai, ti ɗa ɠɛlɛ da-Ɠalamɔn ɠila kpegi ʋa, é ga de-Maliɠii Yesu Kilista. 5 Anɛɛ ni wo niima vaiti kwɛɛ kpezekele ga pagɔ, nà wo loozu ɠisu, ʋelei Maliɠii Izilayɛle nuiti kizoni da, é ti ɠula Ezipete yooi ʋa, kɛlɛ naa ʋolu é naati undaaʋilini, niiti ti la ɠɛni kɛɛni, ti ʋa la da. 6 À ɠizɛ geezuɠeelaiti su, zobogi é ɠɛni ti ya, naa la ɠɛni ti ɛnɛkɛni, kɛlɛ ti ɠɛlɛni ti-losuʋɛ ʋa, GALA ge ti makɛgɛ, é ti ɠili ga yɔlɔɠɔi ɠɔoɠɔ kpidii zu, eyɛsu folo wolai zeeli, tukpɔɠaaleʋe yeei. 7 À ɠizɛ Sɔdɔme ta Gomɔɔl zu, ta ti ɠoba laaiti, naati ɓalaa ti kɛɛni ɠana nɔ, ti ɓɔɠɔ lɔ koloɠologi zu, ti ɗa naa ɠɛ, nii nu maa la nɛɛni è ʋa kɛ. Ta ʋaazu ma zalai zɔlɔɔsu ga ɠɔoɠɔ abui, ta-vai ma ʋoogi veeʋɛ é ɠɛ ga tɛnɛgi ɛsɛ pɛ bɛ. 8 Anɛɛ naa ʋe, niima nuiti ɓalaa ta kɛɛzu ɠana nɔ ti ɠisu vai zu, ta ti ɓɔɠɔ ɓusɛi ɠɔzɔzu, ti ɗa maliɠilai ʋɛlɛʋili, ti ɗa lɛbiya vulu aniiti poomu, niiti ti geezuʋɛ. 9 Tama anɛɛ geezuɠeela ɠundiɠii Misɛle ɓɔɠɔgoi, siɛgi zu ti ɠɛni maaɠaalii loozu la ta Inɛgi Moize ma ʋoomai maazu, é la ɠɛni maalɔɔ ʋoomu goo woni ma, kɛlɛ é ɠɛni nɔ ma: «Maliɠii zelii lo è ma!» 10 Kɛlɛ niima nuiti, nii ti la kwɛɛ, naa ɠa ta ɗa poomu. Nii ma ti kwɛɛ, wɔin ti ma eɠɛʋelei dɔɓɔ zuaiti ti la, ɠi ge la ti ma, naa ɓɔɠɔi ɠa a ɗa ɠɛ ga ti undaaʋili zaɓui. 11 Nimizai ɠa ti luɠɔ! Mazɔlɔɔ ti ʋilɛga naama ʋelei ʋa, Kayɛn ziɛni la, ti ɓɔɠɔ lɔa kakagi zu wali mii vai zu ga Ɓalaame ɠɛʋele, ti ɓɔɠɔ undaaʋilini, tɔɔzei ti ɓakani ga Kolé ɠɛʋele. 12 Ta ɠaazuɠulana wa-nɛɛbɛ laamii wosuʋɛ, ta ɓaaɠula naa ma, ta ɗa fɛtii ɠula unfetalai zu, ti ɓala ga ɓɔɠɔ nɔ. Ta ga tonaɓiingiti, niiti ziɛ la ti zu, fiilɛi ɗa ti yɛʋɛ ga. Ta ga guluiti ti la waazu ma yeeɠɛɠalai ma, guluiti ti lɔɔɠulaai, ti za. 13 Ti ɠɛɛʋɛ eɠɛ kpoloɗɛi ma lakpatakpa ɲɔi, ti ɗa ta-unfetala ɠɛɛwotiiti kulakɛlɛma eɠɛ ziɛ vuɠei. Ti ɠɛɛʋɛ eɠɛ somideɠaiti ti ziɛziɛsu. Kpidi ɓɔii ɠa makɛgai ti laalɔɠɔma, ʋɛ ti yɛsu ná ɠɔ. 14 Tiya ɠa, Enɔke é ga Adama mavofodai lɔfelasiɛi, kaite é niima vaawokɛɛyeeluɠɔ ɓɔɛi woni ta-vaa zu ga: «Wɛlɛ! Maliɠii ɠa ʋaazu ga ná-geezuɠeela ɲadega waa mɔinmɔingiti, 15 ga é ti pɛ tukpɔɠaaleʋe, naa ɠa a kɛ é faa ɲɔu ɠɛ nuiti pɛ peelala, tɔɔzei ta-vaa ɲɔiti ba ti kɛɛzu GALA daalɔɠɔma, ta kpɔɛ ɲɔiti pɛ faa zu kotoba nuiti unfema la ti ya, ti boni tɔun daalɔɠɔma.» 16 Niima nuiti ti ɠoozu la nɛa yeenɔpɛ nɔ, ti ɗa unsuyelii lo nɔ ɠɔ, ti ɗa ziɛ nɔ ga ti ɓɔɠɔyiimai nɔ, ti ɗa waso kpɔɛiti bo, ti ɗa nuiti maamusɛ tɔnɔ sɔlɔɔ fai ma. 17 Kɛlɛ wɔun wa, nɛ̀ɛɲɔɠɔiti, à ɠizɛ naama vaiti su, niiti de-Maliɠii Yesu Kilista ná-keelaiti ti ti woni wo ma ma yeeluɠɔ. 18 Ti ɠɛni wo ma: «Folo ɠaaɓelagiti su, ɲɛɛɠulasu nuiti ta ɠɛ ná, ti ɗa ziɛ ga ɓɔɠɔyiimai GALA gaazuluabalalai zu.» 19 Ta ga naama nuiti, niiti ti zeeɠaaɠwɛɛ vaiti kɛɛzu, kpusɛ zu vaiti ti pilɛ sɔlɔɔgɛ ti ma, GALA Zɛnvui la ti ʋa. 20 Kɛlɛ wɔun wa, nɛ̀ɛɲɔɠɔiti, à lo kpaan wa-ɠidaaleʋe ɲadega wolai zu. À GALA fali ga Zɛnvu Ɲadegai maaʋele. 21 À ɓɔɠɔ makɛ GALA ná-nɛɛbɛi zu, wo ná maaɓɔun ga de-Maliɠii Yesu Kilista ná-gaazumaawɔinɠai zu, é ɠɔoɠɔ zɛnvui ve wo ya. 22 À naati maawɔinɠa, niiti ti inɛinɛsu. 23 À ti ɠizo, wo ti ɠula abui ɠa. À zɔiti maawɔinɠa ɠana, kɛlɛ dualuagi ɠɛ wo ʋa ga wo ti ɠɔba zeɠei wɔinzeɠe, nii kɔzɔai ga kpusɛi ma ɠaazuɠulapɔi. 24 Zɔi zobogi bɛ, é wo makɛ, wa ʋa loo kaka fai tanɔpɛ su, é wo ɠula kɛlɛma ná-lɛbiyai ɠakalaʋɛ, kɔzɔzu nɔpɛ ge mina ɠɛ wo ʋa, wo-yiimaʋɛ laavegai ga koozunɛɛi, 25 GALA gila kpegi naa de Ɠizo Nui, ga Yesu Kilista de-Maliɠii maaʋele, lɛbiyai, ta maayikii, ta zɛbɛi, ta zobogi ɠa bɛ, kaite wɔlɔwɔlɔ, ta niizu, ta eyɛsu ɠɔ! Amina!