Matthew 18 (TOMA)
1 Naama ziɛgi zu kaladopoiti ti maaɓuɠani Yesu ʋa, ti gaazaɠa, ti ɠɛ ma: «Ɓɛ ɠa mu bɔɔlɔai geeɠɔlɔgi ma masadai zu?» 2 Yesu zɛba é doungoi ta loli, é pilɛ ti zaama. 3 É ɠɛni ti ma: «Gè bo wo ma ga gaamai, ni wo la wo-ziɛ ʋelei maavaliboni, wo ʋa ɠɛ ga doungoiti kɛʋele, wo la lɔa geeɠɔlɔgi ma masadai zu. 4 Naa ɠa é ba, zɔi nɔpɛ a ɓɔɠɔmaayeina eɠɛ doungoi nii, naama nui ɠa wɔɔlɔ geeɠɔlɔgi ma masadai zu. 5 Zɔi nɔpɛ a yeezei doungoi ta wu eɠɛ nii, nɔ̀un maaʋele ma, naama nui yeezeiɗa bù, nà ɓɔɠɔi.» 6 «Kɛlɛ doungoi niiti kpein ti laai nɔ̀un da, zɔi nɔpɛ a ti ɠila kpalaa toona kotoi zu, a la vizɔ naama nui ma ga kɔtu wolai ɠili kɔgi ʋa, ti pili, é yɛ kpoloɗɛi wu. 7 Maanɔɠɔ vaa ʋe eteai ʋɛ ga kaka faiti ti ʋa, niiti ti nuiti toozu kotoi zu. Kɛɛɠeleɠele kili ge la ná, kɛni naa ɠɛɠala vaiti ti ʋa, kɛlɛ maanɔɠɔ wola ɠa naama nui ʋɛ, nii ti ʋaazu ga maaʋele. 8 Ni è-yeei ɓaa è-ɠɔɠɔi ɠa é è loozu kotoi zu, ti leʋe ɓɔɠɔ ʋa, è ti ʋili ya poun. Tɔɔzei fizɔgɛ è ma è lɔ ɠɔoɠɔ zɛnvui zu ga è maalɛɠɛfɛgai, kɛlɛ è-yee felegɔi ɓaa è-ɠɔɠɔ felegɔi mina yɛ è ʋa, è ʋa ʋili ɠɔoɠɔ abui zu. 9 Ni è-ɠaazuɠɛzɛi ɠa é è loozu kotoi zu, kula su, è pili ya poun. Tɔɔzei fizɔgɛ è ma ga è lɔ ɠɔoɠɔ zɛnvui zu ga è-ɠaazu ɠila kpe nɔ, è-ɠaazuɠɛzɛ felegɔiti gaavɔnigai ʋa yɛ è ya, ɗa ma è ʋili undaaʋili abui zu.» 10 «À dama, wo mina doungoi niiti gila kpalaa bɛlɛlala, tɔɔzei gè bo wo ma, ta-ɠeezuɠeelaiti ta wɛlɛzu siɛnɔpɛ su Kɛ̀ɛ ɠaazu, nii é geeɠɔlɔgi zu. 11 [Tɔɔzei Nu ná-Doun Zunui ʋaaʋɛ naati kizosu, niiti ti loai ya.] 12 «Wa ɠisiɛzu ɠale? Ni baala ungila (100) ka ɠɛna zunui ta ya, gilagi loo ya, ni é la puutaaʋuugɔ maazu taaʋuugɔiti (99) zɛga ná gizeiti ma, é ʋa li zɔ ɠilagi ɠaiziɛzu, nii toai ya? 13 Gè bo wo ma ga gaamai, ni a kaana, baala gilagi naa ɠa gola ɠoozunɛ, é leʋe zɔ ʋuutaaʋuugɔ maazu taaʋuugɔiti (99) ba, niiti ti la ɠɛa looni ya. 14 Zekana ɓalaa wo-Ɠɛɛ la, nii é geeɠɔlɔgi zu, é la pɔ ga niima loungoi ɠila kpalaa ge loo ya.» 15 «Ni è-ɠɛɛloin a koto ɠɛɛna è laalɔɠɔma, li, è bo ma wo felegɔ wo yɔɠɔzu. Ni a woilona è-woo ma, naazu è è-ɠɛɛloin zɔlɔɔga. 16 Kɛlɛ ni é la kɛɛni é ʋa woilo è-woo ma, nu ɠila ɓaa nu felegɔ ʋɛɛ ɓɔɠɔ ʋa, naa ɠa a kɛ nii nɔpɛ a ɠɛ wosu, ‹ti pɛ gaaɠula ba ga zeele felegɔ ɓaa zeele saʋagɔ ná-zeele wooi maaʋele.› 17 Ni é la kɛɛni é ʋa woilo naati goo ma, bo Egilisii ma. Ni é la woiloni Egilisii woo ma, pɛtɛ ga kidaaleʋelala nui, ɓaa mulu zo nui è letema. 18 «Gè bo wo ma ga gaamai, nii nɔpɛ wa pele leʋe tuɠɔ zooi ma, pele ɠa leʋe naa luɠɔ geeɠɔlɔgi zu. Nii ma wo pele viesu tuɠɔ zooi ma, pele ɠa vie naa luɠɔ geeɠɔlɔgi zu. 19 «Nà bosu wo ma ɓalaa ga: Ni nu felegɔ wo zaama, ta zoloona faa ɠila ma zooi ma ga ti fali, Kɛ̀ɛ nii é geeɠɔlɔgi zu, naa ɠa kɛ ti ʋɛ. 20 Tɔɔzei, ʋɛ nɔpɛ nu felegɔ ɓaa nu saʋagɔ ta ɠaalɛ ba ná dàaseigi zu, nà ti zaama.» 21 Naama ziɛgi zu Piyɛlɛ maaɓuɠani Yesu ʋa, é gaazaɠa, é ɠɛ ma: «Màliɠii, nii kɛ̀ɛloin ɠa ba nɔ, é ɗa kotoi ɠɛ dàalɔɠɔma, nà suvaayɛ ga seizu lielegɔ? Gè suvaayɛ ga seizu lɔfela mu ɓaa?» 22 Yesu ɠɛni ma: «Ɓa-o, gè la ɠɛɛzu è ma seizu lɔfela, kɛlɛ seizu ʋuulɔfela (70) zeizu lɔfela. 23 «Tɔ ɠa é ba, geeɠɔlɔgi ma masadai ɠulaʋɛ eɠɛ masagi nii é ná-botiɠɛ nuiti tolini ga ti ʋoluvaawo ma, é lo ná-naavoloi ʋa. 24 Siɛgi zu é gaalugi lɔɔzeini la, ti ʋaani pɔ ga nu ɠila, nii maaɠuyei wola mɔinni ga walii. 25 Kuyei naa ɠula zobo nɔpɛ ge la ɠɛni zunui naa ʋɛ. Ná-kundiɠii devei veeni ga ti tɔ ɓɔɠɔi ʋɔdi, ta anzai, naa ʋɛɛ ná-dointi ta kɔligiti pɛ ba, nii a kɛ maaɠuyei ɠula. 26 Botiɠɛ nui ʋilɛni ɲiibiɠa zooi ma ná-kundiɠii ɠɔɠɔwu, é maanɛɛnɛ, é ɠɛ ma: ‹Yiilɔɔ kae, nà ɗa-ɠuyei pɛ kulazu.› 27 Zunui naa maawɔin ná-kundiɠii zoni gola, é suvaayɛ ga naama ɠuyei, nii é ɠɛni ma, é ɓe naa ʋa, é li. 28 «Siɛgi zu zunui naa ɠulani la ná-kundiɠii ʋɔ bɛ, ti ɠomini ta ná-botiɠɛɲɔɠɔi gila, tɔ ɓalaa ná-kuye ɠɛni naa ma ga wali go. É naa zoni kɔda, é ɠɛ ma: ‹Nà-kuyei é è ma, kulana!› 29 Botiɠɛɲɔɠɔi maanɛɛnɛni, é ɠɛ ma: ‹Yiilɔɔ kae, nà ɗa-ɠuyei pɛ kulazu.› 30 Kɛlɛ é la kɛɛni é ʋa naa zuvaayɛ. É liini, é pili kasoi ɠa, eyɛsu naa ɓe ga ná-kuyei ɠula. 31 «Ná-botiɠɛɲɔɠɔiti ti naama vaiti pɛ kaai ma niiti ti ɠɛɛni, ti yiiɓɔlɔni gola, ti liini, ti ti pɛ bo ta-ɠundiɠii ma. 32 Naa zɛba é ma botiɠɛ nui loli, é ɠɛ ma: ‹Ɗa ga botiɠɛ nu ɲɔu, è màanɛɛnɛʋɛ, gè è zuvaayɛ ga è-maaɠuyei pɛ. 33 Ɗa ɓalaa, lee vaa zu è la ɗa-wotiɠɛɲɔɠɔi maawɔinɠaani ga ʋelei gè kɛa la è ʋɛ?› 34 Ná-kundiɠii yiiɠaawana ʋelei ma, é pilini kasoi ɠa tɔ ɓalaa, ga ti maanɔɠɔ, eyɛsu é ɓe ga maaɠuyei pɛ kula. 35 «Kɛ̀ɛ nii é geeɠɔlɔgi zu, ʋele ɠana é ʋaazu kɛɛzu la ga wo ɠilagilagiti pɛ, ni wo la ɠɛ kɛɛni, wo ʋa wo-ɠɛɛlointi suvaayɛ ga yiimaʋɛ pɛ.»