Romans 6 (TOMA)

1 Lee ɠa da bo mu naazu? De maanɛɛʋɛ de ɗa eteai ziɛ kotoi ɠɛai zu, naa ɠa a kɛ GALA ná-zaalai zuwɔɔlɔ gola ɓaa? 2 Tɔun naa li poun! Adɛiti de zaa ga de ɓeteʋe kotoi ʋa, da da-eteai ziɛzu mɔnɔ ɠale kotoi ɠɛɛ vai zu? 3 Wo la suɠwɛɛ ɓaa, ga adɛiti kpein de ɓatizegai Yesu Kilista ná-gilibalai zu, ná-saai ma ɠilibalai zu ɠa de ɓatizegai ná? 4 Ɓatizei maaʋele ma deɠɛmu, ade maaɠuluni ada tɔun, tɛi ade zaani ada tɔun, naa ɠa a kɛ, ʋelei Kilista wuzeɠeni la, é ɠula saai ya, Ɠɛɛɠɛ GALA ná-lɛbiyai ma zɛbɛi zaɓui zu, da ɓalaagi de eteai ziɛ zɛnvu niinɛlai zu. 5 Mazɔlɔɔ ni ade ɠɛa ga ani ɠila ada tɔun, ga ná-saai ma zii ɠɛʋele, ada ɠɛ ga ani ɠila ga ná-buzeɠei ma zii ɠɛʋele. 6 De kwɛni de ɠɛ, de ɠɛʋele wɔlɔmai, naati ta Kilista ti ɓadɔni saa wului ma ʋɔɔma, naa ɠa a kɛ, kotoba ɓusɛi ɠoloɠolo, de mina mɔ ɠɛ ga kotoi ná-duɔiti. 7 Mazɔlɔɔ zɔi saai, naa la mɔ duɔla zu kotoi ya. 8 Ni de zaani ʋɔɔma da Kilista, de laaʋɛ da ga da zɛnvui wo ɓalaa ʋɔɔma da tɔun. 9 Ade suɠwɛɛ ga Kilista, nii buzeɠeai, é ɠula saai ya, é la mɔ zaa ʋolu, saai ná-zobo nɔpɛ ge la mɔ ma ɲɛgɛlɛin. 10 Mazɔlɔɔ saai naa é boni, é zaani kotoi ma vaa zu, naa ɠɛ ɠila kpe, é ɠwɛ naa ʋa, kɛlɛ zɛnvui é bosu niina, toɠa bosu GALA bɛ. 11 Zenɔ ɠana wa ɓalaagi, à ɓɔɠɔ ʋɛtɛ ga wo za, wo ɓeteʋe kotoi ʋa, wa niina vulua GALA bɛ, wa-ɠilibalai zu wa Yesu Kilista. 12 Kotoi maa la mɔ nɛɛni, é ʋa zei wo-ɓusɛi unda, é ga saa gelei, ga wo ʋa ɗa ɠolo kpusɛi naa yiima vaiti bɛ. 13 À mina wo-ɓusɛi ʋaalobazuʋɛti fe kotoi ya ga telebotalai ɠɛɛ zɔɔlaiti. Kɛlɛ à ɓɔɠɔ ve GALA bɛ ga nuɓusɛiti, niiti ti vuluai su, ti ɠula saai ya, wo ɓɔɠɔ ve mɛtu ga telebodai ɠɛɛ zɔɔlaiti. 14 Mazɔlɔɔ kotoi la zeiɗa wo unda, tɔɔzei wo la tɔ bu, kɛlɛ kɛni GALA ná-zaalai. 15 Leeni ʋe mu? Da yɛ kotoi ɠɛɛzu, tɛi de la tɔ bu, kɛni GALA ná-zaalai? Ɓa-o, naa li poun! 16 Wo kwɛni kpezekele ga ni wa ɓɔɠɔ veena nu ya, wo ɗa boti ɠɛ bɛ, wo ɠolo bɛ, wo ɠɛa ga naa ná-duɔi, nii wo ɠolozu bɛ, é ɠɛni ga kotoi ʋe, nii gaaɓelagi ga saai, ɓaa ni GALA gooi zo fai ʋe, naa ɠaaɓelazuʋɛ ɠa ga telebogi. 17 Kɛlɛ mamagi ɠɛ GALA bɛ, wɔiti mɔungi zu wo ɠɛni ga kotoi ná-duɔiti, wo ɠoloa niina ga wo-yiimaʋɛ pɛ naama vaiti bɛ, ti kalagi zu, wo sɔlɔɔni. 18 Tama wo ɠulaa kotoi ná-duɔlai zu, wo ɠɛ ga telebodai ná-duɔiti. 19 Ʋelei nuɓusɛi a ɓɔɛ la, ʋele ɠana gè ɓɔɛzu la, tɔɔzei wo-ɓusɛi ná-zɛbɛsulalai ʋa. Ʋelei mɔungi, wo wo-ɓusɛi pɛ dɔɔni la duɔlai zu, é ɠɛ ga kɔzɔba vai ta tɔ koloɠolo fai, ga wo ɗa eteai ziɛ tɔ koloɠologi zu, niizu à ɓɔɠɔ ve lɛɛ ɠana eɠɛ duɔiti, wo ɠɛ ga telebodai ɠɛ nuiti, ga wo eteai ziɛ ɲadedai zu. 20 Mazɔlɔɔ siɛgi zu wo ɠɛni la ga kotoi ná-duɔiti, wo vieni, faa la ɠɛni wo ʋa telebodai letemazu. 21 Lee ma ɠulanuma ɠa wo sɔlɔɔni naama ɠɛɛwotiiti ba, niiti wo unfesu ga tiye niizu? Naama ɠɛɛwotiiti gaaɓelazuʋɛ ɠa ga saai! 22 Kɛlɛ niizu, tɛi wo ɠula kotoi ná-duɔlai zu, wo ɠɛ ga GALA ná-duɔiti, kulanumai wo sɔlɔɔsu, naa ɠa é ga ɲadedai, nii wo ʋaazu sɔlɔɔsu gaaɓelagi, naa ɠa é ga ɠɔoɠɔ zɛnvui. 23 Mazɔlɔɔ kotoi ma zalai ɠa é ga saai, kɛlɛ GALA ná-vebɛanii, nii sɔngɔ ve la ba, naa ɠa é ga ɠɔoɠɔ zɛnvui, da-ɠilibalai zu da de-Maliɠii Yesu Kilista.

Romans 6 (TOMA)

In Other Versions