Romans 6 (YAPE)
1 Ere mang e ngadogned? Nge lungudad e ngu’ud pired ni gadad be denen nge yag ni ga’ e runguy rok Got ngodad? 2 Ri danga’! Ya kadm’ad rok e denen — ere ra di’in mu ud pired ni kagadad be par u fithik’? 3 Bmuduwgil ni gimed manang e re bugithin ni ba’aray: nap’an nni tawfe nagdad ni aram e kadta’ab girdi’gad Kristus Jesus, ma ni tawfe nagdad ni kad uned ko yam’ ni tay. 4 Ere tawfe ntay ngodad e kan unegdad ngak kan k’eyagdad kad uned ngak ko yam’, ni fan e rogon ni faseg e en ni Chitamangiy Jesus nga gelngin nrib gel, e ku aram rogodad ni nge yag ni ud pired ko bin nib be’ech e pangin. 5 Ya fa’an gadad ra ta’ab girdi’ ngak ko yam’ ni tay, me ere ku aram rogon ni gadad ra ta’ab girdi’ ngak ngan fasegdad ko yam’ ni bod rogon ir. 6 Ya gadad manang e re bugithin ni ba’aray: bin kakrom i gadad e kan uneg ngak Kristus kan li’row u daken e kuruth rok, ni fan e ngan kirebnag gelngin e bin kakrom i gadad nib tadenen, ya nge dab ku ud pired ni gadad e sib rok e denen. 7 Fa’anra yim’ be’ ma ke chuw u fithik’ i gelngin e denen. 8 Fa’anra kad uned ngak Kristus ko yam’ ma mmich u wun’dad ni ka gadad ra un ngak ko fos ko yam’. 9 Ya gadad manang ni kan faseg Kristus ko yam’ ni gathi bay ki yim’ bayay — ya yam’ e dakuriy rogon gelngin ngak. 10 Yam’ ni tay e aram e ke yim’ rok e denen, ni gathi bay ki yim’ bi’id; ma re yafos ni be par riy e chiney e be par riy ni bay rok Got. 11 Ere aray rogon ni ngam leam niged gimed ni kam m’ad rok e denen ma kam folgad ni gimed bay rok Got ni kam ta’ab girdi’gad Kristus Jesus. 12 Thangri dabki par ni denen e be gagiyegnag dowmed ni bogi dowef ni bay yim’, ya ir e ma waliymed ngam folgad ko tin ni be yim’ e dowef romed ni bochan. 13 Ma thingar dab kum paged fan bang u dowmed ngak e denen ni ngan maruwel ngay ni fan ko tin nib kireb. Machane ngam pi’ed gimed ngak Got, ni bod rogon e girdi’ ni kan chuwegrad ko yam’ kan fekdad ko yafos, mi gimed pi’med nge tafinay romed ni polo’ ngak ngan maruwel ngay ni fan ko tin nib mat’aw. 14 Ya denen e thangri dabki par ni ir e be gagiyeg nagmed; ya damur pired u tan e motochiyel, ya gimed be par u tan e runguy rok Got. 15 Ere uw rogon? Gur ngu’ud denengad ni bochan e dad moyed u tan e motochiyel ya gadad bay u tan e runguy rok Got? Ri danga’! 16 Bmuduwgil ni gimed manang e re bugithin ni ba’aray: fa’an gimed ra pi’med nga pa’ be’ ri bod rogon e sib, ni aram e ngu’um folgad rok fa’anem, ma aram e kam manged sib rok fare masta ni ir e gimed be fol rok — ni demturug ko denen e kam manged sib rok, ni wenegan nma yib e yam’, ara kam manged sib rok e fol, ni wenegan nma yib e kan mat’aw ngak Got. 17 Machane ke magaer Got! Ya immoy ba ngiyal’ ni um pired ni gimed e sib rok e denen, machane chiney e ri gimed be fol ko tin nib riyul’ ni ir e kan machibnag ngomed. 18 Kam chuwgad u pa’ e denen kam manged sib rok e tin nib mat’aw. 19 Gu be yog ngomed u fithik’ e thin nib mom ni yira nang fan, ya richey ma de yag ni mu nanged fan e n’en ni gu be yog. Bay ba ngiyal’ ni mpi’ed gimed ngam pired ni kam manged sib rok e tin nde machalbog nge tin nib kireb, ni fan ko tin nib kireb ban’en. Ere aram rogon nthingar mu paged gimed ngam manged sib rok e tin nib mat’aw, ni fan ko tin nib thothup ban’en. 20 Nap’an ni um pired ni gimed e sib rok e denen, ma da um pired u tan pa’ e tin nib mat’aw. 21 Ere be mang e ren’en ni bfel’ ni yib ngomed ko pin’en ni um ngongliyed ni gimed be tamra’ ngay e chiney? Wenegan e pin’em nma yib e yam’! 22 Machane chiney e kan chuwegmed u tan pa’ e denen kam manged sib rok Got; ma wenegan nike yib ngomed e kari mpi’ed gimed nga pa’, ma tomuren e biney, e yafos ndariy n’umngin nap’an e bay yag ngomed. 23 Ya denen e ma pi’ puluwoy — ni yam’; machane tow’ath rok Got ngodad ndariy puluwon e yafos ndariy n’umngin nap’an nra pi’ u daken e ta’ab girdi’ ni kad ted e Somol rodad i Jesus Kristus.