Romans 11 (YAPE)
1 Ere nggu fith ni nge lungug: I n’ag Got girdi’en fa danga’? Rib muduwgil ndanga’! Er rogon gag ni gu be’ u Israel, ni gag reb i owchen Abraham, ni gag girdi’en e ganong ku Benjamin. 2 I Got e dawori n’ag girdi’en, ni yad e mel’egrad ko som’on. Gimed manang fa gin’em u lan e babyor nib thothup ni fa’an bay riy ni wenig Elijah ngak Got nib togopluw ngak yu Israel ni ga’ar: 3 “Somol, kar li’ed e pi profet rom, ma kar buthuged e pi altar rom; ma kemus ni gag e kug magey, ma yad be guy rogon ni ngar li’ed gag nggum’.” 4 Ere mang e fulweg Got ngak? I fulweg ni ga’ar, “Kug tay rog medlip biyu’ i girdi’ ni pi’in ndawor ra uned i tayfan ma dawor ra meybilgad ko fare kan ni gathi riyul’ nib got, ni Baal fithingan.” 5 Ere ku errogon e ngiyal’ney: bay bochu’uw e girdi’ nike mel’egrad Got, ni bochan e runguy rok. 6 I mel’egrad ni bochan e be runguyrad, ma gathi bochan e n’en ni kar ngongliyed. Ya fa’an mang e ma mel’eg Got e girdi’ ni bochan e n’en ni kar ngongliyed, me ere runguy rok e dabi aw nreb e runguy nib riyul’. 7 Ere uw rogon? Yu Israel e dar pir’eged e ren’en ni yad be changarnag. Ya kemus ni fachi ulung ni Got e mel’eg e yad e ra pir’eged; ma pi’in ndar uned ko re ulung ney e dar matoyilgad ko pong ni be tay Got. 8 Ni bod ni be yog e babyor nib thothup ni be ga’ar, “Ke bo’golnag Got gum’ircha’rad nge lanin’rad; ke mada’ ko bin daba’ e rran ma dabiyag ni ngar guyed ban’en ngalan owcherad fa rrung’aged ban’en ngalan telrad.” 9 Me ga’ar David:“Manga yigi kolrad e mur ni yad be tay miyad mit riy ni gowa kar awgad ko wup,manga ra dol’gad ma manga ni gechig nagrad! 10 Manga yigi man owcherad nge siy ku ra guyed ban’en;ma ga muruwliy ngar bugbuggad u tomalngin e gafgow rorad ni gubin ngiyal’.” 11 Ere nggu fith ni nge lungug: I tun ay piyu Israel ni fan e ngar dol’gad ngar kirebgad? Ri dangay! Kanawo’en ni ngan thap ngak Got e ke yib ngak e pi’in gathi yad piyu Israel ni bochan e ke denen piyu Israel, ya nge awan’ piyu Israel ngak e pi’in gathi yad piyu Israel. 12 Ma denen ni tay piyu Israel e fek e fel’ rogon i yib ngak e pi’in gathi yad piyu Israel, ma gafgow nra ted ni daki tamilangan’rad ko thin rok Got, ni bochan e dar folgad e fek e fel’ rogon i yib ngak e pi’in gathi yad piyu Israel. Ri bayi ga’ e re fel’ rogon ney ko ngiyal’ nra yan i gaman e matha’eg rok piyu Israel, ni pi’in ngarbad ngak Kristus! 13 Chiney e gu be non ngomed e pi’in gathi gimed piyu Israel ni be lungug: n’umngin i nap’an ni gu be par ni gag ba apostel ngak e pi’in gathi yad piyu Israel e bay ug par ni gub felan’ ko maruwel ni gu be tay. 14 Sana rayag ni gu muruwliy e girdi’ ko nam rog ni gamad ta’ab racha’ nge awan’rad ngomed, ma aram me yag ni gu pow’iy boch i yad ngak Kristus nge yag ni thapegrad ngak Got. 15 Ya nap’an ni n’agrad Got me m’ag Got e fager ngak e tin kabay e girdi’ u fayleng. Ere ra yan i di’in e ngiyal’ ni bay ki fulwegrad Got riy? Ra yan i aw ni bod e yafos ngak e pi’in karm’ad! 16 Fa’anra ni pi’ e gin som’on u ba yal’ i flowa ngak Got, ma aram e fare yal’ i flowa ni polo’ e ke milfan ngak; ma fa’anra ni pi’ lik’ngin ba ke gek’iy ngak Got, ma ku errogon papa’ngin nike milfan ngak. 17 Boch i papa’ngin fare ke gek’iy ni olive nni yung e kan t’ar kan n’ag, ma kan fek pa’ngin ba kaen e gek’iy ni olive nda ni yung kan puthuy ngay. Ere gimed e pi’in gathi gimed piyu Israel e gimed bod e re ke gek’iy nem ni olive nda ni yung, chiney e kam gelngiyed gelngin piyu Israel nge tin ni bfel’ nike pi’ Got ngorad. 18 Aram fan nthingar dab mu darifannag e pi’in yad bod fapi papa’ngin fare ke gek’iy ni kan t’ar kan n’ag. Ra di’in me tolangan’um? Ya gur e kemus ni gab pa’ngin; ma gathi gur e ga be chibiy lik’ngin, ya lik’ngin e ir e be chibiyem. 19 Machane bayi lungum, “Er rogon, machane fapi papa’ngin e nt’ar ngan n’ag ni bochan e nge yib luwag.” 20 Er rogon; nt’arrad ni bochan e de mich Jesus u wun’rad, mi gur e mpar u luwam ko re ke gek’iy nem ni bochan e mich Jesus u wun’um. Machane dab mu uf ngay; ya ngam tamdag. 21 Ya fa’anra ke chuweg Got e tin rri papa’ngin e re ke gek’iy nem ni er piyu Israel, ma gimed be finey ndabiyag ni nge chuwegmed? 22 Ren’ey e be dag ngodad feni gol Got nge feni gel e thin rok. Ba gel e thin rok ngak e pi’in kar mulgad, machane ba gol ngom — ni fa’anra um par u fithik’ e gol rok; ma fa’anra dab mu par, ma ku errogon gur ni bayi t’arem nge n’igem. 23 Ma piyu Israel e fa’an yad ra pag e ren’en ni ba’aram nder mich Jesus u wun’rad, mra fulwegrad Got ko gin ni ur moyed riy, ya Got e rayag rok ni nge fulwegrad bayay. 24 Ya gimed e pi’in gathi gimed piyu Israel, e gimed bod pa’ngin ba ke gek’iy ni olive nda ni yung, ni kan t’ar kan puthuy nga ba kaen e gek’iy ni olive nni yung, ni ban’en ni gathi yima rin’. Piyu Israel e yad bod e re ke gek’iy ni olive ney nni yung, ni kab mom ku Got ni ngki fulweg e pi pa’ngin e re ke gek’iy ney nike t’ar ngki puthuy ko re ke gek’iy ney ni ur moyed riy. 25 Pi walageg, bay e tin riyul’ nib mith ni gub adag ni ngam nanged; ya ir e ra talegmed ndab ku um tafinay niged rogon fanmed llowan’, ni ba’aray ni ga’ar: gel laniyan’ rok e girdi’ nu Israel e dabi par, machane bay i par nge mada’ ko ngiyal’ nra yan i gaman e matha’eg rok e pi’in gathi yad piyu Israel ni ngarbad ngak Got. 26 Aray rogon ni bayi thap yu Israel ni polo’ ngak Got, ni bod ni be yog e babyor nib thothup ni be ga’ar:“En nma thapeg e girdi’ ngak Got e bayi yib u Zion,ma bayi chuweg urngin e wok nge tafinay nib kireb rok e pi’in yad owchen Jakob. 27 Bay gu ngongliy e re m’ag ney ngorad ko ngiyal’ ni bay gu chuweg e denen rorad.” 28 Ni bochan e ra n’iged fare Thin Ni Bfel’, ma aram miyad mang to’ogor rok Got ni fan ngomed e pi’in gathi gimed piyu Israel. Machane yad e mel’egrad Got, ere yad e pi tafager rok ni bochan e pi chitamangirad. 29 Ya Got e der ma piliyeg laniyan’ rok e en ni mel’eg nge tow’athnag. 30 Ma gimed e pi’in gathi gimed piyu Israel e da um folgad rok Got kakrom; machane chiney e ke runguymed Got, ya dakir fol piyu Israel rok. 31 Ere ku errogon nike runguymed Got ma dakir fol piyu Israel rok, ni fan e ngki runguyrad Got e chiney. 32 Ya Got e ke tay urngin e girdi’ karmanged kalbus rok e danir fol, ya nge yag ni runguyrad ni yad gubin. 33 Rib ga’ e fla’ab rok Got! Ma rib to’ar e gonop rok nge llowan’ rok! Mini’ e rayag ni nge weliy rogon nma turguy Got ban’en? Mini’ e manang rogon kanawo’en nma maruwel? 34 Ni bod ni be yog e babyor nib thothup ni be ga’ar:“Mini’ e manang laniyan’ Somol?Mini’ e rayag rok ni nge fonownag? 35 Mini’ e ka’a pi’ ban’en ngak Somolni nge fulweg Somol puluwon ngak? 36 Ya gubin ban’en me ir e sunumiy, ma gubin ban’en ni ir e yib rok me ir e fan ngak. I Got e ngu’un tayfan ndariy n’umngin nap’an! Amen.