Isaiah 51 (BBPNG)
1 Hina Gode da amane sia:sa,“Dilia da Na gaga:su ba:mu hanai dunu!Dilia da Na fidisu lama:ne Nama maha! Na sia: nabima!Fedege agoane, igi amoga dili da misi, amola igi magufu amoga dilia da dogoi, amoga bu dawa:ma. 2 Dilia musa: ada A:ibalaha:me amola ea uda Sela amola bu dawa:ma.Dilia da elagaga fi esala.Na da A:ibalaha:me Nama misa:ne wele sia:noba, e da mano hame galu.Be Na da ema hahawane hamone, ema mano i.Na amane hamobeba:le, egaga fi da bagohame ba:i. 3 Na da Yelusaleme fi ilima asigili ilia dogo denesimu.Ilia moilai da wadela:lesi dagoi, amola hafoga:i wadela:i soge agoane ba:sa.Be Na da amo afadenene, bu ifabi ida:iwane,ifabi Na hemonega Idini sogega bugi amo defele, hamomu.Amo ganodini, hahawane hou bagade amola Nama nodosu gesami hea:su ba:mu. 4 Na fi dunu! Na sia: nabima!Na da fifi asi gala ilima Na: olelesu iaha.Na sema olelesu da ilima hadigi imunu. 5 Na da hedolo ilima gaga:musa: misunu.Na hasalasu eso da gadenei.Na Nisu da fifi asi gala huluane ouligimu.Soge sedaga ilia da Na misa:ne ouesala.Ilia da Na gaga:su lamu hanaiba:le, ouesala. 6 Muagado ba:legadoma! Osobo bagade ba:ma!Mu da mobi agoane asili, hamedafa ba:mu.Osobo bagade da hea abula agoane, hea hamone, wadela:mu.Amola dunu huluane amogawi esala da gagoba: defele bogogia:mu.Be Na da gaga:su hou eso huluane dialoma:ne gaguli misunu.Na hasalasu hou da hame dagomu. 7 Dilia dunu amo da moloidafa hou dawa:,amola Na olelesu da dilia dogo ganodini diala! Na sia: nabima!Dunu eno da dilima gadele sia:sea amola oufesega:sea, mae beda:ma. 8 Ilia da aowabaga mai abula defele, mugululi, alalolesi dagoi ba:mu.Be Na gaga:su gaguli misunu da dialalalumu.Amola Na hasalasu hou da fifi ahoanumu. 9 Hina Gode! Nedigima! Ninima fidima!Dia gasa amoga nini gaga:ma!Di da hemonega hamoi defele gasawane hamoma.Di da hano wayabo bagade ganodini esala ohe amo La:iha:be,amo gobiheiga fane dadamuni legei. 10 Di amola, da hano wayabo bagade hafoga:iamola Dia gaga:i dunu hahawane degema:ne, hano ganodini logo hamoi. 11 Dunu amo Di gaga:i, ilia da hahawane Yelusalemega doaga:mu.Ilia da hahawaneba:le, gesami hea:lalumu amola wele sia:nanumu.Ilia da eso huluane da:i dioi amola se nabasu hame ba:mu,amola hahawane esalumu. 12 Hina Gode da amane sia:sa,“Na da dilima gasa iaha.Osobo bagade dunu ilia da gisi agoane, hedolo bogomu.Amaiba:le, dilia da abuliba:le osobo bagade dunuma beda:ma:bela:? 13 Dilia Hina Gode da dili hahamoi amola mu hahamoiamola osobo bagade ea bai gagui. Dilia da E gogolebela:?Dunu eno da ougi bagadewane dilima se iaha,amola dili wadela:lesima:ne ouesala.Be dilia da ilima beda:mu da defea hame.Bai ilia ougi bagade hou da wali dili wadela:mu hamedei. 14 Se iasu diasu ganodini sali dunuda hedolo ilia se iasu diasu logo doasi dagoi ba:mu.Ilia da ode bagohame esalumu amola ha:i manu ilia hanai defele ba:mu. 15 Na da dilia Hina Gode. Na da hano wayabo bagade bibiagosa,amola Na hamobeba:le, ea gafului da fugala:sa.Na dio da Hina Gode Bagadedafa. 16 Na da mu fadegale gale amola osobo bagade ea bai ligisi dagoi.Na da Yelusaleme fi ilima amane sia:sa,‘Dilia da Na fi! Na da Na olelesu dilima i dagoi.Amola, Na da Na loboga dili gaga:sa.’” 17 Yelusaleme! Nedigima! Nedigili, wa:legadoma!Di da fedege agoane se iasu amo Hina Gode dilima ougiba:lefaigelei ganodini dili moma:ne sali, amo mai dagoi.Di da da:gi dagoi amola feloale asi. 18 Dia fi amo ganodini, ouligisu amo di lobolele oule masunu,agoai dunu hame ba:sa. 19 Wadela:mu hou aduna da dilima doaga:i dagoi.Gegebeba:le, dia soge da wadela:lesi dagoi ba:sa.Amola dia dunu da ha:beba:le, bogogia:i.Amola dilima asigi dunu da hame gala. 20 Moilai ganodini hegomai logo huluaneamoga dunu da gasa hameba:le, dafasa.Ilia da ohe amo benea ahoasu dunu ea sani amoga sa:i agoai ba:sa.Ilia Gode Ea gasa bagade ougi hou amoga se nabi. 21 Dilia Yelusaleme fi dunu da se nabaamola adini ba:i defele feloale ahoa. 22 Dilia Hina Gode da dili gaga:sa, amola dilima amane sia:sa,“Na da ougiba:le, dilima se iasu faigelei ganodini salawane dili moma:ne i.Be wali Na da amo faigelei bu samogemu.Dilia da amo se iasu waini hano nabeba:le, feloale asi.Be amo se iasu waini hano dilia moma:ne, Na da bu hame imunu. 23 Be amo se iasu waini hano Na da dilima se iasu dunu ilima imunu.Bai ilia da dili logoga diasa:ima:ne hamosu,amola dilima dili osobo su defele, amoga ososa:gi dagoi.”