Isaiah 51 (TOMA)

1 Ɠɔoɠɔ GALAGI ɠɛ ma:«Wɔiti wo ɓizɛzu ga kizogi ɠaiziaa, wo ɠoloai bɛ̀,à woilo gòoi ma.À ɠaazulo dɛɛ fasai ʋa,ʋɛ wo ɓɛtɛai ná ga kɔtui saɠaai,à ɠigaiziɛ lɛɛ zeɠei tɔna su,ʋɛ wo mɛɛngai, wo ɠula ná. 2 À wo-ɠɛɛ Abalaame ʋɛtɛ dɛɛ,ta Sala é wo ɠaazulaai eteai ma.Gè Abalaame loligai ma,doun la ɠɛni dɛ zea.Gè tuya looni bɛ názu,gè mavofoda mɔinmɔin fe zea.» 3 Siyɔn maawɔin Ɠɔoɠɔ GALAGI zoni,ta adaʋɛti ti ɠoloɠoloni.Ti-zeizuʋɛ ʋɛ ná ɲakaai,toɠa naa ɠɛ ga Edɛn,niima zou vɔɔi tɛi ka ɠɛ ga Ɠɔoɠɔ GALAGI ná-kpelei zu.Koozunɛ wolai ɠa a ɠɛ ná,ta maamusɛ wuyeiti ta gɛingɛin ganiiti gooi. 4 Ɠɔoɠɔ GALAGI ɠɛ ma:«Nà-nuɓusɛiti, à woilo gòoi ma,nà-zooi, woilo gòoi ma.Nà ɠa gè tɔgi zeizu,nà-tukpɔɠaaleʋei ɠa é ga wozakalagi nuɓusɛiti pɛ bɛ. 5 Ungo, nà-telebo fai maaɓuɠaa,nà-kizo fai ʋa ɠula kɛlɛma,nà nuɓusɛiti tukpɔɠaaleʋe.Ziɛ zaama yooiti ta kpoloɗɛi laaʋɛ yooiti ta ɠito bà,ti ʋoluzei nà-zobogi ʋa. 6 À wɛlɛ maazu ʋelei geeɠɔlɔgi ʋa,naa ʋolu wo wɛlɛ buu ʋelei zooi ma.Geeɠɔlɔgi ɠa ɲɛɛlɛ eɠɛ duului,zooi wɔlɔzaɠa, é loo ya eɠɛ seɠei,gaa nuiti undaaʋili eɠɛ diiliiti.Kɛlɛ kizo fai gè ʋaazu la,naa ɠa yɛ ná ɠɔ,kwɛ ge la ɠɛa nà-kɛɛwotii ma lelebodai ʋa. 7 «À woilo gòoi ma,wɔi wo faa zɔlegai ɠwɛɛ.Ee, nà-nuɓusɛiti, wɔiti wo nà-tɔgi wo-yiimaʋɛ,à mina lua nuɓusɛiti ta-ɲɛɛɠulasui ʋa,ta-ɓaaɠulamai mina wo zuɓali pa. 8 Mazɔlɔɔ ɓaɠaɓaɠaiti ta ti mi eɠɛ seɠei,fɔfɔiti ti ti mi eɠɛ baala deɠa zeɠei.Kɛlɛ nà-telebodai ɠa yɛ ná ɠɔ,nà-kizo fai ɠaa ɠa wɔɔlɔ,yeeɠɛɠalai zu nuiti pɛ bɛ.» 9 Wuun, wuun!Ɓɔɠɔ maaɠili ga zobogi, Ɠɔoɠɔ GALAGI yeei!Wuun, eɠɛ wɔlɔwɔlɔi ma voloiti,ga wɔlɔwɔlɔi ɠɛʋele nii teʋegai na!Ɗa la ɠɛni de ɓaa, è ʋa ɠɛni Ezipete yooi woloni,è ʋa kpoloɗɛ wu zua wolai naa zuɓota? 10 Kɛbɛ ɗa ɠa è kpoloɗɛi vɔɔni su,zeɠe zɛbɛlɛgi zu ɗɛiti pɛ?Kɛlɛ ɗa ɠa è pelei laani kpoloɗɛi ɓomaʋɛ,nii a kɛ ɗa-nuɓusɛiti è ti unmɔɔni,ti zoo ti leʋe? 11 Zekana é la, zɔiti Ɠɔoɠɔ GALAGI ti unmɔɔgai,ta ɠale ma, ta zeeli Siyɔn ga pilɛ sɔlɔɔ guyeiti.Ɠɔoɠɔ koozunɛɛi ɠa ti-ɠaazuʋɛti folo,ta undaanɛɛi ta koozunɛɛi zɔlɔɔ,ziiɓɔlɔi ta gaazuɠili vaiti maa ɠa ɠooza ti ʋa. 12 «Nà ʋe de, nà ɠa gè wo ɠaanɛɛnɛzu.Leeni ʋe de ɗa lua nui ʋa, é ʋaazu zaazu,nuɓusɛi ti ɠa ɠɛʋele ta tufai? 13 È yeema deɠɛmu Ɠɔoɠɔ GALAGI ma, é è ɓɛtɛni,é geeɠɔlɔgi zuvieni,é zooi ma wuulaagiti da?Folo-o-folo è zasu ɗa ɓali ga duai,tɔɔzei nu ɲɔi ná-ziiɠaawanai ʋa,é dɛɛzu ga toɠa ɠɛʋele ɓɛtɛzu,é ʋa è ɠoloɠolo?Mini ɠa nu ɲɔi ná-ziiɠaawanai ná? 14 Nágo ʋe na, kasoɠa nui ʋa ɠula kasoi ɠa.É la zaa ná-kasoi ɠa,é la ʋalaga ná-daamianigi ma. 15 Nɔ̀un nà, nà ga Ɠɔoɠɔ GALAGI, ɗa-ƓALAGI,nà ɗa kpoloɗɛi ɲiikpisu,eyɛsu ma lakpatakpagiti tugi ɠula.Dàasei ka ga Ɠɔoɠɔ GALAGI, Fai-Pɛ-Maliɠii. 16 Gè dàawooiti pua è-la,gè zèe ma niinigi zɛlɛ è maazu,nɛ̀i gè geeɠɔlɔgi zuvieni,gè zooi ma wuulaagiti kpɛtɛ,gè ɠɛni Siyɔn ma: ‹Nà-nuɓusɛi ɠa ga ɗe!› » 17 Wuun, wuun! Wuzeɠe, Zeluzalɛme,ɗɛi è ɓɔɔleai ga ziawɔi daavegai ga ziiɠaawanai,Ɠɔoɠɔ GALAGI feai è ya,ungo, è ɓɔɔleni ga gaazulati ɗaawɔi,eyɛsu é zeeli kpogi zu. 18 Doun zunuiti pɛ è ti zɔlɔɔgai,tanɔpɛ ge la ti zaama, é ɓɔni è ʋa.Doun zunuiti pɛ è ti ɠulasu,tanɔpɛ ge la ti zaama, é è zuzoni. 19 Maanɔɠɔ vaa zeizu felegɔ ɠa seeliai è ma:faa zuɠoloɠologi ta nimizai, pului ta kɔɔi.Kɛlɛ ɓɛ ɠa a è maaɓeeloo?Ɓɛ ɠa a è ɠaanɛɛnɛ? 20 È-loun zunuiti dɔtɔzuleʋea,ti laani taazuʋɛ zooi ma pele ɠobaʋɛti,eɠɛ goegiti ti ɠɔai ga balii.Ɠɔoɠɔ GALAGI yiiɠaawanaai ti ma,ti ɗa-ƓALAGI ná-zelilomai laawu. 21 Naa ɠa é ba, woilo nii ma, maawɔin nui,ɗɔungi zeɠeai ma, kɛlɛ dɔɔi maaʋele laade! 22 Ɗa-ƓALAGI, Ɠɔoɠɔ GALAGI, è-Maliɠii wooi ɠaa,zɔi é ʋaazu ná-nuɓusɛiti maalobosu:«Gè gaazulati ɗaawɔi ɠulaa è ya,è la mɔ ɓɔɔlea pɛ ga ziawɔi daavegai ga nà-ziiɠaawanai. 23 Mazɔlɔɔ nà seizu è zili nuiti zeaʋɛ,tɛi ti ɠɛni ɠɛɛzu è ma:‹Laaʋɛ, gi ziɛ è ma!›È è-ʋoluʋɛ ɠɛ eɠɛ zooi,é ɠɛ ga pelei ziɛ wo nuiti bɛ.»

Isaiah 51 (TOMA)

In Other Versions