Luke 23 (BBT1E)

1 Zab pha ibrog è jai srane Isu shii Philath ibi hà noh ne, 2 ithek è jao ne aishii the, hì pha bran è gathek bran shii asi pha lumuii hà noh ne Bisiuthek shii de mijin athan chid rabo è yao phro chiih-è awai shii Masi, saja ro è yao pha chiang è zum phro. 3 Philath è aishii sai, “Nane Jewthek pha saja bey?”Na è ji è yao arone gu ne ji chak ro. 4 Chiihphado Philath è boh phabi nane bran ibrogthek shii yao, gu ne hì pha bran shii the mua pha nyie ichiig adoh phi ro. 5 Jishii ithek bajo sriid è yao, ai awairo muyua ji è zab pha Judea pha branthek shii srobro rek. Ai Galili hà jao srane thuh shii ichiih de wuii thog sha dun ro. 6 Philath è ji yoi srane, ai è sai, “Hì pha bran yi Galilean chak bey?” 7 Ithek è Isu ne Herod è bohkhoh pha ithua pha ro è thieg mage shii, ithek è aishii Herod hà thoh ge, ji pha ishak shii awai de Jerusalem shii um. 8 Herod è Isu shii riig mage shii bajo sang, nyieliieshii ai è ai chiang yoi srane ai Isu shii bajo inai è riig yang. Ai ne luthong ne Isu ro buang pha blia riig yang. 9 Ji-è Herod è Isu shii mushai bajo sai, jimagunde Isu è nyie de achang phi. 10 Kho phabi nane Iphey yua pha masdothek è dinne sriid rek srane Isu shii gidieg rek ne gang è the. 11 Herod nane airo siphahithek è Isu makhak-riing srane the yao; chiihphado ithek è aishii yung wie guii phi srane idoh Philath shii thoh ge. 12 Ji pha idoh shii Philath nane Herod de ijak rey khlei dun; ji pha inai ibi shii awai so chung de suang ro. 13 Philath è kho phabi shii, dumuiithek shii nane branthek shii ò shii ho, 14 chiih-è ithek shii yao, “Ai è branthek shii asi pha lumuii shii noh ne lua phro è yao ne ithek è hì pha bran shii gu hà noh thog. Thiih, ichiih shii nawaithek de gu moe shii gu è aishii bujuii shii, chiih-è ithek è aishii the pha ji è ne ichiig adoh phi ro. 15 Herod è de aishii nyie ichag adoh phi, ji è ai è idoh gui thek shii thoh ge. Hì pha bran shii iy yi sbo nyie ichiig oi ro. 16 Ji-è gu aishii zuang srane dun ge yi pha ro.” 17 Hiìadun pha ishak shii idang Philath è ithek ro phatheg pha bran jia shii thoh. 18 Zab pha ibrogthek è gang ziak, “Aishii ne ua muii bo è yao! Chiih-è Barabas shii thoh ne gathek shii phi bo!” ( 19 Barabas shii phatheg hà chab pha ji ne ai è rajan shii awie pha blia rek chiih-è bran shii ua, ji è aishii ne phatheg hà chab phro.) 20 Philath è Isu shii sey ne thoh yang srane ji è branthek shii wie è yao. 21 Jishii de ithek è idoh ziak dinne yao, “Aishii zun muii bo! Aishii zun muii bo!” 22 Philath è ithek shii uomchiieng yao sha, jimagunde ai ne nyie buii blia rek mua lei? Gu ne aishii ua sbo nyie ichiig adoh phi ro! Gu aishii zuang srane thoh mua pha ro. 23 Jishii ithek è bajo gang è ziak srane yao, Isu shii ne zun chid phro. Chiih-è idohhè ithek miziak ji ne yang ge. 24 Ji-è Philath è ithek è Isu shii zun bo è lia pha ji shii ruii mua. 25 Ai è ithek chid pha bran jishii sey ne thoh phi hanyie è buii rek srane bran shii ua mua pha chiang è phatheg shii chab mua, chiih-è ai è nawaithek nyie rek yang pha ji rek bo è yao srane Isu shii ithek wad shii phi mua. 26 Siphahithek è Isu shii noh ramuii shii, Simon beng pha Khyrene soh pha rajan è wuiiramuii shii ithek è aishii si. Ithek è zum srane aishii de bai ji han yi ne Isu idoh shii lua pha yi. 27 Bran iphiingthek de ai idoh shii luagieng, ithek duchoi è giak hò-amuii è Isu shii bushun now srane cho ne shii luagieng. 28 Isu è idoh rai srane ithek shii yao, “Jerusalem pha hò-amuiithek! Nathek gu chiang è achoh chid rabo, jimagunde nawaithek shii nane nawaithek aniphiingthek shii choh bo. 29 Irek pha inai thog ruii phro branthek è yao ruii, ‘Hanyie hò-amuii è khuchunde ani oi pho ne, hanyie shii khuchunde ani agiak pho ne, chiih-è khuchunde ani niu awang pho ne khinyama khirzey ro!’ 30 Ji pha ishak shii ne branthek è phiingthek shii yao ruii phro, ‘Gu lakhung shii chiih mage bo!’ Chiih-è phiingduiithek shii de yao gu shii ‘Ug phi bo!’ 31 Hing isieng ba shii rang de hì thek rey hing goh dun pha ishak rey mage ne nyie rey phlei?” 32 Gai bran layog rek pha nyi shii de Isu rog shii ua pha noh dun. 33 Ithek Gadong rone beng pha ithua shii thog mage shii, ithek è Isu shii thiihchiih zun muii, chiih-è layog rek pha bran nyi shii de jia shii ai phazoi hà zun chiih-è jia shii ai phawik hà zun muii. 34 Isu è yao, “ithek shii khung phi bo, Aphuii, ithek nyie rekramuii pha ji ne ithek ne athieg ro.”Ithek è siok fen srane airo yung yi awaithek chung dang rai. 35 Bran thek thiichiih riu ne Jewish dumuii thek è aishii biwo rek pha ji riigramuii, “Ai è gai shii ragia rek phi; ai ne Hamangkhung-aphuii mugua pha Masi chak arone awai shii ragia rek yi bo!” 36 Siphahi jia de aishii biwo rek: ai è de wuii srane aishii thoh pha phuii wang, 37 chiih-è yao, “Nane Jewthek pha saja chak arone nawai shii de ragia rek riig bo!” 38 Ai lakhung shii hì pha miyaogam zey ne um ro: “Hì ne Jewthek pha saja ro.” 39 Thiichiih zun pha Layog rek pha bran jia de aishii biwo bajo rek ne yao: na Masi asi bey? Nawai shii de ragia rek bo chiih-è gasa shii de ragia rek mage bo. 40 Gai jia ji è aishii giung, “Nane Hamangkhung-aphuii shii arum bey? Na shii de ai mirek ji duiine mua ne bey. 41 Giisa shii mua pha ji ne rangsua chak ro, nyieliieshii giisha nyi mua sbo ichiig rek pha ji mua phro; jimagunde ai ne nyie ichag de arek.” 42 Chiih-è ai Isu shii yao, “Isu na Saja rey mage, gu shii de now bo!” 43 Isu è aishii yao, gu na shii sbang rek phro sudoh na de Hamangkhung hà gu rog shii um ruii phro. 44 44-45 Hì rek pha ishak yi snanyi è uom ishak thog dang pha hasieng asiang pha soh zab biak rey dun; chiih-è Misiahò shii rang pha yungshaig ji de nyi rang ji dun. 46 Isu goh gang è ne yao, “Aphuii wo! Gu ragung na wad shii ruii phro!” Ai ji è yao srane iy dun. 47 Arming dumuii è nyie rey pha ji jithek riig srane Hmangkhung-aphuii shii chiong srane, yao, ai ne izai bran wie chak ara ro. 48 Branthek thiihchiih shii nyie rey pha ji riig pha khrab thog mage shii jithek doh srane ithek duhug rek ne awaithek lubutho phey ne idoh hò hà dun dun. 49 Khinyama phothek è Isu shii thieg, chiih-è Galili pha hò-amuii hanyie è Isu rog shii luagieng pha ji lua dang ne, ithek de ìujia ruang shii riu ne riig ramuii. 50 Thiisa Judea pha Arimathea thawun pha bran Joseph beng pha jia um. Ai yi wie nane ilab um pha bran ro, hanyie è Hamangkhung-aphuii ro Sajathua wuii ruii pha ji khan ne rai. 51 Ai ne limiang pha de membru ro, ai ne ithek munung nane ithek blia shii de anuii phi. 52 Ai è Philath moe shii wuii srane Isu ro siu iy ji lia. 53 Chiihphado ai è siu iy ji thazam yie srane yung wie è jiang srane, sak gang è chog ne hanyie de aruii ba pha wieng jishii ruii. 54 Hì yi sugrubari inai shii ro, chiih-è Jewish Thung pha Inai yi jao sha pha rek ro. 55 Galili pha hò-amuii hanyie è Isu rog shii luagieng pha ji de wieng shii Isu ro siu iy ji khi-èrek ne ruii lei ne riig pha Joseph rog shii wuii gieng. 56 Chiihphado è ithek idoh hò hà dun srane wie no pha nane siie yie ne siu iy jishii shun phi pha saro.Jewish Thung pha Inai shii Iphey shii yao pha duiine ithek thung ne rai.

Luke 23 (BBT1E)

In Other Versions