Luke 23 (TOMA)
1 Ti pɛ ti wuzeɠeni ʋɔɔma, ti li ga Yesu Pilate ʋɔ. 2 Ti tɔɔzeini miná ga maalɔa, ti ɗa ɠɛ ma: «Gi zunui nii zogɛ, é ɗa gá-nuɓusɛiti kaka, é ɠɛ naati ti mina mului zala Sezaal ma, tɔ vɔlɔ é ɠɛ toɠa ga Kilista, masagi.» 3 Pilate gaazaɠani, é ɠɛ ma: «Ɗa ɠa è ga Zuifuiti ta-masagi?» Yesu gooɠaaʋoteni, é ɠɛ ma: «Ɗa ɓɔɠɔi è boga.» 4 Pilate ɠɛni zalaɠa ɠula ɠundiɠiiti ma, ta bɛbɛiti: «Gè la peelalazu nɔpɛ kaazu zunui nii ʋa.» 5 Kɛlɛ ti maaɓakpani, ti ɠɛ ma: «Toɠa nuɓusɛiti kalasu ga kpakagi. É zoni Galilé yooi zu, é leʋeteʋe Zudé yooi zu ná pɛ, é zeeli ʋɛ.» 6 Pilate naa mɛnigai ma, é gaazaɠagi woni, ni zunui nii ɠa ga Galilé nu. 7 Kwɛɛgai ma bɛ ga naa ɠa Elɔde ná-kuɠui zu, é Yesu leʋeni naa ma. Elɔde ɠɛni ɓalaa Zeluzalɛme naama ziɛgi zu. 8 Elɔde Yesu ɠaai ma, gola ɠoozunɛɛni, mazɔlɔɔ kaite wɔin ɠɛni ma ga é Yesu ɠa, tɔɔzei naa maawooi ʋa, é mɛnini, é ɠɛni pɔ ga é naa ná-laavɔɔ vai ta ɠɛɛzu ɠa. 9 É lɛbini Yesu ɠaazaɠasu, kɛlɛ naa la ɠɛni gooɠaaʋoteni ga woo ɠila kpalaa. 10 Zalaɠa ɠula ɠundiɠiiti ta tɔ kalamɔinti ti ɠɛni ná nɔ ga ti ɗa Yesu maalɔ ga zɛbɛi. 11 Elɔde ta ná-salaʋusuiti ti bɛlɛlalani. Ti ɲɛɛɠulaai ma su, ti seɠe ʋapagi looni kɔba, é teʋe Pilate ma. 12 Naama voloi Pilate ta Elɔde ti ɠɛni ga bɔɔlamaiti, tɛigiti ti zilini ga ɓɔɠɔ mɔungi zu. 13 Pilate zalaɠa ɠula ɠundiɠiiti gaalɛɛni ba, ta kundiɠiiti, naa ʋɛɛ nuɓusɛiti ba, 14 é ɠɛ ti ma: «Wo ʋaaʋɛ ga zunui nii pɔ̀, wo ɠɛ toɠa nuɓusɛiti kakasu. Tama gè gaazaɠaga wo ɠaazu, gè la sɔ nɔpɛ kaani naama vaiti pɛ su, niiti wo maalɔɔzu su. 15 Elɔde ɓalaa ge la sɔ kaani ba, mazɔlɔɔ é teʋegɛ gi ma ʋolu. Gaamazu, zunui nii la faa nɔpɛ kɛɛni, nii nu ɠa paa su. 16 Nà kɛɛzu, ti doɠa nɔ ga kpakɔi, naa ʋoluma gè pilɛ.» 17 [Fɛti ɠilagilagi pɛ su, kɛni é ɓena kasoɠa nu ɠila pilɛ ti ʋɛ.] 18 Kɛlɛ ti pɛ ti ɠɛni ma, ʋɔɔma: «Zunui nii ʋa, è Ɓalaɓase ʋilɛ gi ʋɛ.» 19 Zunui naa ʋilini kasoi ɠa wutugi maaʋele ma, é ʋilini taazuʋɛ, ta nu ʋaa vai. 20 Kɛlɛ tɛi wɔin ɠɛni Pilate ma ga é Yesu ʋilɛ, é ɓɔɛni ʋolu bɛbɛi ʋɔ. 21 Kɛlɛ ti ɓainni, ti ɠɛ ma: «Kpadɔ! Kpadɔ saa wului ma!» 22 Pilate ɠɛni ti ma, ná zaʋasiɛi zu: «Faa ɲɔi ɓɛgele ɠa é kɛai? Gè la sɔ nɔpɛ kaani ba, nii nu ɠa paa su. Nà ʋaazu kɛɛzu mu, ti doɠa ga kpakɔi, naa ʋoluma gè pilɛ.» 23 Kɛlɛ ti wola laaɓakpani ma ga kpee wolai, ti ɠɛ ma kɛni é ɓadɔ saa wului ma. Ti-wooi ɠɛni liizu ga ɓikpiga. 24 Pilate deveni ga nii ti suvalizu, é naa ɠɛ ti ʋɛ. 25 É naama nui ʋilɛni, nii ti maaɠaazaɠaboni, nii é ɠɛni kasoi ɠa wutu fai ta nu ʋaa vai zu. Kɛlɛ é Yesu lɔɔni ti yeezu, ti-yiimai ɠɛ la. 26 Tɛi ti ɠɛni liizu la, ti zunui ta ɠaani, é ɗa zeɠe kpalagaʋɛ, Silɛne nu ɠɛni de, daaseigi ga Simon. Ti soni, ti Yesu zaa wului la kɔma ga é ʋilɛ da naa ʋolu. 27 Nuɓusɛi ma ʋɛbɛ wolai ʋilɛni polu, ta anzanuiti, naati ti ɗa yiilaʋɛti doɠa, ti ɗa ɓɔɠɔ maawɔin ná-faa zu. 28 Yesu latini ti ma, é ɠɛ ma: «Zeluzalɛme anzanuiti, à mina wɔlɔ bɛ̀, kɛlɛ à wɔlɔ ɓɔɠɔ ʋɛ ta wo-lointi bɛ. 29 Tɔɔzei foloi tanigaa ta ʋaazu, toɠa wo ga: ‹Undaanɛ nu ɠa ga doun zɔlɔɔtala anzanuiti, ta niiti ti la ɓɔɠɔ loun zɔlɔɔni, ti la ta laani ɠɔɠɔ ma.› 30 Naama ziɛgi zu nuiti ta ɗa ɠɛ gizeiti ma: ‹À loo gi ma,› ti ɗa ɠɛ gize goiti ma: ‹À gi maalɔɔɠu!› 31 Mazɔlɔɔ ni nii ɠa ɠɛɛzu ga gulu wundui, lee ɠa é ʋaazu ɠɛɛzu ga gulu vɔɔi?» 32 Naama yeeɠɛɠalai nɔ zu, ti ɠɛni liizu ga faa ɲɔu ɠɛ nu felegɔ, ti ʋaa vai zu ʋɔɔma ta Yesuni. 33 Ti zeeliai ma, naama adɛ ná laaseigi ga «Unkala Kae», ti kpadɔni miná saa wului ma. Ti ti ɓadɔni ʋɔɔma saa wuluiti ma ta faa ɲɔu ɠɛ nu felegɔ, gilagi ɠɛni zeezazu ʋelei, zɔi ɠɛ kɔʋɛzu ʋelei. 34 Yesu ɠɛni ma: «Kɛ̀ɛ, ti zuvaayɛ, tɔɔzei nii ti kɛɛzu, ti la kwɛɛ.» Salaʋusuiti ti ná-seɠeiti gaaɠwɛɛni ʋa ga kpakutoomai. 35 Nuɓusɛi ɠɛni loni, é ɗa wɛlɛ. Kundiɠiiti mu ti ɠɛni ɲɛɛɠulasui ɠɛɛzu, ti ɗa ɠɛ ma: «É zɔiti kizoga, é ɓɔɠɔ ɠizona, ni toɠa ga Kilista, GALA ná-ziimazeɠegi!» 36 Salaʋusuiti ɓalaa ti ɠɛni ɲɛɛɠulazu su, ti maaɓuɠani ba ga ti dɔɔ ɓodai ve zea. 37 Ti ɗa ɠɛ ma: «Ni ɗa ga Zuifuiti ta-masagi, ɓɔɠɔ ɠizona!» 38 Sɛʋɛi ɠɛni ɓalaa un maazuʋɛ ga: «Nii ɠa é ga Zuifuiti ta-masagi». 39 Faa ɲɔu ɠɛ nu felegɔi niiti ti ɠɛni saa wului ma, naa ɠilagi ɠɛni poomusu, é ɗa ɠɛ ma: «Ɗa lɛi è ʋa ɠɛ ga Kilista ɓaa? Ɓɔɠɔ ɠizo dɛɛ, ɗa ɓɔɠɔgoi, è gá ɓalaa, gi ɠizo!» 40 Kɛlɛ bɔɔlai zelii loni ma, é ɠɛ ma: «È la luazu GALA ba, ɗɛi ɗa ɓalaa è niima zii ʋeelala ɠilagi zu? 41 Dɔnɔi zɔlegɛ, tɔɔzei da naa zɔlɔɔsu, nii soloogai da-ɠɛɛwotiiti ma, kɛlɛ tɔun nɔnɔi, é la faa ɲɔu nɔpɛ kɛɛni.» 42 Naa ʋoluma é ɠɛni ma: «Yesu, ɠizɛ sù, siɛgi zu è ʋaazu la ɗa-masadai zu.» 43 Yesu gooɠaaʋoteni, é ɠɛ ma: «Gè bo è ma ga gaamai, ɗa ɠɛ bà za nɔ, GALA ná-taa ʋagɔi zu.» 44 Folo gaalɔgai ma ziɛgi zu, kpidii ʋɛɛni zooi zu ná pɛ, eyɛsu lɛlɛi zaʋasiɛi ma kpɔkɔ voloi. 45 Foloi dɔɔni ma, GALA sei ʋɛlɛi wu ɠwɛpele seɠezuɠoozagi ʋalini su fele zaamazuʋɛ. 46 Yesu kpee wolai looni, é ɠɛ ma: «Ɠɛɛɠɛ, nà zɛ̀nvui ɠalivaazu è ma.» Naama wooiti boga ʋoluma, zii looni. 47 Wɔlɔme zalaʋusu ɠundiɠii fai naati kaai ma, niiti ti ɠɛɛni, é lɛbiyai veeni GALA bɛ, é ɠɛ ma: «Gaamazu, zunui nii ɠɛa ga telebo nu.» 48 Bɛbɛi niiti ti ʋaani nu ʋaazuʋɛ miná ɠaazu, ti ɠaleni ma ga gaazuɠilii, ti ɗa yiilaʋɛti doɠa. 49 Yesu ɠaazuɠwɛɛgiti pɛ, ta anzanui niiti ti ɠɛni polu, kaite é zo Galilé yooi zu, naati ti loni ɠoozama, ti ɗa naama vaiti ka, niiti ti ɠɛni ɠɛɛzu. 50 Zunu ɠila ge ɠɛni tukpɔɠaaleʋe nu wolaiti saama, daaseigi ga Zozɛfe, é ɠɛni ga nu ʋagɔ ta telebo nu, 51 ná-taazuʋɛ ɠɛni ga Zuifu laai nii daa ga Alimaté, é la ɠɛni yeezeini bɔɔlaiti ta-levei ta ma ɠɛɛwotiiti bu, é ɠɛni GALA ná-masadai maaɓɔunsu kitogi zu. 52 É liini, é Yesu ma ʋoomai maavali Pilate ma. 53 É kulani saa wului ma, é maavelevele ga geze zeɠei, é da kaba niinɛi ta zu, nii bɔai fasai ʋa, ʋɛ nu nɔpɛ ge la dɛ laani ná. 54 Dooɠo foloi ma ɠɛʋele ɓɛtɛ voloi ɠɛni de, dooɠo foloi ɠɛnina tɔɔzeizu. 55 Anzanui niiti ti yɛni Yesu ʋolu, kaite é zo Galilé yooi zu, naati ti ʋilɛni Zozɛfe ʋolu, ti kabai ʋɛtɛ, ta ʋelei Yesu ma ʋoomai laai la su. 56 Ti ɠaleni ma, ga ti tufa maku nɛɛnɛgi ta gulɔ maku nɛɛnɛgiti kpɛtɛ. Dooɠo foloi ti looɠoni, eɠɛʋelei devei bogai la.