Mark 12 (BBT1E)

1 Isu è ithek shii najang shan ne yao: Luangjia shii bran jia è angur raig hai, chiih-è raig shii shan ne muthua thua srane, angur shii chab ne chui ne ikho re pha nyahiung chog, chiih-è riigpho shii rai yi pha haliig giu jia rab phro. Chiihphado è angur raig cheipho shii phi srane hò thoh marui ne lua dun. 2 Angur khrab pha ishak thog mage shii, cheipho è awai mathang yamiing yi pha ai è awai khiao shii thoh ge phro. 3 Raig cheipho è khiao ji shii zum srane zuang mage, chiih-è nyie de aphi pha idoh thoh din ge. 4 Chiihphado shii muspho è khiao gai shii thoh ge; raig cheipho è aishii de khrug lakhung shii zuang srane biwo rek ne thoh ge. 5 Jipha muspho è dinne gai khiao thoh ge, chiih-è aishii de ua muii phro; chiih-è ithek gai shii duiine bajo awie pha rek phro, chiih-è giak shii zuang ne giak shii ne ua muii phro. 6 Idoh noi shii jia led dang bie ne thoh ge pha ji ne awai è miie pha awairo dufuii ro, ai è awai dufuii shii cheipho hà thoh ge, ai è yao, gune luthong phro ithek ne gu dufuii shii ne lab phi phro. 7 Jishii cheipho è awaithek chung yao rai, hì ne muspho ro dufuii ro. Thawuii ne ua rai haro, chiih-è ai ro nuruii thek ne gethek ro re phro! 8 Ji-è, ithek ne dufuii shii zum srane ua ne chiih-è cheipho è ai siu shii angur raig è fuang fen muii phro. 9 Isu è sai, “Chiihphado shii, muspho è cheipho shii nyie rek phlei?” Ai ne wuii ne ua srane raig gai cheipho shii phi muii phro. 10 Nathek de hì pha jigigam atham bey?Rungpho è lubao awie rone snai muii pha ji shii nezab è de mugak re dun phro. 11 Jine Ithong mirek ro,jine bajo wie pha mieg shii ro. 12 Jewish dumuiithek ne Isu shii zum pha bidiang phro, nyieliieshii ithek ne thieg ai miyao najang shan ne ithek gidieg shii yao phro ne thieg, jishii ithek ne ibrogthek rum, ji-è ithek aishii thoh marui ne rek dun. 13 Pharisithek chiih-è Herod pha branthek yi Isu hà thoh ge srane musai rog shii chua phro. 14 Ithek aishii wuii srane sai, “Masdo, gathek ne thieg nane izai yao phro, nane branthek è nyie now na de sam-adiig pha yao phro, branthek ro ilab shii de nyie ilab aphi pha rek ro. Jishii branthek shii Hamangkhung-aphuii muyang pha chiang shii nane izai yao phro, Gathek shii yua riig bo Romanthek saja dumuii shii mijin phi pha ji ne gethek Iphey shii buii bey? Gathek ne ithek shii nyaphi ne ba asi aphi chiid haba?” 15 Jishii Isu è ithek ro khua ji è riig srane chang, “Nathek nyie rek ne gu shii chua pha bidiang phlei? Bang shikhi jia yi mage bo, chiih-è gu riig-riig haro.” 16 Ithek è aishii jia yi ne phi, chiih-è ai è sai, “Hanyie mizia chiih-è hanyie ibeng lei.” Ithek è chang, “Hì ne Roman thek saja dumuii ro ro.” 17 Isu è ithek shii yao, “Chiihphado, hì ne wie ro, nyie yi saja dumuii è re pha ji ne saja dumuii shii phi muii bo, chiih-è nyie yi Hamangkhung-aphuii è re pha ji ne Hamangkhung-aphuii shii phi muii bo.”Chiih-è ithek ne Isu shii wiengphleg dun ro. 18 Chiihphado shii Sadusithek hanyie è iy pha ji è ahòi phro ne yao phothek ne Isu moe shii wuii srane yao, 19 Masdo, Moses è hì pha Iphey ne gathek shii zey phi phro: Bran jia è yiy yi ne, ani agiak pha iy dun, ai ikhuii è ji pha misiung shii yiy ne ani giak arone, ji pha ani ne iy dun pha ro nyare yi bo. 20 Luangjia shii khuiino miley um; zab è khoh ji è yiy yi srane ani agiak pha iy dun. 21 Chiihphado shii din pha ikhuii ji è de ji pha hò-amuii shii yiy, chiih-è ai de ani agiak pha iy dun. Uomchiieng pha khuii shii de ithek shii nyie re pha ji duiine re phro, 22 chiih-è chiihphado shii gai thek, zab khuiino miley è ji pha hò-amuii shii yiy srane ani agiak pha iy dun. Zab pha idoh shii ji pha hò-amuii de iy dun. 23 Chiihphado shii, iy pho yi zab hòi pha Inai sieng mage shii, ithek miley è yiy pha hò-amuii ji ne, hanyie ro yiy re phlei? 24 Isu è ithek shii chang, “Nathek ne asi pha branthek ara! Nyieliieshii nathek ne hì pha Hamangkhung-aphuii ro jigigam chiih-è ai riichai shii athieg mua phro. 25 Iy pho thek hòi din mage shii, ithek ne, hamangkhliie duiine re ne hamangkhung hà ne yiy ayiy phro. 26 Iy pho ne hòi ruii phro, ithek ne jabiing hòi pha Moses ro Jigigam ji shii atham bey? Thiichiih shii zey phro Hamangkhung-aphuii è Moses shii yao, ‘Gune Abraham ro Hamangkhung-aphuii ro, Isakh ro Hamangkhung-aphuii ro, chiih-è Jakhob ro Hamangkhung-aphuii ro’ Ai è ji yao shii ne bajo idam ibi hà ithek ne iy jong ro. 27 Hamangkhung-aphuii ne branthek ro Hamangkhung-aphuii ro, ji-è hanyie iy dun magunde thuh de isieng ba ro, jishii iy pho ro asi ro. Nathek ne zab adunmey pha now ro!” 28 Thiichiih shii um pha Iphey yua pha masdo jia è ithek mulo ramuii pha yoi. Ai è Isu yi Sadusithek shii ne wie è chang pha doh, ji-è ai ne Isu shii musai sai: “Nyie muyung ne zab è de mugak ba lei?” 29 Isu è aishii chang, “Zab è mugak muyung ne hì ro, ‘Israel pho! yoi mage bo, gethek ro Ithong Hamangkhung-aphuii ne jia bie ro. 30 Nawai Hamangkhung-aphuii shii nawai lubu è, nawaithek ragung è, nawaithek khani è, nawaithek chua rog shii è miie mage bo.’ 31 Chiih-è nyichiieng pha mugak muyung ne hì ro: ‘Nawaithek ro hadung-haluii pho shii de nawaithek chung miie rai pha duiine miie bo.’ Thiichiih è ne nyi ji è boh gai mugak muyung oi sha ro.” 32 Iphey yua pha masdo ji è Isu shii yao, masdo! “Wie ro, hì ne izai chak ro, na è yao pha ji ne, Ithong ne Hamangkhung-aphuii bie ro, chiih-è, gai Hamangkhung-aphuii ne oi ro, jishii ai jia bie ro” 33 Chiih-è branthek ne Hamangkhung-aphuii shii awaithek lubu è awaithek khani è awaithek chua è miie chiid phro, chiih-è awaithek shii miie pha duiine hadung-haluii pho shii de miie chiid phro. Hì pha muyung nyi nuii ne rek pha ne muram ua ne Hamangkhung-aphuii shii khlem ne zid phi pha ji è de bajo boh muyung ba ro. 34 Isu è nuii shii ji pha bran miyao ne wie ro, “Nane Hamangkhung-aphuii ro Sajathua è muna ruang asi sha phro.”Ji è yao ched mage ne zab ne rum ne Isu shii musai asai mua. 35 Isu ne Hamangkhung-aphuii ro Misiahò shii miyao yua ne rai srane branthek shii musai jia sai ruii, nyie khi-èrek ne Iphey yua pha masdothek ne Masi ne Dawid Saja pha riing rone yao mua phlei? 36 Dawid shii Hamangkhung-aphuii ro Ragung è yao yi phro:Ithong è gu Ithong shii yao;Gu è na suangthek shii gu lai luii aruii sapho neNa ne guro phazoi pha riichai ithua shii dug bo. 37 Dawid awai de aishii ne Ithong rone ho, ji-è nyie khi-èrek ne Masi ne Dawid ro riing re mage phlei?Bran ibrogthek ne Isu miyao ji sang ne nuiiramuii ro. 38 Isu è ithek shii yua, ai è yao, “Iphey yua pha masdothek è ragia rek ne rai bo, ithek ne yung phiang rog shii lua ne branthek shii riig yi pha bajarai ithua hà lab phi yi pha rek phro. 39 Misiahò hà wuii ne de ithek ne mugak biang shii ong ne chiih-è michie-chie pha ithua shii biang wie shii ong ne dug phro. 40 Ithek ne misiung thek phua yi srane chiih-è ithek hò de rio maphi, chiih-è ithek ne branthek wie rone riig yi pha misia de phiang sia phro. Ithek zab shii ne bajo awie pha re ruii phro!” 41 Isu yi Hamangkhung-aphuii ro Misiahò pha mizid gam moe shii dug ne rai ramuii shii, ai è bukho branthek ne bajo bang zid pha doh ruii; 42 chiihphado shii dusho misiungmuii jia wuii ne bang ìujia chab phro. 43 Ji è doh mage ne Isu è awai samoythek shii awai moe shii ho srane yao, “Gune nathek shii izai yao dang phro, hì pha dusho misiung ne mizid pha gam ne bran shii gai re-è ne zab è de bajo muna zid phro. 44 Gai thek ne awaithek shii nyie um pha ji è ìujia yi srane zid bie phro, jishii ai ne dusho magunde awaishii nyie um thith pha ji yi srane zab zid muii phro.”

Mark 12 (BBT1E)

In Other Versions