Isaiah 3 (TOMA)

1 Wɛlɛ, Ɠɔoɠɔ GALAGI, Fai-Pɛ-Maliɠii ɠa ʋaazuZeluzalɛme ta Zuda masadai ʋalasu poluzeizuʋɛti kpein ma,daamiani sɔlɔɔsuʋɛ pɛ, ta ziɛ zɔlɔɔsuʋɛ pɛ, 2 kɔɔɠɔ nu ɠɛzɛiti ta salaʋusuiti,tukpɔɠaaleʋe nuiti ta GALA goo wo nuiti,ungaiziɛ nuiti ta kɛwolaiti, 3 nu ʋuulɔɔlugɔ (50) ɠundiɠiiti ta seizumaanɛgiti,nu lɛnɛ nuiti ta molikulagiti,ta niiti ti zoogai zoɠo fai la gola. 4 «Nà buzeɠe niinɛgiti sei ti unda ga kundiɠiiti,ti masadai ɠɛ ti unda ʋelei nɛai la ti ʋɛ. 5 Ta ɓɔɠɔ zopele ɲɔu ti ɠilagilagi,siɛpolui ɠɛ siɛpolui laalɔɠɔma,seiɲɔɠɔi ɠɛ seiɲɔɠɔi laalɔɠɔma,buzeɠe niinɛgiti ta wuzeɠe kpakologiti daalɔɠɔma,nu ɲakaiti ti wuzeɠe seizumaanɛgiti daalɔɠɔma.» 6 Zunui ta ɠa ɗa yeeʋili kɛɛɠɛloin zu, ná-bolodamai ta, é ɠɛ ma:«Ɗobo gila ka è ʋɛ, ɠɛ ga ada-ɠundiɠii.Devei wo ada ɠoloɠologai tɛi unda!» 7 Naama volo ná, zɔi ɠa gooɠaaʋote ga woo wola, é ɠɛ ma:«Gè la ga ɗɔɠɔtɔlɔ,ani nɔpɛ ge la nà-pɛlɛwuʋɛ ga daamiani ɓaa seɠe.À mina kɛ̀ ga nuɓusɛiti ta-ɠundiɠii!» 8 Zeluzalɛme ɓunɛni,Zuda ɠa laani zooi ma,kpɔɛzuɠulaiti ta kɛɛwotiiti su,ta Ɠɔoɠɔ GALAGI laalɔɠɔma,ta losu daawu. 9 Ti ɠaazulo pelei zeele wooi woni ti laalɔɠɔma.Ta ta-ɠotoi lɛɛzu eɠɛ Sɔdɔme,ti la dɔɔɠuzu.Ti maa ɠa nɔɠɔ!Mazɔlɔɔ ta maanɔɠɔi ɓɛtɛzu ɓɔɠɔ ʋɛ. 10 Wa zoo wo bo telebo nui maga toɠa undaanɛɛi zɔlɔɔ,mazɔlɔɔ toɠa ná-kɛɛwotiiti ma ɠulanumai zɔlɔɔ. 11 Maanɔɠɔ ɠa faa ɲɔu ɠɛ nuiti bɛ!Pele ɲɔi ɠa ti ma,ta ti zo, eɠɛʋelei ti kɛɛni la. 12 Nà-nuɓusɛiti ta kpɔlɔi zu buzeɠe niinɛgiti zea,anzanuiti ta zeini ti unda.Nà-nuɓusɛiti, niiti kpein ti losu wo luɠɔ, ta wo ɠakasu.Pelei wa ziɛ su, ta supuzu wo ya. 13 Ɠɔoɠɔ GALAGI wuzeɠea tukpɔlo fai ma,é wuzeɠea, é ʋa nuɓusɛiti tukpɔɠaaleʋe. 14 É lia ga ná-nuɓusɛiti ta-ɠundiɠiiti ta totuɠɔiti tukpɔɠaaleʋezuʋɛ, é ɠɛ ma:«Wo leezɛn ɓelei ɠoloɠoloni.Nii wo kulani bala beaiti zea,wo naati gaalɛa ba wa-ʋɛlɛiti bu. 15 Leeni ɠa losu ma mu, wo nà-nuɓusɛiti fɔkisu,wo ɗa bala nuiti gaaʋolo ɠɔɠɔi wu?»Ɠɔoɠɔ GALAGI, Fai-Pɛ-Maliɠii wooi ɠana. 16 Ɠɔoɠɔ GALAGI ɠɛni ma:«Tɔɔzei Siyɔn anzanuiti ti ɓɔɠɔ wasoni,ta ɠɛna ziaa, ti ɠɔgi lo ga,ti ɠaazu geezu,ti ɗa li vaavaa,ti ɗa talagi ɓɔɛ, é ti-ɠɔɠɔ ʋa, 17 Ɠɔoɠɔ GALAGI ɠa kpaanagi ɠɛɛzu Siyɔn anzanuiti unmaʋɛ,é ti unma ɲakai ʋilɛ.» 18 Naama volo ná, Maliɠii ɠa ta-maaɠili zɔɔlaiti kula ti ma, niiti ti ga: balaɠaegiti ti ti-ɠɔɠɔiti ba, timɔ wɔɔlɔgiti, ta balai kulaai ga alu toga niinɛi, 19 goizu anigiti, ta balaiti, ta bɔɔlɔgiti, 20 masa bɔɔlɔgiti, kɔɠɔ ʋa yɔlɔɠɔiti, saamaɠili fɛlɛaiti, gulɔ maku nɛɛnɛ puu aniiti, undaanɛ zɔlɔɔ ganii, 21 balaɠaegiti, ta sokpazu ʋalaɠaegiti, 22 seɠe ʋapa golaiti, ta seɠewuzeɠe wolaiti, ta seɠeungiti, ta ɓɔlɔiti, 23 pɛtɛgiti, ta geze zeɠei, ta seɠe zakpai tɔungi ma, ta nii ti kpesasu ɠakai wu. 24 Ani luulai makugi ɠa a ɠɛ ʋɛ ta-wulɔ maku nɛɛnɛgi ná,galu ɠilagi nɔ ɠa a ɠɛ ga saamaɠiligi.Tɔun fɛlɛa ʋagɔi ɠa ɠɛ ga kpaanagi.Saa wɔlɔ wo seɠei ɠa ɠɛ ti ɠɔba, seɠe wola ʋagɔi ʋotogi zu.Ti-ɠɔlɔ pagɔi ɠa ɠula ti ma, é valibo ga nii ɠaazu ʋagɔ nɔpɛ ge la ba. 25 Ɗa-zalaʋusuiti ta loo bu ga boɠa zɔkpɔi,ɗa-ɠɔɔɠuluɓaiti ta za kɔɔmaʋɛ. 26 Naama volo ná, Siyɔn ná-pɛlɛla ɓogiti pɛ ta kpalagi wo, ti ɠaalɛi.Taai koloɠologai, toɠa ɠɛ zeini zooi ma.

Isaiah 3 (TOMA)

In Other Versions