Job 15 (TOMA)

1 Teman nui Elifaze kpɔɛi zeɠeni, é ɠɛ ma: 2 «Ɠima nui ɠa zoo nɛi é ɓɔɛ eɠɛ nɔ fiilɛi?É ɠoozuʋɛ laave ga folo ɠulazu ʋele viilɛi? 3 Kpɔɛ wafuungiti ka a ɓɔɠɔ maalobo da,ta kpɔɛ mɔinmɔingi nii é la faa ʋaa? 4 Ɗa GALA bɔɔlɔ vai ɠaaʋalasu ba,è kisiɛ ʋagɔi kpein gaaʋala ba GALA gaazu. 5 Mazɔlɔɔ ɗa-vaaɠaazagi ɠa é losu è-laaʋɛ luɠɔ,è yiimazeɠe ga keleɠele ɲɔu nuiti kpɔɛ ʋelei. 6 Nɔ̀un nà laade, kɛlɛ è-laaʋɛ ɓɔɠɔi ɠa é è ʋeelalazu.È-lakɔlɔgiti ka ti zeele wooi veezu è laalɔɠɔma. 7 Ɗa ɠa è ga nu mɔungi sɔlɔɔgai eteai zu ɓaa?È folo ɠaaʋɛ gizeiti tuɠɔ? 8 È naa mɛnini, nii é woni GALA ná-maaɓɔgi zu?È ɠimalai latini, è kɛ ga ɗa ɠila ɗɔnɔ? 9 Leeni ɠa è kwɛɛ, nii gi la kwɛɛ?Faaɠaaɠai ɓɛgele ɠa é è ya, nii é la gi ya? 10 Undeɠa ɠolegiti ta gi zaama, kɛwola wɔlɔiti,ta-voloi mɔinɗai é leʋe è-ɠɛɛ nɔnɔi ʋa! 11 GALA ná-gaanɛɛnɛ wooiti ta è ɠaazu ga faa go ɓaa,ta sɛsɛbo kpɔɛiti ti wosu è ma? 12 Miná ɠa è-yii liizu ga ɗe ná?Gaazuziɛsui è kɛɛzu, naa ɠa leeni lɛɛzu? 13 Ɗa zoosu è yiiɠaawana GALA ma,è-laaʋɛ ɗa naa ɠɛɠala vaiti bo! 14 Nu vului ɠa zoo ɠale é ɲade?Nii sɔlɔɔgai anzanui ʋa, naa ɠa zoo ɠale é zɔle? 15 Anɛɛ geezuɠeela ɲadegaiti, GALA ge la laani ti la,geeɠɔlɔgi la ɲadeni gaazu. 16 Nuɓusɛi nɔnɔi ɠa ga lee, nii ɲɔuɗai, é ɠɔzɔ,nui nii é faa ɲɔi ɓɔlezu eɠɛ ziɛi! 17 Nà è ɠalasu, woilo gòoi ma.Nii gè kaa, naa ɠa gè ʋaazu bosu è ma, 18 nii ɠima nuiti ti daazeelini,nii ti la ɠɛni dɔɔɠuni, ti sɔlɔɔni ti-ɠɛɛni zea. 19 Tiya ɠila nɔ ɠa zooi veeni ti ya,Wɛɛn la ɠɛni dɛ leʋeni ti zaama. 20 «Faa ɲɔu ɠɛ nui ɠa ɗa lɔ kpɔlɔi nɔ zu sii ma voloiti pɛ su.Konagiti ti makɛgai sili masagi ʋɛ, ti ɠaalugɛ. 21 Zɔngɔ wooi é nu maaluazu, naa ɠa wosu goizu.Ziilɛigi ma ziɛgi zu ɠa faa zuɠoloɠolo nui lɔɔzu la unga. 22 É la laani da ga kuai ɠa ɓudɛzu maazu,ki ka ba ga kulafiliba zaai ɠa gaiziɛzu. 23 Toɠa leʋeteʋesu, mini ɠa a daamianigi ɠa ná?É kwɛɛ é ɠɛ folo ɲɔiti ta ɠɛʋele ɓɛtɛzu bɛ. 24 Ʋoluɠulai ta ziiɓɔlɔi ta maaluazu,ti zeeli ma eɠɛ masagi nii kɛʋele ɓɛtɛai ga é li kɔɔmaʋɛ. 25 Mazɔlɔɔ é yeeɓuunni GALA daalɔɠɔma,é wuzeɠeni Zɛbɛi-Pɛ-Maliɠii laalɔɠɔma. 26 É ɠɔgi loga, é ɗa li laalɛɛzu GALA bu,é ɓɔɠɔ makɛgai ga ná-kɔɔɠɔ zɛpɛgi. 27 Ma wulɔi gaazuʋɛ maalɔɔɠuai,saamaʋɛti buiɗɛi ma ga ma wulɔiti. 28 Taai niiti ti woloai, miná ɠa é liini, é zei ná,é lɛ pɛlɛiti bu, niiti nu la ti wu,niiti ti ʋaazu wolozu niina. 29 É la mɔ zooga é ʋa ɠɛ ga naavolo nu, ná-sɔlɔɔgi la mɔ wuzeɠea,zeaɠɔligi ɠaa la mɔ wɔɔlɔa eteai zu. 30 É la zooga ʋelazu kpidii ʋa.Abuzogi ɠa ma ʋɔnɔbaiti fɔ.Toɠa ɓɛ ga GALA daa viilɛi. 31 Wafuun fai ɠa é ɠitogai ba. Kɛlɛ toɠa ɓɔɠɔ yaavazu,mazɔlɔɔ nii a teʋe, naa ɠa ɠɛɛzu ga wafuun fai. 32 Naa laa ɠa zeeli aisa sii ma voloiti ti ʋa ɓe,ma ʋɔnɔbai la mɔ lɛnuga ʋolu. 33 Toɠa ɓɔɠɔ maaɓezeɠele eɠɛ leezɛn ansaɠɔgi ma waa ɓiini,eɠɛ wolive wului, toɠa ma ʋuaiti pu ya. 34 Mazɔlɔɔ faa ɲɔu ɠɛ nui ná-pɛlɛyeɠei la ɓuɠua,lobɛani zo nui ná-pɛlɛi ɠa ɠɛ ga abuzogi laamianigi. 35 Nii é ɠisiɛzu faa ɲɔi zu, toɠa sɔlɔɔ ga maanɔɠɔi.Nii é ɠisiɛzu su ziimaʋɛ, naa ɠa é tɔ ɓɔɠɔi ɠakasu.»

Job 15 (TOMA)

In Other Versions