Nahum 3 (TOMA)

1 Maanɔɠɔ ɠa ɲama ʋuu laai ʋɛ,nii é masadai ɠɛɛzu yaavai maazu,é ná-kpɛtɛi wosu ga toomai,yeenɔpɛ toɠa toomai ɠɛɛzu! 2 Kpakɔi lugi ɠa é mɛnisu ná,wotoloiti kɔɠɔ lugi ta sooiti tugi,kɔɔɠɔ wotoloiti tugi ná. 3 Soo ɓizɛ nuiti ti ɗa kɔɔi loo,boɠa zɔkpɔiti ti ɗa ɲiikpi,mɛɛinti ti ɗa mainmain zaɠa.Nu maawanai laawɔɔlɔa,nu ʋoomai ɠɛ adaʋɛ pɛ nɔ,nu la zooga gaalusu,nu ɗa ziɛ poomaiti ma nɔ ɠɔ! 4 Naa pɛ ge ɠɛɛni tɔɔzei koloɠolo anzanui ná-koloɠologi ʋa,ná-pagi lɔɠɔɠulaai, gola zoogai sale vai la.É ɠɛni nuɓusɛiti ta zii ɠiligiti maamiizu,ga ná-koloɠologiti ta ná-sale vaiti maaʋele. 5 «Wɛlɛ, nà ɠa gè è laalɔɠɔma,nà ɗa-lookɔbai ɠulazu è ɠɔba, gè pɛɛ è ɠaazu,gè è maaɲakai lɛ ga zii ɠiligiti,zɔɔma masa zooiti ti ɓaaɠula è ma,»Ɠɔoɠɔ GALAGI, Fai-Pɛ-Maliɠii wooi ɠana. 6 «Nà kaʋa luulai ʋilisu è ma,gè unfegi yei ga ɗe,gè è ɠɛ ga pɛtɛ ganii. 7 Nu nɔpɛ a è ɠaana, toɠa ʋela è ʋa,é ɠɛ ma: ‹Ninive ɠoloɠologa.Ɓɛ ɠa a maawɔinɠa?›Mini ɠa nà gaanɛɛnɛ nua zɔlɔɔ ná è ʋɛ?» 8 È vizɔ ka bogai Tɛɓe ʋa ɓaa,taa wolai é ɠɛni ʋuuni ziɛ wolai Nile ma ɓekegiti zɔɠɔzuʋɛ,ziɛi ɠakuni ma, ziɛ wolai ɗa makɛ,naa ɠɛ ma ga siɠigi? 9 Etiyopi ta Ezipete, naati ka zeelaani ti ma,ta-zobogi ʋolu la ɠɛni ɠulaa.Pute nuiti ta Liɓi nuiti, ta naati ka ti yeezoni. 10 Anɛɛ naa ʋe, tɔ ɓalaagi liini duɔlai zu,ungo, ti soni ga duɔi, ti lii la,ná-doungoiti ɓalaa, ti ti ʋaani taazuʋɛ ná pɛ.Nuiti ti zeizumaanɛni, ti naati seɠeni ga kpakutoomai,ná-kundiɠi wolaiti kpein, ti yɔlɔɠɔi loni ti ʋa. 11 Ɗa ɓalaagi, ɗa-laɓai ɠa è zo eɠɛ dɔɔi, ɗa lɔɔɠu.Ɗa ɓalaagi, ɗa lɔɔɠuzu ɠaiziɛ,è ʋa ɠula è zili nuiti zea. 12 È-ʋoluzeizuʋɛti pɛ ti ɠɛa ga kooleɠoole gului, nii ma waai ga yɔɠɔyɔɠɔ.Nu a ma wului ɲiikpina nɔ feya,ti ʋu ya naama nui laaʋɛ, zɔi é wɔinni é mi. 13 Ɗa-zalaʋusuiti pɛtɛ,anzanuiti nɔ ɠana ti è ya,ɗa-yooi laaʋɛti daalaoga gola è zili nuiti tuɠɔ,abui ta-zɔɠɔgiti gala. 14 Ziɛi zaɠa ɓɔɠɔ ʋɛ, tɔɔzei ɗa ga ʋa zeizu kɛlɛ su,ta ɓɔ è maalobo fai ʋa.Penɛ ʋɔlɔiti kpɛtɛ, è ɓiliki loɠazuʋɛti to! 15 Kɛlɛ ɗa zaazu, è ɠala abui zu,ɓaa è za kɔɔi zu.Ɗa ɠoloɠolo eɠɛ daaiti, niiti koto ziʋoiti ti ti miai.Ɗa-nuɓusɛiti ti ɓuunni ʋa eɠɛ koto ziʋoiti,ti ɓuunni ʋa eɠɛ koto kpulugiti. 16 Ɗa-yaaɠoiti ti mɔinni, ti leʋe geezuʋɛ zomideɠaiti ba.Eɠɛ koto ziʋoiti ti anii pɛ miizu, ti ɠoʋe. 17 È maazuʋɛtɛ nuiti ta ɠɛ eɠɛ kotogiti,ɗa-wotiɠɛ nuiti ti ɠɛ eɠɛ koto kpulugiti,ti ʋuuzu gulu ʋɛlɛʋɛlɛ koiti ga, kɔɔlɛ ziɛgi zu.Foloi a ɠulana, ti zeɠe ná, nu la mɔ ti ɠaa.Nu la mɔ kwɛɛ, ʋɛ ti liai ná. 18 Asiili masagi, ɗa-ɠundiɠiiti ti ɲia,ti la wuunga eyɛsu ɠɔ.Ɗa-ɠɔɔɠuluɓaiti ti la mɔ ɲiikpisu ɲɛgɛlɛin!Ɗa-nuɓusɛiti ti vazaga gizeiti ma,nu nɔpɛ ge la ti ɠaalɛɛzu ba. 19 Ɗa-nimizai zo keleɠele kili ge la ná!Palai loa è ʋa, nii é la ʋaloa pɛ!Fai nii seiɗai è ma, zɔiti pɛ ti mɛnisu,ta yealoɠazu nɔ è ma.Ɓɛ ɠa è-zɔ ɲɔi ta la zeelini ma, è ɠɛni kɛɛzu yeenɔpɛ?

Nahum 3 (TOMA)

In Other Versions