Proverbs 14 (TOMA)

1 Ɠima anzanui ná-pɛlɛyeɠei loni,kɛlɛ ɠimalala gelei nɔnɔi woloni tɔ ɓɔɠɔi. 2 Zɔi é ziɛzu telebodai zu, naa ɠa ɗa ziɛ Ɠɔoɠɔ GALAGI ɠaazuluabai zu,kɛlɛ zɔi é ziɛzu ga yaava ʋeleiti, naa ɠa ɗa pɛlɛʋɛlɛ. 3 Ɠimalala nui ɠa ɗa maaɠoloi zɔlɔɔ ga daawooiti maaʋele,ɠima nuiti ti-lakɔlɔgiti ta ɗa ti makɛ. 4 Ʋɛ wozawoli nikɛ la ná, daamianigi ɠa daamii ɲakai zu,kɛlɛ nikɛ zinɛi zuvikɛi ɠa a ɗa tɔnɔ golai ve. 5 Zeelei sɔlegai, é la zɛɛ woga pɛ,kɛlɛ zɛɛ zeelei ɠa ɗa zɛɛ ɓɔɛiti bo. 6 Anɛɛ ni ɲɛɛɠulasu nui ɠa ɠimalai ɠaiziɛ, é la sɔlɔɔga,kɛlɛ kidafaawu nui ɠa ɗa faaɠwɛgi zɔlɔɔ yɔɔɠɛ nɔ. 7 Maaɠooza faaɠaaɠalala nui ʋa,mazɔlɔɔ é la ɠi gila kpalaa fea è ʋɛ. 8 Kidafaawu nui ɠa ɗa siɛ ʋelei ʋɛtɛ, tɔɔzei toɠa ga ɠima nui,faaɠaaɠalala nuiti ta ɗa loo ya ta-ɠimalalai ʋɔ. 9 Ɠimalala nuiti ta ɗa ɲɛɛɠula zɔɠɔzuɓɛtɛ vai zu,kɛlɛ undaanɛɛi ɠa ɗa ɠɛ sɔle nuiti saama. 10 Ɛsɛ nɔ ɠa é ná-ziizoolɛi ɠwɛɛ, ta ná-koozunɛɛi,nu ɠili ge la zooga é ʋa nɔnɔ zɔlɔɔ naa zu. 11 Faa ɲɔu ɠɛ nuiti ta-ʋɛlɛi ɠa wolo,kɛlɛ sɔle nuiti ta-zeɠe ɠotai ɠaa ɠa wɔɔlɔ. 12 Ta ɠa ná, siɛ ʋelei zɔlegai gaazu,kɛlɛ gaaɓelazuʋɛ ɠa ga saa ʋelei. 13 Ɲɛɛi ɠa zoo é ziizoolɛi ɠaazumaalɔɔɠu,koozunɛɛi ɠa zoo é ɠaaɓela ga ziizoolɛi. 14 Kɔzɔba nui ɠa ɗa ná-kɛɛwotiiti ma ɠulanumai zɔlɔɔ,kɛlɛ nu ʋagɔi ɠa ɠoozunɛ nɔnɔ ma ziɛ ʋeleiti ma ɠulanumai zu. 15 Nui nii é la dɛ faa mɔinmɔin kwɛɛ, toɠa ɗa la naati kpein da, niiti ti wosu ma,kɛlɛ kidafaawu nui ɠa ɗa ziɛ ga keleɠele. 16 Ɠima nui ɠa ɗa lua faa ɲɔi ʋa, é ʋoluave,kɛlɛ ɠimalala nui ɠa ɗa yiiɠaawana, é kɛ, tɔɔzei daave ɓɔɠɔ la. 17 Ziiɠula nui ɠa ɗa ɠimalala vaiti kɛ,nui kigaiziɛ ɲɔi ziimaʋɛ, toɠa ɗa wɔinzeɠemai maaloli ɓɔɠɔ ma. 18 Nuiti ti la dɛ faa mɔinmɔin kwɛɛ, naati ta-ʋoganii ɠa é ga ɠimalalai,kɛlɛ kidafaawu nuiti ta-masa bɔɔlɔgi ɠa é ga faaɠwɛgi. 19 Nu ɲɔiti ta ɗa unmaayei nu ʋagɔiti bɛ,faa ɲɔu ɠɛ nuiti ɓalaa ta ɗa kɛ ɠana nɔ telebo nuiti ta-ʋɛlɛlaʋɛ. 20 Bala nui la nɛɛni nu nɔpɛ bɛ, anɛɛ seiɲɔɠɔiti,kɛlɛ kpɛtɛ nui wɔɔlaiti mɔinʋɛ gola. 21 Zɔi é seiɲɔɠɔi wɔinzeɠezu, naa ɠa koto ɠɛɛzu,kɛlɛ undaanɛ nu ɠa ga naa, nii é maanɔɠɔ nuiti maawɔinɠaazu. 22 Niiti ti ɠisiɛzu faa ɲɔi zu, naati ta kaka pelei ma,kɛlɛ niiti ti ɠisiɛzu faa ʋagɔi zu, naati ta kɛɛzu nuɓɔɠɔlai ta gaamai zu. 23 Botii kpein ka kulanumai ba,kɛlɛ pului ɠa kpɔɛzuɠula wafuungi ʋolu. 24 Ɠima nuiti ta-masa bɔɔlɔgi ɠa é ga ta-naavoloi,ɠimalala nuiti ta-vaaɠaaɠalalai ɠa é ga ta-litigi. 25 Gaama wo zeelei ɠa ɗa zɛnvuiti kizo,kɛlɛ zɛɛ wo zeelei ɠa ga yaava nu. 26 Zɔi é luazu Ɠɔoɠɔ GALAGI ʋa, naa ɠa kito gola zɔlɔɔ,ná-doun zunuiti ti dɔɔɠuzu zɔlɔɔ pɔ bɛ. 27 Ɠɔoɠɔ GALAGI ɠaazuluabai ɠa é ga zɛnvu ɗɛungi,toɠa ɗa kaka faiti kpudɛ nu maazu, niiti ta ɠɛ ga nu zaa vaa. 28 Nuɓusɛi ná-mɔin ɠa é ga masagi ná-lɛbiyai,kɛlɛ nuɓusɛiti maaʋɛlɛ vai ɠa ɗa kundiɠii ɠoloɠolo. 29 Zɔi zii la ɠula fala, naa ɠa ná-ɠimala wolai lɛɛzu,kɛlɛ ziiɠula nui ɠa ɗa ná-ɠimalalai zulɛ. 30 Ziilɛigi ɠa é ga kpusɛi ná-sii zuɠoozagi,kɛlɛ toloi ɠa é ga seeɓɛi ma ɠaeiti su. 31 Nu a bala nui maanɔɠɔna, é Kpɛtɛ Nui ʋɛlɛʋɛlɛga,kɛlɛ nu a maanɔɠɔ nuiti maawɔinɠaana, é ti Ɓɛtɛ nui lɛbia. 32 Faa ɲɔu ɠɛ nui ná-yaavai ɠa ɗa toka,kɛlɛ kitogi ɠa ɗa ɠɛ telebo nui ya, eyɛsu saai. 33 Ɠimalai ɠa ɗa zei keleɠele nui yiimaʋɛ,naa ɠwɛɛgɛ ɓalaa ɠimalala nuiti saama. 34 Telebodai ɠɛɛ vai ɠa ɗa zooi wɔɔlɔ,kɛlɛ kotoi ɠa ga nuɓusɛiti kpein unfe faa. 35 Masagi ná-unfemai ɠa ɗa ɠɛ botiɠɛ nui naati bɛ, niiti ti botii ɠɛɛzu bɛ ga ɠimalai,kɛlɛ zɔi é unfe fai ɠɛɛzu, ná-ziiɠaawanai ɠa ɗa zeeli naa ma.

Proverbs 14 (TOMA)

In Other Versions