John 11 (BBT1E)

1 Lazaras beng pha bran jia Bethany hà rai muii pha ji yi rad. Ji pha thawun Bethany ne Mery nane ai khuii Martha rai muii pha ji ro. 2 (Ji pha Mery beng pha ji ne rem no pha ji è Ithong lai shii shun srane khajiang rek ne sad phi pha ji ro; chiih-è rad pha ji ne ai buphuii Lazaras ji ro.) 3 Lazaras ro amuii è Isu shii mua thoh ge, “Ithong, naro bushun ijak ne rad muii ro.” 4 Isu è ji yoi mage shii, ai è yao, “Lazaras murad jine iy sapho asi ro; hì rey pha ji ne Hamangkhung-aphuii shii biisiie doh yi pha ji rey ro. Hì pha blia è Hamangkhung-aphuii pha Dufuii shii bo biisiie mua ruii phro.” 5 Isu è Martha nane ikhuii chiih-è Lazaras shii miie rek. 6 Ai ne Lazaras rad pha mua ji yoi magungde ai ne thiisa hà danyi rai din marui. 7 Chiihphado è ai è awai samoy shii yao, “Cho gethek ne Judea hà idoh dun sha rai haro.” 8 Chiihphado shii samoy è yao, “Masdo,” “Ìujia inai pha ibi shii ai è nathek shii lubao rek ne chao pha rek; jimagunde diisa hà dun din pha phak ne bey?” 9 Isu è chang, “Nathek jia shii ishak snanyi oi chak bey? Ji-è hanyie magunde hanai bo hà lua arone khuchung de akham phro, chiih-è ai ne sohjambling pha muchuang ji doh ruii phro. 10 Jishii ai ne habiu hà lua arone kham dun phro, nyieliieshii aishii ne muchuang oi ro.” 11 Isu è ji è yao srane dinne yao, “Ga ijak Lazaras ne men dun ro, jimagungde gune wuii srane aishii sieng din yi pha ro.” 12 Samoythek è chang, Ithong, “Ai men mua arone, ai ne wie rey din ruii phro.” 13 Ji ne Isu è Lazaras iy dun pha ji yao, jimagungde ithek mugao yi izai men pha ji gao. 14 Isu è ithek shii wie yao, Lazaras ne iyjong dun ro, 15 jishii gu nathek chiang gune bajo sang ro ji-è gune ai rog shii oi ro, ji-è nathek ne migi now ruii phro. Ji-è cho gethek ne aishii wuii sha rai haro. 16 Thomas (Iwen rone ho muii pha ji) è awai ijak samoythek shii yao, “Cho gethek de zab Masdo rog shii wuii sha rai, chiihphado gethek de ai rog shii nya-iy mua gieng!” 17 Isu sha hà wuii thog shii, ai è Lazaras iy ne wieng pha dawi rey sha pha doh. 18 Bethany yi Jerusalem è labiang uom athog ro, 19 Judeanthek Lazaras iy muii pha bumuii Martha nane Mery shii lumuii hà azo yi pha rek phi pha wuii thog ruii. 20 Martha è Isu wuiiramuii pha yoi mage shii, ai Isu shii si pha fuang hà wuii dun, jimagungde Mery ne hò iliing hà rai iang. 21 Martha è Isu shii yao, “Ithong, na ne ichiih shii um iang arone, guro buphuii ne a-iy ba iwa! 22 Jishii gune thieg thuh shii magungde na è Hamangkhung-aphuii shii ai chiang nyie lia magungde ai ne na shii phi ruii phro.” 23 Isu è Martha shii yao, “Naro buphuii ne dinne hòi ruii phro.” 24 Ai è chang, “Gune thieg,” “Ai ne idohhè pha inai shii ne dinne chai hòi ruii phro.” 25 Isu è Martha shii yao, gune hòi pha ji nane chai ji ro. Hanyie è gu shii migi rek arone ai ne iy dun magungde ai ne sieng din ruii phro; 26 chiih-è hanyie gu rog rai ne gu shii migi now arone khuchung de a-iy phro. Nathek de jishii migi now bey? 27 Ai-è chang, Ithong! “Ji chak ro.” “Gune na shii migi rek phro na ne Masi ro, Hamangkhung-aphuii pha Dufuii hanyie è ichiih sohjambling shii wuiiramuii pha ji ro.” 28 Martha è ji yao ched pha idoh shii, idoh wuii ne ai ikhuii Mery shii de ug ne ho srane yao, “Masdo ne ichiih shii um ro,” “Chiih-è ai è na shii sai ramuii ro.” 29 Mery è ji yoi mage shii, jai srane aishii si pha khthiie fuang hà wuii dun. 30 (Isu ne ji pha thiig shii athog ba, ai ne Martha è wuii si pha ithua shii ba.) 31 Mery fuang khia mage shii aishii nong gieng pha bran de Mery rog fuang khia gieng. Ithek è now shii ai ne wieng hà choh wuii ara è now ro. 32 Mery Isu moe shii wuii thog srane, Isu shii nyadoh dang shii, ai è Isu lai moe shii bam yao, “Ithong,” “Nathek ichiih shii um arone, gu buphuii ne a-iy ba iwa!” 33 Isu è ai cho pha doh, chiih-è aishii riig shii ai rog shii um pha bran de cho ramuii; ji-è ai lubu shii thoh ne ai de bajo zodun. 34 Ai è ithek shii sai, “Nathek è aishii khi hà wieng muii phlei?”Ithek è chang, “Ithong, thawuii ne riig bo.” 35 Isu è cho. 36 Bran è yao, “Riig mage bo ai ne aishii bajo miie rek ara!” 37 Jishii giak bran è yao, “Ai ne miegthi pha bran shii Miegthi yi bey? Ai ne Lazaras shii a-iy yi pha de arek mua bey?” 38 Din ne, Isu bajo zo srane wieng hà wuii dun, ji pha wieng pha wog icho shii ne lubao kheb ne um. 39 Isu è yung, “lubao ji hong mage bo!” Iy dun pha bran pha bumuii Martha è chang, “Ithong, thiisa hà ne bajo shong now ruii phro. Ai wieng pha ne dawi rey sha ro!” 40 Isu è aishii yao, “Nane migi rek arone na ne Hamangkhung-aphuii pha biisiie doh ruii phro ne gu è na shii ayao ba bey?” 41 Ai è lubao shii ne reng mage. Isu è laziung hù ne yao, Aphuii, “Gune na shii laso phi, nyieliieshii na è gu shii nuii phi. 42 Gune thieg nathek ne idang gu shii nuii phi, Jishii gune ichiih pha bran chiang yao phro chiih-è gu shii de na mutho rone ithek de migi rek ruii phro.” 43 Ji pha idoh shii, ai è gang è ziak srane ho, “Lazaras, fuang hà khia mage bo!” 44 Ai è fuang khia ruii shii, ai wad ai lai ai mizia shii wieng pha yung è jiang ne um. Isu è aishii yao, “Aishii sey mage bo,” “Chiih-è dun yi bo.” 45 Mery shii wuii pha bran bajo è Isu mirek ji doh ne, ithek aishii migi rek. 46 Jishii giak bran è Pharisithek rog khid din srane, Isu mirek pha miyao ji yao. 47 Ji-è Pharisithek nane boh phabithek laimiang shii si srane yao, “Gathek nyie khi-èrek sha pha lei? Riig mage bo hì pha bajo buangthek pha blia hì pha bran mirek ro! 48 Gethek è aishii ji riig ne thoh muii arone, zab pha bran ne aishii migi rek dun phro, chiih-è Roman pha riichaithek ne gethek shii buii blia rek srane Misiahò nane gethek bran shii ne mua maphi phro!” 49 Ithek è jia, ji pha idam shii Kho Phabi Khaiphas beng pha è yao, na ne khinyama pha bi-ìe ro! 50 Na hì anow bey na shii ne hì wie liak phro gai pha bran chiih-è, zab pha bran shii mua liak shii ne bran jia iy liak ji wie ba phro. 51 Hì pha miyao yi ai è awai lum ne ayao; nyieliieshii, ji pha idam shii ai yi Kho Phabi, awai è riig Isu ne Jew pha bran chiang è iy ruii phro, 52 Chiih-è Jew shii asi bie pha, jimagungde Hamangkhung-aphuii pha bran shii dayiingdayang rek muii pha siu shii de dinne ò shii khrab pha ro. 53 Ji pha idoh è Jewish pha riichaithek è Isu shii ua pha nyuak rek. 54 Ji-è Isu Judea hà ug ne lua, chiih-è ji pha ithua thoh marui srane balimuang moe Ephraim beng pha thawun hà dun srane, thiisa hà samoy rog hà raidun. 55 Chiih-è Hiìadun Sai pha ishak nui rey sha mage shii, branthek soh re-è Jerusalem hà wuii ne Sai pha ibi shii zen pha muhui sang rekwuii phro. 56 Ai yi Isu shii riig ramuii, chiih-è ai Misiahò shii khrab, ai è awaithek chung sai rai, “Na nyie ro è now lei? Zai ai ne Sai pha inai shii awuii ruii habey? Asi ai wuii ruii habey?” 57 Phabi bohthek nane Pharisithek è yung srane ruii hanyie magungde Isu khi hà um pha ji thieg arone, gathek shii phosro bo, ji-è ithek ne aishii zum mua yi pha ji rek.

John 11 (BBT1E)

In Other Versions