Job 6 (MAAL)
1 ዬካፓ ዒዮቤ ሂዚ ጌይ ማሄኔ፦ 2 «ዖዪፃ ታኣኮ ዴኤሡሞ ዔሮ ባኮይዳ ጌሢንቴያታቴ ዓይጎ!ሜታሢያ ቢያ ታኣኮ ዴኤሡሞ ዔሮ ባኮና ዛጊንቴያታቴ ዓይጎ! 3 ባዞ ማኣሻሎይዳፓ ባሼ ዴኤፃንዳንቴኬ።ዬያሮ ዳንዳዒፃ ፓጬ ታኣኮ ጌኤዛ ኔና ዲቃሢ ሄርሺሳንዳያ ኮይሱዋሴ። 4 ቢያ ባኮ ዳንዳዓ ጎዳሢ ፔ ሂኢዦና ታና ዱኬኔ፤ዬያ ሂኢዦኮ ዳኣና ዑፆ ታኣኮ ዓኣዺ ሃሼኔ፤ፆኦሲኮ ዲቃሣያ ማዔ ባይዛ ባካ ኮይሎ ታኣኮ ማንጌኔ። 5 ኪርሞሌ ማኣቲ ዋዺ ዴንቄቴጌማይያኣ ዖሃ ዴንቄቴ ጉዹዋሴ፤ 6 ሶኦጌ ዋሂንቲባኣ፥ ዓኣፁዋ ካሣ ሙይንታ?ጱኡላኮ ሃሎ ዋኣፃ ዓኣፃ? 7 ታኣኒ ታ ዛሎና ዬያጉዴ ሙዖ ሻሻኣኪንታኔ፤ታ ሙዔታቴያ ታኣም ኮሽኩዋሴ።» 8 «ፆኦሲ ታ ኮዓ ባኮ ታኣም ዒንጋቴ ዓይጎ!ታኣኮ ሺኢጲፆዋ ዒ ዋይዛቴ ዓይጎ! 9 ሃያ ቢያይዳፓ ዒ ታና ዎዼቴ ኮሺቱዋኣዓዳ?ፔ ኩጮ ዔቂሲ ዒ ታና ባይዜቴ!ዬይ ታኣም ዶዲሢ ዒንጋንዳንቴኬ። 10 ዓይዲ ማዔቴያ ዱማዼ ፆኦዛሢኮ ቃኣሎ ታ ሃሺባኣሢሮዎዚ ታኣኮ ሜታሢ ሚርጌቴያዎዛና ታ ኮኦማንዳንቴኬ። 11 ሼምፔና ናንጋኒ ታና ማሃ ዓይጎ ዶዱሞ ታኣኮ ዓኣይ?ሃጊ ማዓ ዎዛ ታኣኮ ባኣያ ማዔቴ ታ ዓይጋ ናንጋይ? 12 ታኣኒ ሹቺጉዲ ዶዳያዳ?ታኣኮ ዑፃኣ ሞኦና ዓንጊጉዲ ጪኢሊዳ? 13 ታኣኒ ታና ማኣዳኒ ዎልቄ ታኣኮ ፔቴታዖ ባኣሴ፤ታኣኮ ዓኣ ዎልቃ ቢያ ዔውቴኔ።» 14 «ፔ ላጋሢም ዓኣ ጉሙርቂንቲፆ ፓጪሳ ዓሲፆኦሲ ዒጊቹሞ ሃሼ ዓሲኬ። 15 ታ ላጎንሢ ጋዓንቴ ዲጲ ዴንዴስካፓ ሚጫያናጉሙርሱዋኣ ዎሮጉዲ ጌጌሻያኬ። 16 ዎሮይዳ ባርጎ ዎዶናሻጫ ኩሊንታኔ። 17 ዖጎፆና ጋዓንቴ ዓልቂ ዴንዲ ባይቃኔ፤ዎራኣ ሚጪ ጉሪ ማዓኔ። 18 ጫኣኖ ጫኣና ቆልሞ ዒሺ ዒሺ ጎይፆ ዓኣዻ ዓሳጎይፃፓ ኬስኪ ዋኣፆ ኮይፆ ዓሳ ናንጉዋ ዳውሎ ጌሊ ዒኢካ ሃይቃኔ። 19 ቴማ ዓጫፓ ሃንቲፆ ዴንዳ ዓሳ ዋኣሢ ኮዓኔ፤ሳኣባ ዓጮኮ ኮርሞ ኮርማ ዓሳኣ ዋኣሢ ዴንቃኒ ሃጋኣ ዎዛ ጌሣኔ። 20 ዔያታ ጉሙርቄ ዎራ ሚጪ ጴዻዛ ሃጋኣ ዎዛ ዔያታ ቲቃኔ፤ዒኢካ ቤዞ ሄላዖ ዔያታ ዻዻጋዻኔ። 21 ዒንሢ ሃሢ ታኣም ዬንሢ ሚጬ ዎሮንሢጉዲኬ፤ታና ሄሌ ሜታሢ ዛጊ ዒጊቹሞና ጊንሢም ዒንሢ ዶጬኔ። 22 ዔዛታ ሃያ፥ ዬያ ታኣም ዒንጉዋቴ፤ሃሣ ጊንሣ ዒንሢኮ ቆሎና ታና ዓውሱዋቴ ታ ዒንሢ ጌይያ? 23 ታ ሞርኮ ኩጫፓ ታና ዓውሱዋቴ፤ታና ሄርቂ ዎይሣ ዓሶ ኩጫፓኣ ታና ዓውሱዋቴ ታ ዒንሢ ጌይያ?» 24 «ዒንሢ ታና ዔርዙዋቴ፥ ታ ዚቲ ጋዓንዳኔ፤ዻቢንቶዋ ታኣኮ ታኣም ኬኤዙዋቴ። 25 ጎኔ ሃይሴ ጫንቺታቴያ ዔውታያኬ፤ዒንሢኮ ቦሂፆ ጌኤዛ ጋዓንቴ ፔቴታዖ ፓሡዋያኬ። 26 ዒንሢ ታ ጌኤዞ ዛጋሢ ጉሪ ዢባሬ ማሂኬ፤ሂንዳ ታና፥ ሃጋኣ ዎዛ ቲቄሢም ዓይጎ ማሂ ዒንሢ ኬኤዛኒ ኮዓይ? 27 ዜኤሮ ናኣቶይዳ ዒፃ ዒንሢ ዓጋኔ፤ዒንሢኮ ላጎ ዒንሢ ሻንቻኒ ሻንቾንዶ ባኮ ዛሎ ማርማኔ! 28 ሃዳራቴ ታኣኮ ዓኣፖ ካሮ ዛጉዋቴ፤ዒንሢ ቤርታ ታ ሉኡቃ? 29 ዻቢንቲ ዒንሢኮ ማዑዋጉዲ ሃሹዋቴ፤ሃሢ ሃሹዋቴ፤ ታኣኒ ፒዜኬ። 30 ጎኔና ታ ዒንዲርዛ ዻቢንቲ ዓኣ?ታ ዻንጋ ጌኖ ማሊፆ ዱማሲ ዔራኒ ዳንዳዑዋኣዓዳ?»