Jeremiah 30 (TOMA)

1 Wɛlɛ keela wooi ʋa Zelemi sɔlɔɔni Ɠɔoɠɔ GALAGI ya: 2 «Ɠɔoɠɔ GALAGI, Izilayɛle ná-GALAGI wooi ɠaa: ‹Wooiti kpein gè ti woni è ma, ti zɛʋɛ sɛʋɛi ta zu. 3 Wɛlɛ, naama yee ɠa ʋaazu, voloi gè ʋaazu la ga nà-nuɓusɛiti, Izilayɛle ta Zuda, ti ga duɔiti,› Ɠɔoɠɔ GALAGI wooi ɠana. ‹Nà ʋaazu ʋolu ga tiye zooi naa zu, nii gè feeni ti-mɛmɛwolani zea, ta sɔlɔɔ ga tɔnɔ.› » Ɠɔoɠɔ GALAGI ɠa é boga. 4 Wɛlɛ wooiti ba, Ɠɔoɠɔ GALAGI puuni Zelemi la, Izilayɛle ná-faa zu ta Zuda ɓalaagi: 5 «Ɠɔoɠɔ GALAGI wooi ɠaa:‹Gá zɔngɔ maalua ɓee wooi mɛnisu,maalua vaa ʋe, ziilɛi faa laade. 6 À gaazaɠa bo, wo wɛlɛ,ni zunu doun zɔlɔɔga!Leeni vaa zu deɠɛmu, gè zunuiti pɛ kaazu,ti zaamaʋɛti sogai ga yeeiti,eɠɛ doun ɠoozuwana a ɠɛ anzanu ʋa,ti pɛ ti ɠaazumaaloɠaai? 7 Maanɔɠɔ ʋe! Mazɔlɔɔ foloi nii maayikiʋɛ!Taɠili ge la ɠulani ga nii!Kidaaʋili siɛgi ʋe seeliai Zakɔɓe mavofodaiti ma,kɛlɛ ta unmɔɔgi zɔlɔɔ, ti ɠula su. 8 « ‹Naama volo ná, nà unbawului ɠaleɠale nii é ti ɠɔba, gè ti ɠili ɠaluiti fie ti ʋa. Naazu ti la mɔ ɠɛa ga wɛɛn ná-duɔ eyɛsu ɠɔ,› » Ɠɔoɠɔ GALAGI, Fai-Pɛ-Maliɠii wooi ɠana. 9 « ‹Kɛlɛ ta botii ɠɛ bɛ̀, nà, Ɠɔoɠɔ GALAGI, ta-ƓALAGI. Nà Davide zei ʋolu ga ta-masagi, ti botii ɠɛ bɛ. 10 Ɗɔun ɗa, nà-botiɠɛ nui Izilayɛle,deɠɛmu mina lua pɛ,› »Ɠɔoɠɔ GALAGI wooi ɠana,« ‹mina iɲɔteʋe, ɗɛi è ga Zakɔɓe mavofodai!Mazɔlɔɔ nà è unmɔɔsu,è maaɠooza ʋa poun zou ɠili su,è-mavofodai ɓalaa ɠa ɠula zooi naa zu,ʋɛ é ná duɔlai zu.Izilayɛle, ɗa ɠale ma ʋolu, ɗa zei dɔin, ziilɛigi zu,nu nɔpɛ ge la mɔ è maalua. 11 Mazɔlɔɔ nà è ʋa, gè è ɠizo,› »Ɠɔoɠɔ GALAGI wooi ɠana.« ‹Nà zii ɠiligiti pɛ ma zuwu ɠaaleʋezuniiti gè wo vazani ti zaama,kɛlɛ gè la è ma vaa ɠaaɓelaa.Kɛlɛ tɔun nà è loɠa,é zoloo naa ma, nii sɔlegai,gè la è yɛga ná eɠɛ sɔbalala nu.› » 12 «Ɠɔoɠɔ GALAGI wooi ɠaa:‹Ɗa-maawanai zuwɔɔlɔʋɛ gola,ɗa-ʋalai la ɠɛdɛga. 13 Nu nɔpɛ ge la yiizoolɛzu ga ɗa-vaa.Pɔlɔma ta ɗa palaiti balo,kɛlɛ ɗɔun, sale la ná è ma vaa ma. 14 È-nɛɛɲɔɠɔiti pɛ ti yeema è ma,ta la mɔ yiizoolɛzu ga ɗa-vaa.Mazɔlɔɔ gè è loɠani eɠɛ nu a ɠɛ zili nu loɠazu,gè zeini è ɠa ga maaɠoloi,mazɔlɔɔ ɗa-vaaɠaazagi zuwɔɔlɔni,ɗa-ɠotoiti ti mɔin gola. 15 Leeni vaa zu è kpalagi wosu ga è maanɔɠɔ vai,palai é è ʋa é la ɠɛdɛsu?Ɗa-vaaɠaazagiti suwɔɔlɔ vai maaʋele ʋe,ta ɗa-ɠotoiti mɔin vai gola,naa ɠa é kɛa gè naa ɠɛ ga ɗe. 16 Naa ɠa é ba, niiti ti è ɠoloɠolosu, naati ta ɠoloɠolo,è maayoseɠe nuiti pɛ ta li duɔlai zu.Niiti ti è unmazu, ta naati unma,niiti ti loozu è ma, ta loo naati ma. 17 Mazɔlɔɔ nà ʋaazu ga ɗa-ɠɛdɛyai è ʋɔ,gè ɗa-ʋalaiti balo,›Ɠɔoɠɔ GALAGI wooi ɠana,‹ɗɛi ti è lolisu ga: Kɛlɛba, Siyɔn nii nu la yiizoolɛzu la.› » 18 Ɠɔoɠɔ GALAGI wooi ɠaa:«Nà Zakɔɓe ná-nuiti seizuʋɛ ɓɛtɛzu ʋolu,ti-zeizuʋɛti pɛ maawɔin sòga.Taaiti pɛ ta lo ʋolu ʋɛti ti woloni ná, pɛlɛ ʋagɔiti ta lo ʋolu ti-losuʋɛti. 19 Mama guyei ɠa ɠɛ ti zaama, ta koozunɛ vaiti.Nà ti ɠaawɔɔlɔ, ta la ɠulaa ti-liegɔi ma.Nà ti wɔɔlɔ, ɓaa la mɔ ɠulaa ti ma pɛ. 20 Niiti ta ɠɛ ga Zakɔɓe mavofodaiti,ta ɠɛ eɠɛʋelei ti ɠɛni la mɔungi,ta-maaɓɔgi ɠa yɛ ɠɛʋele ma gàazu, é la ɲiikpiga,nà wuzeɠe ti wɔinzeɠe nuiti daalɔɠɔma. 21 Ti taɠila ka a ɠula ti zaama, é ɠɛ ga ta-ɠundiɠii.Ungo, ta-nui taɠila ka a lo ti luɠɔ.Nà va bu é maaɓuɠa bà,mazɔlɔɔ nu ɠili nɔpɛ ge la vaa bué ʋa yee zeɠe yɛnvui maazuga é ʋa maaɓuɠa bà, ni gè la tolini,»Ɠɔoɠɔ GALAGI wooi ɠana. 22 «Naazu wa ɠɛ ʋolu ga nà-nuɓusɛiti,ta nà ɠɛ ga wa-ƓALAGI.» 23 Wɛlɛ fiilɛ wolai ɠa wuzeɠezu, tokoleʋeai Ɠɔoɠɔ GALAGI ʋɛ,ná-ziiɠulagi lokoleʋe, é ɠɛ ga sabala golai,é ʋu naati unmaʋɛ, niiti ti faa ɲɔi ɠɛɛzu. 24 Ɠɔoɠɔ GALAGI ná-ziiɠaawanai la ɠalega ma pɛ,eyɛsu é naa ɠɛ, é daazeeli,nii kpein é deveai yiimaʋɛ.Foloi ta, wa naa ɠaaɠa.

Jeremiah 30 (TOMA)

In Other Versions